La guerra continua con su amargura,
No hay alegria, no hay pan ni artura,
Los soldados pelean siempre con la muerte,
Son condanados a bivir esta vida fuerte.
Ke negra suerte tienen sus kriaturas
De verlas abatidas con vidas tan duras.
Todas biven medyas hambiertas y sin kuras.
Yoros tristes y lagrimas en sus figuras.
Con las bozes de tiros son acompanyadas
Las vidas de estas almas siempre danyadas.
Vyejos, paridas,enfermos en mismas salas
Eskondidos por fuirsen de horas malas.
Donde kedo el respecto al humanismo?
Estos barbaros son culpavles de racismo .
Calles, campos yenos de muertos y feridos
Dejando en luto las kazas, los queridos.
Dio mio, castiga estas escuras almas
Que corren detras de odios y malas famas.
Hambierturas,tristezas seran sus herencias
Las bivdas y huerfanos quedan sin querencias..
Esto borracho dia y noche por calmarme
Las trajedias empesaron a matarme ,
No puedre bivir en un mundo salvaje
Alejarme d’esta vida lo vale kaje …
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: