Netanyahu I El Mufti

Por:
- - Visto 317 veces

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet. Mi emisyon se puede oir sovre el sityo de Radyo J sea en direkto sea kuando se kyere, indose al kavo de la redifuzyon de la emisyon del djueves a la tadre.

De otra parte, tengo el plazer de anunsyarvos ke los atelyes de konversasyon de Vidas Largas van a empesar de muevo, i ke el primero se va tener el martes a venir (zikat: martes i no lunes komo el anyo pasado) 10 de oktovre, de las dos (zikat: dos i no tres komo el anyo pasado) a las kuatro (i no sinko komo el anyo pasado). Vos akonsejo muy fuerte de venir munchos: no ay mijor manera de mantener muestra kerida lingua ke de venir echar lashon dos orikas. No vos sikileesh si no savesh byen avlar. Los byervos ke vos pensavash olvidados vos van a venir del fundo de la memorya; esto es lo ke me afito a mi, ke me pensava tener todo olvidado, esto es lo ke esta afitando agora a mi mujer tambyen, salvo ke eya se va a atelyes de konversasyon en yidisch…Kada uno kon su djiz i kon su shishit, komo dize muy byen muestro kerido Prezidente Haïm.


Esto dicho, oy vos kyero avlar de una koza ke izo muncho patirdi ay unos kinze diyas de esto, kyero dizir la deklarasyon ke izo Bibi Netanyahu el 20 de octovre pasado, al 37en kongreso syonisto mundyal, ke se tuvo en Yerushalayim.

netanyahuAntes de akodrarvos lo ke disho, tengo de akodrarvos en primero otra koza: ay un argumento ke oyemos munchas vezes de parte de los antisyonistos: los arabos no tyenen de pagar las kulpas de los almanes. Los arabos son inosentes de lo ke fue la shoa. Me akodro ke el kerido Ahmadinedjad disho una vez, despues de tener dicho ke Israel deviya ser rayado de la karta: “los djudyos ke agan si lo kyeren sus estado en Almanya!”

La primera repuesta de dar a este argumento, por siguro, es ke el pais de los djudyos se yamava la Djudea, por esto es ke los djudyos asta oy se yaman djudyos, i ke  nunka fue en Almanya, ama en el pais ke se yamo despues Palestina.

Esto es la primera repuesta. Ama ay tambyen una sigunda repuesta, es ke es falso de dizir ke los arabos, sovre todo los de Palestina, o los muzulmanes, no tyenen nada de ver kon la shoa. Es vedra ke los arabos de Palestina no teniyan governo porke asta 1917 teniyan un governador turko osmanli, i despues de 1917 ingles. Ama yene teniyan un lider, i este lider era el gran mufti de Yerushalayim, Mohamed Hadj Amin Al Husseini, un nazi fanatiko ke partisipo a la shoa, i no un poko, de manera malorozamente provechoza. Provechoza para la shoa, kyero dizir.

Esta sigunda repuesta, todos se la olvidaron, i Netanyahu kijo akodrarla el 20 de oktovre. Kualo disho egzaktamente? Disho lo ke sige, avlando de la entrevista ke tuvo el Mufti kon Hitler el 28 de novyembre 1941, kale tener dikat a la data ke es muy importante:

” I este atako (un pogrom en Jaffa en 1920) i otros kontra la komunitad djudiya en 1920, 1921, 1929, eran instigadas por una yamada del Mufti de Yerushalayim Haj Amin al Husseini, ke fue despues implikado por krimenes de gerra en los procesos de Nuremberg porke  tuvo un rolo sentral en instigando la solusyon finala.

” El Mufti se fue a Berlin. Hitler no keriya en este tyempo eksterminar a los djudyos, los kerya echar afuera. I el Mufti se fue a ver a Hitler dizyendole: si los echad afuera, van todos a venir aki. Kualo ke aga de eyos? demando Hitler. El Mufti respondyo: Kemadlos.”

Lo ke vos vengo de meldar es djusto un pedasiko del diskorso de Netanyahu respondyendo a las diez mintiras ke se dizen kontra Israel.

http://mfa.gov.il/MFA/PressRoom/2015/Pages/PM-Netanyahu-addresses-the-37th-Zionist-Congress-20-Oct-2015.aspx

Ama los byervos: “Hitler no keriya en este tyempo eksterminar a los djudyos” alevantaron a la vez a la syedra i a munchos istoryanos, i es vedra ke las kozas son mas komplikadas ke lo ke disho Netanyahu.

Es ke en este tyempo Hitler keriya o no eksterminar a los djudyos? Es vedra ke no solo lo keriya azer, ama ya lo teniya empesado desde mezes.

Lo keriya azer porke teniya un odyo kaji loko kontra los djudyos. El 3 de julyo 1920, unos vente anyos antes de la shoa, ya eskriviya al Major Konstantin Hierl, una letra sovre papel de su partido NSDAP (el partido nazi):

“El djudyo en tanto ke levda de dekompozisyon (asigun Mommsen) no es de verlo komo individuo bueno o negro; es la kavza absoluta de la estruisyon interna de todas las rasas, en las kualas entra komo un guzano. Su aksyon es determinada por su rasa. De la mizma manera ke no puedo dar keshas a un basilo de la tuberkulozis, por una aksyon ke para los ombres kyere dizir estruisyon, ama para el la vida, de la mizma manera so ovligado i justifikado, para mi egzistensya personala, de luchar kontra la tuberkulozis en eksterminando (vernichten) sus ajentes. El djudyo se a echo desde miles de anyos en su aksyon una tuberkulozis rasyala de los puevlos. Kombatirlo kyere dizir eliminarlo (entfernen).”

En el solo mez de oktobre 1941, dunke un mes antes de la vijita del Mufti, tenemos munchas deklarasyones de Hitler ke amostran ke ya dechido de muncho tyempo de eksterminar a los djudyos.

http://www.phdn.org/histgen/hitler/declarations.html

Es ke Hitler teniya empesado de eksterminar a los djudyos antes del 28 de novyembre 1941?

Komo no! Lo ke se yama agora la shoa por kurshumes, kijo dizir la matansina de famiyas enteras de djudyos, ombres, mujeres, vyejos, kriaturas i bebikos, ya empeso en Rusiya i paizes baltos desde agosto 1941. Ya vos avli de los einzatzgruppen aki mismo en la emisyon ke vos aviya echo sovre la shoa por kurshumes.

En la sola sivdad de Kiev, los Almanes matan en solo dos diyas, los 29 i  30 de septyembre 1941, serka de Babi Yar, a 33.000 djudyos.

Por esto es ke la deputada meretz Zehava Galon va responder a Netanyahu demandandole: “Puede ser ke los 33.771 djudyos asasinados en Babi Yar…devriyan ser salidos de tyerra para informarles ke los nazis no los keriyan estruir”.

Pareseriya, en estas kondisyones, ke Netanyahu disho mintiras. Ama vos dishe ke las kozas eran mas komplikadas. Deke? Porke afillu el odyo de Hitler i su gana de matar a todos los djudyos, ay yene una vedra istorika, lo ke se yama el plano Madagascar.

En junyo 1940, Ribbentrop prezenta a Hitler  un plano aparejado por los kapos nazis asigun el kual los djudyos del Este de Evropa seran metidos en kampos en Polonya, i los djudyos del oeste de Evropa seran metidos en kampos en la isla de Madagascar. El 18 de junyo 1940 (ke es el mizmo diya de la famoza yamada de de Gaulle) Hitler avla de esto kon Mussolini. El 15 de agosto 1940 , Eichman i Dannecker (el ke sera un tyempo el direktor de Drancy) eskriven un plano de deportasyon de 4 milyones de djuyos verso Madagascar, en kuatro anyos, un milyon al anyo, kon 120 vapores.

Este plano no va ser al kavo achetado, porke los Almanes no van a reushir a konkistar la Ingletyerra, i por esto no van a tener la maestriya de las mares. El plano va ser abandonado en desyembre 1940, i remplasado por un plano de Göring, Himmler i Heydrich, de embiyar los djudyos en Rusiya, una vez ganada la gerra kontra eya (ke empeso el 22 de junyo 1941).

Esto todo para dizir ke kuando Netanyahu disho ke Hitler al empesijo no keriya eksterminar a los djudyos, no era enteramente falso. Salvo ke, el 28 de novyembre 1941, kuando Hitler resivyo al Mufti, estos  todos planos no egzistiyan mas. A la kontra, lo ke ya egzistiya era la veluntad de Hitler de una solusyon finala (endlösung) de la kuestyon djudiya por la eksterminasyon de todos los djudyos, kual ke diga el Mufti.

Lo ke lo amostra es ke la famoza Konferensa de Wannsee, si es vedra ke se tuvo el 22 de janvier 1942, en vedra deviya al empesijo tenerse el 9 de desyembre 1941; si no se tuvo es porke mos topavamos en la entrada de los Estados Unidos en la gerra, en mizmo tyempo ke los Rusos rezistiyan delantre Moskva, i ke aviya kozas mas urjentes de ver.

I lo ke es interesante es ke la konvokasyon de Heydrich por esta konferensa de Wannsee fue embiyada el 29 de novyembre 1941, kijo dizir solo un diya despues de la entrevista Hitler-Mufti. No se puede pensar ke la desizyon de la solusyon finala sea tomada el solo 28, kuando djusto un diya despues ya fueron embiyadas las konvokasyones a una konferensya.

Por lo tanto, lo ke se disho en esta entrevista entre el Mufti i Hitler, lo konosemos un poko por las notas tomadas por el tardjuman de Hitler, Paul-Otto Schmidt.

http://www.veroniquechemla.info/2009/12/la-croix-gammee-et-le-turban-de.html

No vos vo todo meldar, solo lo sigyente:

“Una vez esto reushido (ayegar a la salida sur del Caucase) el Fuhrer dariya al mundo arabo la sigurensya ke su ora de liberasyon era ayegada. El eskopo de la Almanya seriya solo la estruisyon del elemento djudyo morando en la sfera araba basho el protektorato britaniko.

(…)

“El Gran Mufti respondyo ke era su vista ke todo se pase komo el Fuhrer lo aviya dicho. Era enteramente asigurado i satisfecho por los byervos ke teniya oido del kapo del Estado Alman.”

Kualo dizir de esto, sino ke el Mufti, a lo manko, vino a asigurarse ke si los Almanes veniyan konkistar la Palestina britanika, era djusto i solo para matar i estruir los djudyos de aya.

No kale dunke tanto burlarse de Netanyahu.

Enfin ay otro argumento en favor de lo ke disho Neyanyahu. Todos los istoryanos ke meldi sovre internet se refyeren a un testimonyo de Dieter Wisliceny,  kapo SS basho los ordenes de Eichmann, ke izo, dizen estos istoryanos, delantre el Tribunal de Nuremberg.

Asigun eyos, disho lo ke sige:

“Para los Almanes, el Mufti a sido unos de los inisyatores de la eksterminasyon sistematika de los djudyos de Evropa, todo en syendo el kolaborador permanente i el konsejero de Eichmann i de Himmler en la egzekusyon del plano…Asigun mi, el Gran Mufti, ke se topava en Berlin desde 1941, djugo un rolo en la desizyon del governo alman de eksterminar los djudyos de Evropa, i su importansya no puede ni no deve de ser neglijada. Aviya suggerado la eksterminasyon de los djudyos de Evropa munchas vezes a las varyas autoridades kon la kualas era entrado en kontakto, sovre todo antes de Hitler, Ribbentrop i Himmler. Aviya konsiderado esto komo una solusyon konfortavle a la kuestyon palestinyana. En sus mesajes difuzados desde Berlin, mos aviya depasado en los atakos anti-djudyos. Era uno de los mijores amigos de Eichmann i lo teniya syempre insitado de akselerar las mizuras de eksterminasyon…”

http://therese-zrihen-dvir.over-blog.com/2015/10/le-mufti-hitler-et-les-palestiniens-les-faits.html

Este teksto me parese muy importante, i sovre todo me parese dizir la vedra, afillu si unos kontestan la valor de la palavra de Wisliceny.

Ama yo tambyen vos devo la vedra, keridos oyentes: este teksto deve ser, porke lo meldi aki i aya. Ama yo, en dingun lugar topi su fuente.

Meldi el testimonyo oral de Wisliceny en Nuremberg el 3 de janvier1946:

http://avalon.law.yale.edu/imt/01-03-46.asp#wisliceny

Meldi el affidavit (deklarasyon eskrita) firmada por Wisliceny:

http://www.phdn.org/archives/www.ess.uwe.ac.uk/genocide/Wisliceny.htm

En dinguno de estos dokumentos topi lo ke vos meldi. No es ke lo ke vos meldi es falso. No penso ke sea falso. Penso solo ke ay otros affidavit ke no topi. O puede ser , lo ke vos meldi no es un testimonyo para Nuremberg, sino el interrogatoryo de este mizmo Wisliceny a su propyo proseso en Bratislava en 1948, antes de ser enforkado. (No kale muncho yorar sovre Wisliceny, syendo ke , entre otros krimenes, el es ke se okupo kon Alois Brunner de la deportasyon de los djudyos de Selanik).

De toda manera, el rolo del Mufti kontra los djudyos fue una koza terrivle, antes de la gerra, durante la gerra i despues de eya.

Las fotos no se pueden amostrar a la radyo, ama penso ke todos ya konosesh las fotos amostrando el Mufti kon Hitler, kon Himmler, azyendo el saludo nazi, pasando en revista la armada de muzulmanes SS de Bosnia, ets

No me vo apezgar mas sovre el Mufti en una emisyon de vente minutos. Tendriya menester de ora entera para kontar todos sus krimenes. Krimenes ke no pago, nunka fue djuzgado, i kale dizir ke es la Fransya ke le permetyo de fuir i eskabuyirse, ama esto es otra istorya.

Se muryo en su kama en 1974, i muestra sola konsolasyon es ke vido antes de morir ke todos sus esfuersos, todos sus krimenes no aviyan servido de nada a su puevlo. Vido de su egzilo el renasimyento del estado de Israel, vido las viktoryas de Israel en 1948, i, peor, en 1956 i sovre todo en 1967, kon la Palestina araba enteramente okupada por los djudyos, i mismo vido la viktorya de Israel en la gerra de Kipur. No es muncho, ama yene es una konsolasyon de pensar a su dezespero de ver a kada vez los djudyos mas i mas fuertes i los arabos de Palestina mas i mas flakos i malorozos por aver oido sus konsejos.

Ama me kyero, antes de eskapar esta emisyon, aboltar a lo ke keriya amostrar Netanyahu kuando avlo del Mufti. La kuestyon es:

Es ke el Mufti nazi reprezentava los arabos de Palestina, o es ke los arabos de Palestina no teniyan nada de ver kon el?

Los partezanos de los arabos Palestinyanos pretenden ke el Mufti no reprezentava su puevlo. En su livro Les Arabes et la Shoah, Gilbert Achcar, profesor franco-lebaneze, mos dize ke “los arabos i berberos ke kombatyeron en las armadas de los Aliyados durante la Sigunda Gerra Mundyala son muncho mas numerozos ke los ke kombatyeron en las armadas de los paizes de la Aksis”.

I Alain Gresh mos dize ke “uvo 9.000 Palestinyanos en la armada britanika, syenes de miles de Maghrebinos en las armadas de la Fransya libera, sin avlar de syenes de deportados arabos en los kampos nazis”.

Por lo ke es de los Maghrebinos al lado de los Fransezes, tyenen razon. Kuantos fueron egzaktamente, no se, ama fueron munchos i les devemos la parte esensyala ke tomaron en la bataya del Monte Cassino komo en el debarkamento en el sur de Fransya.

Ama por lo ke es de los arabos de Palestina, es otra koza. Kuando Alain Gresh mos dize ke uvo 9.000 Palestinyanos en la armada britanika, esto no kyere dizir nada, porke los palestinyanos eran sea djudyos, sea arabos. En Wikipedia, meldi ke asigun el istoryano Ashley Jackson eran 1.600 djudyos i 1.200 arabos, ama ke asigun Howard Blum, los djudyos eran tres vezes mas ke los arabos.

De otra parte, los muzulmanos SS alevantados en Evropa por el Mufti fueron mas de 100.000, asigun lo ke meldi. I izyeron matansinas terrivles, i no solo de djudyos.

I esto, al kavo, da razon a Netanyahu pretendyendo ke los muzulmanos no se pueden dizir todos inosentes de la shoa, malgrado los ke kombatyeron kontra los Almanes, ke por siguro no kale tampoko olvidar.

Al djueves ke vyene, si kyere el Dyo!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: