El sinyal de vejes no es la blankura de los kaveyos,
Ni los dolores de las noches, ni akeos ezveyos,
Mismo las kaminadas largas ke provokan kanseryas,
No son sinyos de vejes ni de kozas tanto seryas.
****
La vejes empesa si no ves realizar tus dezeyos.
Bives una vida monotona yena kon penseryos,
Piedres la esperansa del futuro de tus buenos diyas
Te aleshas de tu bivyenta i de tus alegriyas .
****
En los espejos empesas a ver la rugas de tus karas
Las miradas son kansadas, en tu frente unas varas.
Te sientes muy desganozo piedres la savor de tu boka,
Los olvidos empesan i la vista te se apoka.
****
Tus kashones enpesan a inchirsen kon diferentes kuras,
Kuando te sientes horozo,kuando pasas oras duras.
En nuestros rejistros nombres,telefonos de doktores
Miramos a yamarlos ralo i damos al Dyo lores.
****
Kreyo ke la melizina la mas efikas en esta edad
Es pasar la vida kon sonrizas i kudyar la sanedad.
Sos transformado a un ombre kayado , sin buto,
Komo un arvole seko ke no da mas su fruto.
****
Estas advertensyas te hazen sentirte aedado,
No tengas pena ,es la parte de la vida este estado.

Compartir
Artículo anterior“El Cuervo” de Edgar Allan Poe en Yiddish
Artículo siguienteEntrevista a Sor Anne-Françoise de la Nativitè (Hermana Ana Francisca de la Navidad)
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.