Era antes ochenta anyos,yo una kriatura
Una vivyenta sin arimo,una vida muy dura,
Subito un orden vino”los judios debian irsen
Los ricos eran en aparejos de alesharsen.
Solo kuatro dias de tiempo lo ke mos dieron,
Eran sin piadad komo enimigos mos vieron.
Mi madre triste,ken mos iva dar una mano?
Esperando kon tremblor,sin padre i sin ermano.
Kualo eran nuestros pekados ?Nunka lo supimos,
A ninguna demanda repuestas no tomimos.
Los dirijentes d’akel tiempo vengar se kijeron
La razon d’este grande kastigo no mo la disheron.
Kitimos nuestras vyejuras por debarasarmos,
Delantre la puerta de las kazas i alivyanarmos.
Las noches sin dormir, el dia no vide ke uno ria,
A kalejas de feria se konvertyo la Juderia
Los paisanos profitaron en estos kuatro diyas
Kompraron por debaldes muebles ,kamas i siyas.
Para eyos un loto,para mozotros komo luto
Una bivienta insegura,sin futuro i sin buto.
Subito otro orden mos salvo d’akeya vida,
Kalmaron nuestras angustias,olvidimos la ida.
Malgrado la alegria kedimos kon korazon roto,
Un regalo de los sielos lo apresyimos komo loto..
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: