Saludes i anyada sivil buena para todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 23 de janvier, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.
Komo vo lo dishe al kavo de mi ultima emisyon, la del 28 de desyembre, no pude azer emisyon el djueves pasado syendo ke teniya de guadrar i divertir mis inyetizikos este diya ke era dainda vakansas para eyos, ama no para sus padre i madre.
I agora ke 2017 ya mos s’eskapo, i komo a mi uzo desde unos kuantos anyos, vino el tyempo de akodrarmos en djuntos de las 32 emisyones ke vos ize durante este anyo 2017. Los ke son interesados de topar el teksto de mis emisyones lo podran (salvo una, la del 29 de junyo ande tuve una entrevista en franses kon Alain de Toledo) indosen sovre los sityos de Ladinokomonita (por esto kale ser o azerse myembro – es de baldes i vo lo akonsejo muncho) i bushkar los files a mi nombre Edmond Cohen) o de eSefarad (i tambyen aya bushkar los eskritos a mi nombre).
Esto dicho, la primera de mis emisyones de 2017, el 5 de janvier, fue para azer, komo oy, la rekapitulasyon de mis 38 emisyones de 2016.
El djueves de despues, 12 de janvier, vos avli de los gizados muestros, empesando antes por la eskapasyon de la emisyon del 22 de desyembre 2016 sovre Regine Skorka Jacubert, rezistante djudiya i deportada en Auschwitz, i despues dishe unos kuantos byervos sovre el kantador i autor de kantikas, Pierre Barouh, ke muryo el 28 de desyembre 2016. En kuanto a muestros gizados, dishe, i so siguro ke pensash lo mizmo, ke muestros gizados son los mijores de todos…
El djueves de despues, 19 de janvier, vos avli de Vladimir Zeev Jabotinsky, gazetero, militar, ombre politiko i eskrivano, muerto a sesenta anyos en 1940 en los Estados Unidos. Es el fundador del movimyento revizyonisto, kijo dizir la derecha de los syonistos, la ke se topa agora al poder en Israel kon Binyamin Netanyau komo primo ministro. Sufriyo de la misma malediksyon ke Cassandra ande los Gregos, ke veiya de antes solo las desgrasyas, las anunsyava, i dinguno la kreiya ni la eskuchava. Jabotinsky obtuvo en 1936 el akodro de la Polonya, de la Hungariya i de la Rumaniya para deshar fuir sus djudyos en Palestina. Son los djudyos ke no kijeron…
El djueves de despues, 26 de janvier, no ize emisyon, syendo ke me topava hazino al oshpital, ama el djueves de despues, 2 de fevrero, pude azer mi primera emisyon (sovre tres) avlando de la poeziya djudiya, i por empesar la del Tanah: en la Tora el kanto de los ebreos despues de pasar la Mar Kolorada, en los Neviim kaji todo, en los ketuvim los Teilim o el Cantar de los Cantares…Despues avli de la poeziya djudiya relijyoza despues del Tanah, de los Piyutim en muestras orasyones.
El djueves de despues, 9 de fevrero, kontinui sovre la poeziya djudiya, la de la Edad Medya, ama esta vez la ke no era relijyoza, kantes de bever o de amor. Este amor puede ser tambyen el amor de la Tsion, komo los kantes de Yehuda Halevi. Ama antes de Halevi uvo el famozo Moshe Ibn Ezra, i un primiko suyo, Abraham Ibn Ezra. Avli tambyen de Shlomo Ibn Gabirol, i despues avli de poetas djudyos de toda parte de Evropa ke eskrivyeron kada uno en su lingua, Heine, Edmond Fleg, Jabotinsky…
I el djueves de despues 16 de fevrero ize mi tresera i ultima emisyon sovre la poeziya djudiya. Empesi por meldar en entero mi traduksyon de la poeziya anonima eskrita en la Edad Medya en onor de los 13 djudyos kemados bivos en la sivdad de Troyes (la sivdad de Rashi) el 24 de avril 1288.
I de estos tyempos trajikos pasi a otros peores, los de los pogromes i de la shoah. Meldi una poeziya de Haim Nahman Bialik kon los pogromes, i una de Itshok Katzenelson travada de su Kante del puevlo djudyo atemado. Esta vez no so yo ke ize la traduksyon, es un eskrivano katalan, Arnau Pons.
Despues meldi una famoza poeziya de Nathan Alterman, La tavla de plata, i para trokar de este todo apretamyento de korason, meldi una poeziya de amor de Zalman Shneour. I eskapi mi emisyon kon los poetas eskrivyendo en djudeo-espanyol, entre los kuales uno ke mos desho la vida aze poko, el kerido Haim Vitali Sadacca.
El djueves de despues 23 de fevrero, no pude azer emisyon, no porke era hazino, ama porke teniya de guadrar mis inyetizikos.
El djueves de despues 2 de marso, ize una emisyon kontando lo ke fue este terrivle diya del 6 de junyo 1944, the D Day, el diya tan asperado por mozotros los djudyos enserrados, eskondidos, ke kosto la vida a miles de askeres de munchos paizes, ama sovre todo amerikanos bendichos, venidos para salvarmos. Lo ke konti, es ke malorozamente las kozas no se pasaron asigun el plano de los Amerikanos, sovre todo porke la mar era muy fuerte. De tal manera ke muy munchos de los poveretos askeres amerikanos, echados en la mar kon armas pesgadas, sea se aogaron, sea fueron matados por las mitrayadoras almanas antes de pueder tokar la tyerra de Omaha Beach. Nunka se podra olvidar el sakrifisyo de estos ombres. Si yo bivo agora, es grasyas a eyos todos.
El djueves de despues, 9 de marso, ize una meldadura del Meam Loez kontando komo Morderhay ordeno a Ester de ir a ver al rey Ahashverosh para ke troke su dekreto de matar a todos los djudyos.
El djueves de despues, 16 de marso, avli por empesar de la muerte de los diez kapos nazis djuzgados en Nuremberg i enforkados komo lo fueron los diez ijos de Aman asigun la megila de Ester. I despues avli de Joseph Kessel, ke no solo fue a la vez eskrivano i gazetero, ensima fue el autor kon su sovrino Maurice Druon de las palavras de uno de los mas ermozos kantes fransezes, el Kante de los Partezanos.
El djueves de despues, 23 de marso, despues de tener avlado del fotografo israelyano David Rubinger i del bundisto franses Henri Minczeles, avli del famozo haham Rav Nahman de Bratslav, ke bivyo solo 38 anyos, entre 1772 i 1810. Desho un nombre famozo ande los Hasidim, i asta oy tyene dishiplos ke vyenen kada anyo en Ukranya para onrar su memorya.
El djueves de despues 30 de marso, empesi de avlar de lo ke se yama los livros deuterokanonikos, kijo dizir livros eskritos por djudyos, resividos por los katolikos komo azyendo parte del “Antiguo Testamento”, komo yaman el Tanah, ama no resivido por los djudyos komo azyendo parte del Tanah. Tuve de azer tres emisyones en sira sovre estos livros: en esta emisyon ke fue la primera, avli del livro de Judith, del livro de Tobiya, de los dos livros de los Makabim, del livro de la Savidurya, del livro yamado Eklezyastiko, (de no konfundir kon el Eklezyastes, ke yamamos Kohelet, i ke, el, se topa en muestro Tanah) i del livro de Baruch.
El djueves de despues, 6 de avril, despues de tener avlado del grande poeta ruso Evtushenko, autor, entre otras, de la famoza poeziya Babi Yar, i ke muryo pokos diyas antes, kontinui sovre los livros deuterokanonikos, avlando de kuatro pedasos del Livro de Daniel, sovre todo los kapitulos 13 i 14, ke no se topan en el Tanah.
El djueves de despues, 13 de avril, kayendo en Pesah, no ize emisyon, i es el djueves de despues, 20 de avril, ke ize mi tresera i ultima emisyon sovre los livros deuterokanonikos. Avli del livro 14 de Daniel, i de las istoryas kontadas en este livro. I despues avli de los diez pedasos del Livro de Ester ke se topan en las Biblias katolikas, ama no en el Tanah.
Los dos djueves de despues, 27 de avril i 4 de mais, ize por de muevo las dos emisyones ke ya teniya echo diez anyos antes, sovre la Rebuelta del Ghetto de Varsovia, una de las istorias las mas gloryozas i trajikas de muestro puevlo djudyo. La sigunda semana, komo yo era abashamyentado i ronko, es mi amigo Renaud Souhami ke izo la meldadura.
El djueves de despues, 11 de mais, avli de Lag Baomer, lo ke kyere dizir esta fyesta del 33er diya del Omer, entre Pesah i Shavuot. Me ayudi por esto de un artikolo del haham Pinhas Stolper.
El djueves de despues, 18 de mais, despues de dizir dos byervos sovre el aktor Victor Lanoux, empesi una muy larga meldadura ke me tomo 8 semanas espartidas astal kavo del anyo, de un artikolo sovre la etika djudiya, trasladado i adaptado al franses por el haham François Garaï de un artikolo eskrito en ingles por el haham liberal John D. Rayner. En esta primera emisyon, meldi sovre todo lo ke trata de la etika de la persona.
El diya de despues, 25 de mais, despues de tener avlado de la mueva ministra de la salud, Agnès Buzyn, de su madre Etty i de su padre Elie, ke fue deportado en Auschwitz i sovrebivyo, kontinui mi meldadura sovre la etika djudiya, i, despues de la etika de la persona, la etika sosyala.
El djueves de despues, primo de djunyo, no ize emisyon syendo ke era el sigundo diya de Shavuot.
El djueves de despues, 8 de djunyo, empesi de avlar de Yerushalayim, entera konkistada djusto sinkuenta anyos antes, i de la matansa de Sarah Halimi, i despues, kontinui mi meldadura sovre la etika djudiya.
El djueves de despues, 15 de djunyo, no pude azer emisyon syendo ke teniya de guadrar mis inyetizikos, i el djueves de despues, 22 de djunyo, empesi por onrar la memorya de un Djusto, el diplomato suiso Carl Lutz, ke reusho, kuando estava en Budapest, de salvar unos 62.000 djudyos. I despues kontinui mi meldadura sovre la etika djudiya, en su parte sosyala.
El djueves de despues, 29 de djunyo, arresivi Alain de Toledo, prezidente de la asosyasyon Muestros Dezaparesidos, ke vino avlar del salon del livro djudeo-espanyol, ke deviya tenerse (i se tuvo) el 3 de septyembre a venir.
Despues, astal djueves 7 de septyembre, fueron las vakansas de enverano, i no ize emisyones. El 7 de septyembre, ize una primera emisyon sovre los ke mos desharon este enverano, i por empesar la grande Simone Veil, ke mos desho la vida el 30 de djunyo, ke fue ministra i akademisyana, prezidente del Parlamento evropeo, prezidente de la Fundasyon por la memorya de la Shoa (fue deportada en Auschwitz) i ke mos aviya echo el grande onor de venir avlarmos en marso 2003 a la inogurasyon de la laja en djudeo-espanyol en el momumento de Birkenau.
Este mismo djueves, avli tambyen del aktor amerikano, Martin Landau, i de muestro amigo el poeta djudeo-espanyol Haïm-Vitali Sadacca. Meldi un artikolo en su memorya eskrito por Rachel Bortnick, fundadera i kapo de Ladinokomunita.
El djueves de despues 14 de septyembre, tuve de kontinuar sovre los ke mos desharon este enverano, i empesi por un otro aktor amerikano, Jerry Lewis. I despues, komo lo teniya aprometido el djueves de antes, meldi unos kuantos poemas de Haïm Vitali Sadacca en su memorya. I despues meldi tambyen un poema i un artikolo de Gracia Albuhaire, una poeta bulgara ke mos desho tambyen este enverano.
El djueves de despues, 21 de septyembre, no uvo emisyon por modo de Rosh Ashana, i el djueves de despues, 28 de septyembre, ize una emisyon sovre los djudyos en las Brigadas Internasyonales durante la Gerra de Espanya, en jeneral, i en partikolar sovre la Kompaniya Naftali Botwin, ke era entera djudiya (salvo dos komunistos arabos de Palestina) kon una bandyera esrita en parte en yidish, un kante en yidish, una radyo i una gazeta en yidish, ets.
Los dos djueves de despues, 5 i 12 de oktovre, no uvo emisyon por modo de Sukot i Shemini Atseret. I el djueves de despues, 19 de oktovre, kontinui mi meldadura sovre la etika djudiya, esta vez de la famiya i de la edukasyon.
El djueves de despues, 26 de oktovre, kontinui esta meldadura kon la etika de la ekonomiya, i despues medikala, de las gazetas, i legala.
El djueves de despues, 2 de novyembre, despues de avlar del omenaje al Profesor Sephiha ke deviya tenerse (i se tuvo) el 19 de novyembre en el kal de la Roquette, avli de la larga istorya de los djudyos del Yemen, del tyempo ande aviya reyes djudyos en el Yemen de los anyos 400 i 500, asta ke fueron ovligados de fuir el pais en 1948.
El djueves de despues, 9 de novyembre, no pude azer emisyon, syendo en viyaje, i el djueves de despues 16 de novyembre kontinui la istorya de los djudyos del Yemen, avlando de la operasyon Tapet bolando para azerlos fuir del Yemen djusto al empesijo de la gerra de 1948, i de lo ke se paso una vez en Israel.
El djueves de despues, 23 de novyembre, kontinui mi meldadura sovre la etika djudiya, esta vez la legala.
El djueves de despues, 30 de novyembre, avli de la grande aktrisa franseza de teatro ke fue Sarah Bernhardt.
El djueves de despues, 7 de desyembre, ize una meldadura del Meam Loez sovre sesh pesukim del kapitolo 39 de Bereshit, ke kontan komo Yosef se topo syervo en Ayifton, en la kaza de Potifar, sinklavo de Paro. Este pedaso de la perasha Vayeshev fue el ke meldi para mi bar mitsva en desyembre 1949…
El djueves de despues, 14 de desyembre, tuve de avlar de Josy Eisenberg, de Jean d’Ormesson i de Johnny Halliday ke se fueron uno detras del otro, i de la deklarasyon del Prezidente Donald Trump sovre Yerushalayim, kapitala de Israel.
El djueves de despues, 21 de desyembre, no pude azer emisyon, syendo muy okupado por mis echos (afillu si so retirado), i el djueves 28 de desyembre, ultimo djueves del anyo, eskapi mi meldadura sovre la etika djudiya, i meldi dos poeziyas de Haïm Vitali Sadacca.
I kon mis mijores dezeos para el muevo anyo sivil, vos digo al djueves ke vyene, si kyere el Dyo!
Artículos Relacionados: