Si no arivo a pintar todo lo ke yo veo
Komo puedre ser un pintor komo lo deseo?
Kuando veo una lagrima en kara palida
La pena me s’esta gravando por toda la vida.
Si oyo suspiros de alguno en dezespero
Yo abatido , mis ojos nuvlados sin kererlo.
Kon ke kolores puedo mis sentimientos pintarlos?
Kon ke sentidos yo arivare a ekspresarlos.
Estos dezeos no se pueden mostrar kon kolores,
Los dramos,los amores,l’umanismo y dolores.
Por esto ahora kedi leshos de la pintura,
Me konsolo kontamplando los sielos,la natura.
Esta satisfaksyon la topi en las poesias,
Hago sentir gritos silansyozos todos los dias.
Hay korazones ke toman lisyones meresidas,
Arebiven las humanidades desaparesidas.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: