Leopold Gottlieb: Portret Doktora Kupczyka, 1907
Leopold Gottlieb nasió en una famiya djudía tradisional, de 11 kriaturas. El nasió 5 anyos después de la muerte de su ermano, el pintor Maurycy Gottlieb. Sus djenitores lo enkorajaron a estudiar arte.
El estudió en Krakov entre los anyos 1883 i 1902, de este anyo pasó a estudiar en Mónako, ande fue enfluensado por los impresionistas, i se transferó a París, para ambezarse de eyos. Ayá se unió al grupo de pintores djudiós, ke bivían akel tiempo en París, i entre eyos Amedo Modigliani. En el 1905 Gottlieb exibió en el “Salon de Otonyo” en París portretos ke ekspresan su atadijo personal kon el kubizmo, i eskisas del fronte de los días de la Primera Gerra Mondial.
En el 1906 estuvo por un kurto periodo en Bezalel (Erets Israel), i después tornó a estudiar en París. El ekspozó sus ovras en muestras en Berlino, Viena, Mónako i París. Entre el 1910 i el 1913 bivió en Erets Israel i ensenyó en Bezalel. Entre el 1916 i el 1934 partisipó komo kombatiente en la lejión poloneza de Pilsutzki. En este periodo él izo 1000 eskisas de gerra, ke traen las figuras de sus kompanyos de armas, i shenas de gerra. Estas eskisas fueron publikadas kon el títolo de “El Dosié de las Lejiones”. En el 1933 kon la suvida de los nazistas al governo i muy serka de su muerte, aparese en alguna de sus ovras un aire de trajedía. El kamino artístiko de Leopold Gottlieb reflekta los grandes trokamientos, ke tuvieron lugar en el mundo de l`arte del`Evropa Oriental durante diezenas anyos. Por exemplo, sus portretos de mujeres son yenos de grasia i nobleza. El es konsiderado uno de los mas grandes pintores de muestros tiempo.
Artículos Relacionados: