Ulus Özel Musevi Lisesi – El liseo djudio de Estambol

Por:
- - Visto 710 veces

El liseo djudio de Estambol fue avierto en el anyo eskolario 1914-1915 kon el nombre de Midrasha Yavne, en la kaye Yemenici, grasias a la kontribusion de dos de las figuras mas sovresalientes del djudaizmo de Turkia en akeya epoka: Jozef Niego i Dr. David Marcus.

Aun ke ya existian eskolas primarias, ke azian parte de la Alliance Israelite Universelle,i ke eran sostenidas kon fondos de afuera del paiz, para la komunidad djudia de Estambol, ke keria dar una mijor edukasion a sus ijos, la fondasion de un liseo djudio fue komo la realizasion de sus dezeo de alma.

La Midrasha Yavne, ke kurto tiempo despues de su fondasion troko su nombre al de Liseo Djudio Bene Berit, i en turko Beyoğlu Özel Musevi Lisesi, fue tambien el primer i uniko liseo djudio fondado kon el ayudo i la kontribusion finansiaria de la komunidad de Estambol, sin el ayudo de faktores eksteriores.


Los dos “arkitektos” de esta eskola seran akodrados siempre kon respekto i apresiasion por aver aregalado una tala institusion edukativa a la djoven jenerasion djudia d’Estambol.

Jozef Niego nasio en 1863 en Andrinopla, oy la sivdad de Edirne. Guerfano de su muy tierna edad, fue embiado a estudiar en el “heder” i despues en yeshivot, basho la surveyansa adekuada de su tio, el gran rabino de esta sivdad Rabi Refael Behmuaras. Kon la aviertura de la eskola de la Aliansa en Edirne el paso a estudiar ayi i despues del ezbrochamiento de la gerra entre Turkia i Rusia, en 1876, el paso djuntos kon su famiya a bivir en Estambol ande kontinuo sus estudios en la Aliansa de esta sivdad.

A la edad de 15 anyos el fue embiado a estudiar a la “Ecole normale Israėlite Orientale” en Paris. La Alliance Israelite Universelle ke en 1870 avia establesido en Yafo la eskola agrikola “Mikve Israel”, tenia menester de un agronomo profesional para dirijirla. Jozef Niego fue embiado a la Fakultad de Agronomia en Montpellier, Fransia, ande termino sus estudios kon grande sukseso.
En 1886, Niego yego a Erets Israel komo el primer agronomo djudio en Palestina i fue nominado al posto de vise direktor de Mikve Israel.

Desde 1891 asta 1909, durante un periodo de 18 anyos, el kumplio el posto de direktor de esta institusion, ayudo al dezvelopamiento de la agrikultura en Palestina i importo de Australia arvoles de eukaliptos para sekar los bataklikes.
En 1904 el yego a Estambol i kon la aviertura de la Midrasha Yavne el fue enkargado kon el posto de direktor de esta institusion entre los anyos 1914-1917.

El segundo fondador de este liseo fue el instruktor, filozofo, psikologo i rabino, Dr. David Markus. El nasio, a la vista, en 1871, en la sivdad de Novograd, en Rusia, estudio en una yeshiva de la kuala fue graduado kon el titolo de rabino i en desparte de esto kumplio tambien estudios universitarios en psikolojia, pedagojia i filozofia. Sovre la envitasion de la komunidad eshkenazi en el Imperio Otomano, en 1900 el yego a Estambol ande fue nominado komo el lider de esta komunidad i kumplio el posto de direktor en el liseo Goldschmidt ande se ensenyava en alman.

En 1914 el se djunto a Jozef Niego en los esforsos para la aviertura del liseo Benei Berit en Estambol i fue el direktor de esta eskola entre 1922-1940, anyo en el kual se retiro en pension.

La Benei Berit avrio sus puertas kon tres klasas i 23 elevos ma asta la fin del primer anyo de estudios sus numero ya avia pujado a 80.

Asta el anyo 1937 el programa de estudio del liseo djudio era bazado sovre el del liseo Galatasaray (ke se topa asta oy dia en el kuartier de Pera), ke era en su mayoria, en fransez. Empesando de aki, komo lengua prinsipal de las lisiones fue adoptada la lengua del paiz, el turko. En el anyo eskolar 1962-1963 fueron aviertos los departamentos de literatura i sensias; a partir de los anyos 1964-1965, en desparte del fransez fue adjustado el inglez tambien komo lengua ajena. En la Benei Berit se ensenyava i se ensenya asta oy el ebreo tambien.

Grasias a los donos de un grupo de filantropos i ombres de negosio de la komunidad djudia de Estambol, enkavesados por Bernard Nahum, ansi ke al ayudo de la komunidad eshkenazi de la sivdad ke izo dono de un terreno en el kuartier de Ulus, pudo ser konstruido el muevo edifisio de esta eskola ke oy reune basho su techo un jardin de kreaturas, lo ke era la eskola primaria de l’Aliansa (Birinci Karma Ilkokulu) i el liseo Benei Berit.

Esta eskola ke al ser fondada avia sido yamada Midrasha Yavne, troko despues su nombre al de liseo Benei Berit, en segito al de Beyoglu Özel Musevi Lisesi ( Liseo djudio privado en Beyoglu); en 1994, pasando a su muevo edifisio en Ulus su nombre fue trokado al de Özel Musevi Lisesi (Liseo djudio Privado) i en fin, en 1998, fue adoptado su nombre de oy: Ulus Özel Musevi Lisesi (Liseo Djudio Privado Ulus).

Este liseo se distinge oy por ser una institusion de un muy alto nivel. Munchos son los elevos ke terminaron esta eskola i fueron akseptados a universidades de grande nombradia en Estados Unidos, para sus estudios akademikos.
Una de las karakteristikas de este liseo en el tradisional “Börek Günü” (el Dia de börek – koza de orno a baza de fila), al kual son envitados, kada anyo, en la segunda semana del mez de Marso, todos los graduados de la Bene Berit a lo largo de los anyos, a enkontrarsen i pasar endjuntos, unas kuantas oras agradavles.

A la seremonia de fin anyo 2009-2010, durante la kuala 47 elevos resivieron sus diplomes, partisipo oganyo el ministro de la edukasion de Turkia Nimet Çubukçu, ke felisito a los graduados i ekspreso su kontentes por aver tomado parte en este dia tan importante para los elevos ke terminaron una faza de estudios en sus vida.


Uno de los elevos del liseo ke termino
sus estudios resiviendo su diploma.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: