2020

Por:
- - Visto 207 veces

Ke mos kedo aki para fiestar la mas grande fiesta del mundo entero, de todo los payizes i no importa de kuala relijyon es el payis  ?!!!!  Ni se porke lo fiestan !!!  Ma es una GRANDE Fiesta…. El kalendaryo Kristiano va pujar de otro un anyo !  Unos dizen ke es la fiesta de Jesus ke tuvo su birkamila al ochen diya de su nasimyento.  Mozotros fiestamos un muevo anyo ke va empesar el primo de Enero otra vez.  Muevo anyo, muevo mazal. Engrandeser de 1 anyo, maraviya para los de  17 anyos ma  kualo dizir por los ke ya tienen  70 ?  Estos ya tremblan de espanto pormodo ke se esta aserkando la muerte,  la fin de gozar de todo lo bueno ke el mundo este mos ofrese malgrado ke ay i penas por sierto.  Ma es horas de fiestar i no se pensa ni a las frustrasyones, ni a las hazinuras, ni a los ke asombran muestros diyas !  El solo biervo  “Fiestar” ,  el  “reveillon”,  ya mos inche de felisitad, de una alegriya i de la certeza de un divertimiento ke mos aspera !

Por seguro ke los tiempos trokaron i oy todo es diferente de los anyos de muestra manseves.  En akeyos tiempos pensavamos a kualo  mos ivamos a vistir, komo mos ivamos a penyar ets… I lo mas importante ande ivamos a fiestar…..  Es el luxo, la kualitad de lo ke se serviya en las mezas, ke manera de divertimiento se aviya aparejado – los artistos ke ivan a partisipar –  ke teniyan un rolo en muestra desizyon… No egzistiya salir en lo yelado a la kaye kon un bokal de bevienta i arrekojarse un en sentro de la sivdad todos endjuntos, gritar, dezmodrarse, emborracharse echando chiyos a medya noche.  En el d’alkavo fin de anyo  23  delinquantes fueron mettidos en prezo por aver attakado ijikas, rovar, romper, travar kuchiyo i todo bueno !!!   Ande mozotros son los djihadistos barvudos ke no tienen toleransya a las mini fustas, i a la gente moderna ke biven libramente !…  Es sus frustrasyon lo mas ! No tienen la posibilitad de englenarsen (divertirsen) de la mizma manera de los ke lo azen. Son proves, non edukados, vienen de famiyas ‘tapadas’. El anyo pasado la polisiya lavoro muy seryozamente.

Las famozas illuminasyones aklararon los sielos de Istanbul tambien mizmo si era manko de Sydney, Honk Kong, Paris, Berlin, London, Time Square en New York i las otras grandes metropoles..


Uvyeron muevos nasidos, fuegos, aksidentes, asasinatos, los ke fyestaron en los sentros de ski, los ke entraron a la mar en Antalya i por seguro los partis organizados en las kazas en los grandes oteles, restaurantes i diskotekas.

Mas de sien mil personas, en el friyo buz de  la noche salyeron para ver las illuminasyones de los pontes del Bosforo. Los programes de la TV estavan bastante divertidos ma yo miri el show de TV5 en Fransya. La verdad es ke me enkantan estos ‘numeros’ ke Patrick eskoje de los mas grandes sirkos i shows del mundo… Estava echando vardas de plazer i de eksitamientoen en mi kantoniko bevyendo la likor de vijna ke ize kon mis proprias manizikas i las mandarinas del Supermerkado ! Kedi durmyendo, me esperti kon el bruido de la TV, otra vez durmi, otra vez me esperti, otra vez durmi…

Maraviya de Reveillon ! En estos tiempos, lo mijor por el Reveillon es de fiestar en kaza kon los keridos si se puede…. Para mi kada noche es Reveillon !

La otra kara del fin de anyo son los regalos !   Ay madre miya bendicha la lokura ke es eskojer, ir a topar, merkar los regalos para todos en no olvidandose uno !  I ke budgetto ay de menester para los fin de anyos !  No esto segura ke todos tienen la possibilitad de ser Santa Klaus malgrado ke el dezeo siempre esta.   Es un momento de grande eksitasyon de avrir los paketos vistidos de fiesta tambien i no importa muncho lo ke se topa aryento !  Mizmo si son chokolates o un chapeyo sharanfonfon de papel para akeya noche, para travar fotos ets….  Ay los ke regalan un telefon de la d’alkavo technologia tambien !  I deke no un otomobil de estos briyando komo una estreya ?   No ay kavo…. a las tonteriyas, a las fantaziyas i a la imajinasyon de kada uno i uno…

Yo vos auguro una noche yenna de estreyas en vuestro korason !   No es lo ke se aze i se arresive ke kavza la felisitad ma lo ke se siente, ver los keridos kon sorizas i resivir sus bezos i sus abrasos, sus buenos auguros ke savesh ke vienen de sus almas.  Una flor vale  mas de una villa en vezes !  I una propozisyon de matrimonio ? Dizir ke un bebe esta en kamino para adjuntarse a la famiya ?  Di-o, el Santo Bendicho, mos dyo innombrables okazyones para sintirmos los mas felises del mundo ! Allelluia…..

ANYADA BUENA, DULSE, FELIZ I KON SALUD KUMPLIDA PARA TODOS KE MELDARON ESTAS LINYAS, ISRAEL I EL MUNDO ENTERO !

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: