En esta rubrika, vos traemos esta vez, tres platos a baza de sevoya. En desparte de su rolo tan importante en el gizado sefaradi, los diversos djeneros de sevoya se komen tambien en sus estado natural, akompanyan mezes komo lakerda, anchois, pishkado frito i otros, i adjustan savor kaji a todo modo de salata.

La sevoya o kon su nombre latino “Allium cepa”, ya es uzada en gizados o prinsipalmente konsomada kruda, desde una epoka de 2000 anyos atras. En desparte de ser uno de los lugumbres muy populares al seno de kaji todos los puevlos en el mundo, la sevoya es un manadero de vitaminas, entre eyas las vitaminas A, B i C, i kontiene fosfor, yod, i sulfuro. Es uzada komo “antibiotika” natural kontra la gripa, abashada, tos o enfeksion en el garon, buyendo sovre la lumbre, por unos kuantos minutos, una sevoyika kortada muy fino, kon una kuchara de miel i medio vazo de agua. Deshar repozar una o dos oras, kolar esta meskla i bever el likido ke se obtiene, 4-5 vezes al dia.

La sevoya es tambien, un manadero de enerjia: en la istoria leshana algunos puevlos bevian, durante el dia, el sumo de la sevoya mesklado kon miel, lo ke les dava una aparensia de buena salud i de djoventud.

Las vertudes de la sevoya son munchas, i por esto devemos konsomar el lugumbre al tanto ke podemos, i kualo azer kon la golor ke keda en la boka: komer un poko de pan o mashkar prishil…

ARMIKO DE SEVOYA

Ingrendientes:

  • 2 kgs. de sevoya
  • 100 grs. de tomatada (o 4 tomates rayidas)
  • 1/4 de vazo de azete
  • 1 vazo de agua
  • 1 kucharika de sal
  • 1/2 kucharika de pimienta

Kozer aparte:

1 kg. de karne de vaka, kortada en kubos, kon un litro i medio de agua o mas, asta ke la karne se ablanda, adjustar una kucharika de sal, i deshar sovre la lumbre otros pokos minutos.

Preparasion:

  1. Mundar las sevoyas, lavarlas bien i kortarlas en chikos kubos. En una kaldera meter la azete i sofriyir las sevoyas asta ke toman una kolor dorada. No olvidar de mesklar las sevoyas de vez en kuando afin de evitar ke se kemen. Entremientres dezechar la tomatada en medio vazo de agua i vaziar sovre las sevoyas fritas, adjustar la sal i pimienta i la agua. Si se uza los tomates rayidos ay ke sofriyirlos de antes en un poko de azete. Deshar kozer a fuego muy basho asta ke las sevoyas ya estan blandas.
  2. La karne ke ya fue preparada de antes, sofriyida i bien kocha en su kaldo, se adjusta al armiko, i se desha papear endjuntos otros 10-15 minutos.

Esta es una komida muy savroza, i en munchas famiyas en Estambol, o otra sivdades de Turkia aze parte del menu de la fiesta de Pesah.

SEVOYA REYENADA

Ingredientes:

  • 5-6 sevoyas grandes, de preferansa deskojer las ke son largas
  • 500 grs. de karne pikada
  • 1/2 vazo de arroz
  • 1/3 de vazo de prishil pikado
  • 1 limon, el sumo
  • sal i pimienta
  • Para el kaldo:
  • 3/4 de vazo de kaldo de geyna (o agua)
  • 1/3 de vazo de sumo de limon
  • 1-2 kucharikas de miel
  • sal i pimienta

Preparasion:

  1. Kitar las ojas sekas de las sevoyas, i kon un kuchiyo bien aguzado, azerles un korte ondo, a la larga, ke yege asta el “korason” de la sevoya.. Meter las sevoyas en un resipiente de vidro, kuvrirlas i abafarlas de 6 a 8 minutos en el mikro-ondas, para ke se ablanden un poko. Kitar el resipiente del mikro-ondas i deshar las sevoyas yelar.
  2. Entremientes se apronta el gomo mesklando bien todos los ingredientes.
  3. Kitar las “ojas” de todas las sevoyas una a una, kon muncho kudyo, para no romperlas, i meterlas aparte.
  4. Kuvrir el fondo de una kaldera de 26/28 sms. de diametro, kon bodres bashos, kon los “korasones” de las sevoyas kortados en pedasikos.
  5. Kon una kuchara, inchir las ojas de las sevoyas, serrarlas sin muncho apretar, i pozarlas en la kaldera, de manera ke la “kustura” este debasho, sin deshar dingun espasio entre la una i la otra.
  6. Mesklar todos los ingrendientes del kaldo, vaziar por ensima de las sevoyas. Meter sovre las sevoyas reyenadas un plato, de mizmo diametro de la kaldera, i kuvrirla kon su tapon.
  7. Kozer a fuego basho, kaji una ora o asta ke el kaldo se reduse al minimo.

El ke le gusta, puede reyenar las sevoyas, kon arroz solamente, adjustando fruta seka komo pasas, pedasikos de kayisi (apricot), i igos sekos ansi ke pinyones, todo a vuestro gusto. A esta meskla se puede adjustar media kucharika de kanela lo ke dara al gomo una maraviyoza savor.

PISHKADO AL ORNO KON SEVOYA

Ingredientes:

  • 2 levrekes o todo otro pishkado fresko
  • 5 sevoyas koloradas, ke son mas dulses
  • 2 kucharikas de salsa de tomat dezechas en un poko de agua
  • 1 limon, el sumo
  • 1/3 de vazo de azete de oliva
  • sal i pimienta

Preparasion:

  1. Kaentar el orno de antes a 180 grados. Alimpiar i lavar bien los pishkados, meterlos sovre un panyo para enshugarlos.
  2. Alimpiar i kortar las sevoyas en rodanchas i friyrilas en la azete asta ke toman una kolor dorada.
  3. Kuvrir un pyrex, o todo otro plato ke va ol orno, kon la sevoya frita. Untar los pishkados de las dos vandas kon la meskla de salsa de tomat, sumo de limon, sal i pimienta, pozarlos sovre la sevoya frita, kuvrir el plato kon papel aluminium i meter al orno.
  4. Despues de unos 20 minutos, kitar el papel aluminium, suvir la temperatura a 200 grados, i deshar dorar los pishkados otros pokos minutos.

Este plato se puede servir kon patatas fritas a su lado i salata vedre.