Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Mi emisyon se puede oir en el mundo entero sovre internet, al sityo de Radyo J, ama, malorozamente, estos tyempos solo en direkto (el djueves a las 4 i sesh).
De otra parte, vos akodro ke el proksimo atelye de konversasyon de Vidas Largas se va tener el martes 5 de janvier 2016, de las dos a las kuatro, en el Centre Communautaire. Estos atelyes son avyertos a todos, venid munchos.
Ay solo unos kuantos diyas, el profesor Sephiha me embiyo por internet tres artikolos en djuntos puvlikados por info’SION:
Un artikolo de Adam Elyaou Berkowitz, gazetero amerikano, trasladado del ingles por Edith Brenner: Komo Poutine se izo uno de los mas poderozos aktores del mundo
Un artikolo de Laly Derai, travado de la gazeta Hamodia, intitolado: Poutine, los djudyos i Israel
Otro artikolo, el tambyen de Laly Derai i travado de Hamodia, ke es una entrevista kon Tsvi Magen, agora espesyalisto de la Rusiya al Instituto Nasyonal de los Estudyos Stratejikos, ama antes fue embashador de Israel en Rusia komo en Ukranya.
Lo ke sale de estos artikolos, es ke, por una vez, tenemos un dirijante ruso ke, asigun estos gazeteros, los kyere a los djudyos.
Kuando era chiko, Poutine biviya en una famiya muy prove. Sus paryentes eran syempre al lavoro, il el chiko deshado solo. Tuvo el mazal de tener por vizinos djudyos hasidim, ke no kedavan de kombidarlo. Poutine eskrivyo en su livro de autobiografiya: ” Eran muy dulses kon mi, afillu ke yo ni era de sus famiya, ni mismo era djudyo. Eran buenos para un ijiko en un tyempo i en un lugar ande era sekanozo de serlo.”
Trenta anyos mas despues , kuando era mayor en sigundo de la sivdad de Leningrad, en memorya de esta famiya, permityo la avyertura de la primera eskola djudiya de la sivdad.
Poutine konta: “Eran djudyos pratikantes ke no lavoravan diya de Shabath, i el ombre estudyava el Tanah i el Talmud diya entero. Una vez, le demandi lo ke meldava. Me lo dyo a entender i me intereso muncho.”
En 2005, kuando izo su vijita ofisyala en Israel, se fue a ver en Tel Aviv a la mujer ke aviya sido su profesora en el liseo. Los gazeteros dizen mismo ke le merko un apartamento en Tel Aviv porke su morada no era buena.
Agora Poutine esta arrodeado de djudyos muy rikos ke son sus amigos.
Por Roshashana Poutine eskrivyo al haham Lazar para dezear una anyada buena i dulse a la komunidad djudiya de Rusiya. “Durante siglos, eskrivyo Poutine, las valores djudiyas fueron de alto nivel.” I, asigun los gazeteros, Poutine tyene syempre luchado kon el antisemitismo.
I kon Israel, kuando Poutine enkontro a Netanyau para diskutir de la situasyon en Sirya, Poutine, le dyo asiguransas de sus fuertes relasyones kon Israel.
No mos olvidamos, disho Poutine, ke munchos ke fueron sivdadanos rusos moran agora en el Estado de Israel, i esto djuga en las relasyones entre los dos estados. Tenemos konosensya de la artiyeriya dirijida kontra Israel i la kondenamos.
En 2011, Poutine deklaro a un kongreso djudyo: “Para mozotros, Israel es un estado espesyal. Es un pais ke avla kolay el ruso, syendo ke mas de la mitad de la povlasyon avla ruso.”
I en 2014, en medyo de la gerra kontra Gaza, Poutine deklaro en un meeting de hahamim: “Sostengo Israel en su kombate para la proteksyon de sus sivdadanos”.
Asigun Laly Derai, nunka un prezidente ruso aviya amostrado tanto respekto para los dirijantes de la komunita djudiya. Dyo la medaya del Prezidente, ke seriya la mas alta de las dekorasyones rusas, a Berl Lazar, el hahambashi de Rusiya.
Dos vezes al anyo, el Prezidente Poutine embiya una letra a los djudyos de Rusiya, amostrandose konosedor en el sentido de las fyestas djudiyas. Los gazeteros rusos djudyos fueron tresalidos i enkantados por sus konosensyas, por egzemplo sovre Hanuka i el sentido de esta fyesta.
I kuando Poutine avlo kon Netanyau en Paris, ay unos kuantos diyas, para la Cop 21, le dezeo buenas fyestas de Hanuka, avlandole de esta fyesta, viktorya de la luz kontra la eskuridad. Avlando ansina, no avlava al israelyano, ama al djudyo.
Asigun el direktor del Sentro Hesed de Moskva, kada elevo del sistemo skolaryo ofisyal tyene de vijitar el sentro kultural djudyo ande el governo ruso metyo 60 milyones de dolares. Los elevos se ambezan la istorya del puevlo djudyo, i las bazas del djudezmo.
Esto dicho, Laly Derai mos dize ke el antisemitismo es yene muy fuerte en Rusiya, i ke los djudyos pensando azer aliya son mas i mas. Ama esto vyene de la situasyon ekonomika del pais, i no de la politika del governo, ke es muy favoravle a los djudyos.
En la entrevista kon Tsvi Magen, el espesyalisto de la Rusiya, Israel tyene un problema: de una parte, es enemigo desde syempre kon Bashar el Assad, indimas kuando tyene por aliados el Hezbollah i el Iran, dos enemigos mortales de Israel. I es kon estos ke la Rusiya es aliada. De otra parte, Israel no tyene dinguna simpatiya para Daesh, aliado kon el Hamas, otro enemigo mortal de Israel.
Israel tomo un akodro techno-taktiko kon los Rusos, para ke el ayudo kontra Daesh no vaya a aharvar a Israel. Binyamin Netanyau se fue a Moskva kon su kapo de Estado Mayor, rav aluf en lashon, unos diez diyas antes ke los Rusos empesen sus primeros atakos aeryanos, para ke no ayga insidentes entre los avyones rusos i los israelyanos.
Asigun Magen, Poutine a prometido ke su aliansa kon estos diavlos (Assad, Hezbollah, Iran) no sera kontra Israel, i ke va azer dikat sovre este punto.
Esto dicho, Poutine a instalado sovre la kosta de Syria misiles S-400 ke pueden aharvar kualkyer lugar en Israel, i por siguro esto no aze muncho plazer a Israel.
De otra parte, Poutine kyere djugar un rolo en el konflikto israelo-palestinyano, i dinguno puede saver lo ke va salir de esto…
Lo ke ambezi agora es ke Netanyau avlo antier martes al telefon kon Poutine , i ke se metyeron de akodro para luchar en djuntos kontra el terrorismo. Esto se tuvo solo tres diyas despues de la muerte de Samir Kuntar, un kapo del Hezbollah, i en mizmo tyempo un asasino, entre otras viktimas, de une kriatura djudiya de kuatro anyos, aharvandola a la kavesa kontra una pyedra asta ke muera. Aviya sido djuzgado, kondenado, metido en prezo, i liberado kontra los puerpos de dos askeres de Tsahal.
Asigun la radyo del Hezbollah, Samir Kuntar se muryo por el bombardamyento de la kaza ande se topava en Syria, i este bombardamyento seriya, asigun el Hezbollah, echo por avyones israelyanos. Israel no dize nada, ama los rebeldes syryanos, eyos, dizen ke son eyos ke mataron a Kuntar.
Yene todos pensan ke es Israel ke kijo amostrar a todos de era kapache de aharvar ande kyere i kuando kyere. Los arabos son en birra kontra los Rusos ke, sea no pudyeron, sea no kijeron, impedir la operasyon israelyana.
En vedra, kale atorgar ke la situasyon es bastante entrafikada para los Rusos: kyeren sostener al governo de Syria i al Iran. Bueno. Ama el governo de Syria es sostenido tambyen por el Hezbollah, amigo del Iran. Poutine save muy byen ke el Hezbollah es una organizasyon terrorista, i ke ansina los rusos sostyenen a terroristos islamikos. Si, ama la Rusiya sufre eya mizma del terrorismo islamiko. Por esto lucha kontra Daesh. Luchar kontra Daesh i ayudar al Hezbollah, no es koza lojika, i asigun mi los rusos ya entendyeron ke esto no va pueder surear muncho tyempo, i ke tendran se eskojer entre amigos i enemigos.
No es kolay tampoko para Israel. Por siguro no kyere a Daesh. Ama Daesh mata kadal diya ombres del Hezbollah i lo aflaka ansina. Mata tambyen a los zabites de Iran. Daesh asta agora no toko a Israel, toko a sus enemigos…
Esto todo es bastante entrafikado. Ama ke dizir de las relasyones entre Israel i la Turkiya…
No tengo menester de akodrarvos, a vos keridos oyentes ke sosh kaji todos orijinaryos del imperyo osmanli, ke las relasyones entre los djudyos i los turkos, mismo si no fueron syempre al mijor, fueron yene muy buenas desde la Edad Medya asta 1942 i el varlik vergisi i la deportasyon de munchos djudyos turkos de Evropa abandonados por la diplomasiya turka. Despues de 1944, se puede dizir ke fueron de muevo buenas, sin olvidar yene los evenimyentos del 6 de septyembre 1955. La venida al poder de un governo islamiko dyo espanto a los djudyos turkos, ama yene las relasyones kedaron bastante buenas.
Por lo ke es del Estado de Israel, uvo, vamos a dizir, altos i bashos. A la kontra de los otros estados muzulmanes, la Turkiya rekonosyo el Estado de Israel, de facto en 1949, de jure en 1950, lo ke se puede dizir kaji desdel empesijo.
En 1958, Ben Gurion firmo kon Menderes un akodro de kooperasyon, i mismo kuando la Turkiya se aserko de sus vizinos arabo-muzulmanes, mismo si la Turkiya voto a la ONU el retiro de Israel de los territoryos okupados en 1967, no kijo rekonoserlo komo agresor, ni romper kon el las relasyones diplomatikas.
Estas buenas relasyones entre la Turkiya kemalista i Israel se konfirmaron en 1996 kon dos akodros de kolaborasyon entre las armadas de los dos paizes, ke aziyan manovras en djuntos.
En 2002, Israel i la Turkiya firman un akodro ke la Turkiya va vender 50 milyones de tonas de agua por anyo durante 20 anyos, por un presyo de kaji un milyarda de euros.
En novyembre 2008, Erdogan anunsya ke gaz ruso va pasar por Turkiya i Israel para alimentar la Indya.
De otra parte, la Turkiya se entremete en 2005 para ayudar a un aserkamyento entre Israel i Pakistan.
De la misma manera, en 2008, se entremete entre Israel i Syria.
Las relasyones se van a bozdear entre Israel i Turkiya kuando Israel empesa kontra el Hamas en Gaza la operasyon dicha plomo fundido, ke va surear del 27 de desyembre 2008 astal 18 de janvier 2009.
Erdogan se mete en birra kontra Israel, i unos kuantos diyas despues, el 29 de janvier, en la Konferensya de Davos, delantre de todos los gazeteros, se arravya en publiko kontra Shimon Peres, Prezidente del Estado, ke le responde, en buen djudyo, por una kuestyon: “kualo uvyera echo la Turkiya si kadal diya el Hamas le echava roketas sovre Estambol?” Erdogan se alevanta i se va sin responder.
Desde este diya las relasyones se embatakan mas i mas. En mayo 2010, organizasyones antisyonistas, turkas i otras, embiyan vapores para enforsar el blokus de Gaza. Israel se opone, i sovre el vapor Mavi Marmara, 10 turkos son matados por los askeres Israelyanos.
Esto va derrokar las relasyones entre los dos paizes. De toda manera, los zabites poderozos i laikos de la armada turka, ke fue durante anyos el haliz poder en Turkiya, an sido echados en prezo por Erdogan. Eyos eran ke entreteniyan la amistad kon la armada israelyana. Erdogan dize ke nada podra rekalentar las relasyones entre los dos paizes si Israel no prezenta ekskuzas. Israel kyere byen eksprimar regretos, ekskuzas no
Vyendo esto, Israel se aserka de la Gresya, por lo ke es de la kooperasyon militar.
Malgrado esto, en desyembre 2010, la Turkiya embiya dos avyones bombarderos de agua para luchar kontra el fuego del Monte Carmel.
Esto mos amostra ke afillu el konflikto entre los dos paizes sovre la Palestina, el komersyo i el ayudo no kedaron, afillu si, en septyembre 2011, Erdogan anunsya la suspensyon de sus relasyones kon Israel en el dominyo militar. Este mismo anyo 2011, Israel i la Turkiya aviyan tomado un akodro asigun el kual Israel va vender a la Turkiya armas de defensa elektronika por 25 milyones de dolares.
Ama Erdogan el mismo dize ke lo ke es sospendido son los akodros militares, no los akodros komersyales.
Las kozas no se pueden enderechar kon la operasyon Pilar de defensa en novyembre 2012 kontra el Hamas en Gaza.
I portanto, parese ke Israel tyene un grande menester de la amistad turka, porke en fevrero 2013 Israel embiya a la Turkiya las armas del akodro 2011, i el 22 de marso, Netanyau, komo se dize en fransez, kome su chapeo, i yama a Erdogan, para prezentarle ekskuzas por la muerte de los diez turkos, ama Erdogan kyere tambyen una indemnizasyon i de alevantar el blokus sovre Gaza.
Israel, syendo ke prezento ekskuzas, no es kontra una indemnizasyon, ama alevantar el blokus es otra koza. Sin blokus, los terroristos del Hamas van a resivir armas, i esto Israel no lo puede achetar.
En 2014, es la operasyon frontera de proteksyon en julyo, ama antes, en mayo, una corte kriminala de Estambol kondena in absentia a 4 zabites israelyanos i demanda a Interpol ke sean aferrados.
Malgrado esto todo, los dos paizes, Israel i Turkiya, tyenen menester el uno del otro. Israel, arrodeado de enemigos mortales, tyene menester de un alyado militar i ekonomiko. Por su parte, la Turkiya se metyo a mal la Rusia kon este avyon abatido por los turkos. I mos ambezimos ke el 16 de este mes de desyembre, akodros sözde sekretos, ama no tan sekretos syendo ke se topan en todas las gazetas, an sido tomados en Zurich en Suissa entre Israel i Turkiya. Asigun lo ke meldi, va aver de muevo embashador en kada pais, las segidas kontra los zabites israelyanos van a ser abandonadas, Israel va pagar 20 milyones de dolares a las famiyas de las viktimas del Mavi Marmara, Saleh al Aruri, el ke izo matar a tres mansevikos israelyanos en 2014, sera echado afuera de Turkiya. I los dos paizes van a kooperar por el gas. La Turkiya puedra merkar el gas israelyano, i un pipeleine pasara por la Turkiya verso los paizes de Evropa.
Aki tambyen, kualo va salir de esto todo, no se puede saver, i yo so kontente de no ser un responsavle politiko en Israel, porke dirijirse en un kamino tan entrafikado, no se komo aze un Netanyau para durmir…
Artículos Relacionados: