Komidas echas kon la aluenga de la vaka o del ternero (sigir ve dana) o mizmo del kodrero son muy savrozas i se uzan muncho en Israel en las fiestas, lo mas en Rosh Hashana porke aze parte de la kavesa – Rosh en Hebreo -,i en las fiestas familyalas komo las bodas, los barmitzvas ets… Deve de ser porke es un plato sharonfonfon, karo, i ke demanda muncho aparejo ets…
Buena ideya para azerlo en Rosh Hashana.. Deke no ? En Turkiya no tenemos este uzo. Kavesas enteras de kodredo al orno (kon el meoyo !) me namoro ! Esto kon un ic pilav (arroz kon yervas fnamente kortadas,, pinyones i uvaz sekas, espesas, i ilgado de gayna kortado en pedasikos chikos) es una komida maraviyoza por esta fiesta tambien.
LA ALUENGA SHARANFONFON !
Se lava bien la aluenga entera. Se koze la aluenga entera kon sal i tres sevoyas mundadas, en un grande tenjere (olla) fina ke se ablande enteramente. Kuaji hora i medya va abastar…. Se echa la spuma. Se kita la piel de manera fasil kuando la aluenga esta bien kozida. Se desha a yelar i se aparta la partida inferior (una karne muy savroza ke vamos a kortar para meterla en la supa). Se aze revanadas para servir la parte superior de la alunenga.
Guadramos la agua i azeremos una supa maraviyoza.
Para la supa kortamos finamente un poko de ajo (2-3 dientes)
Alimpyamos la karne ke apartamos de los guesos i de las partidas ke no mos gustariya komer i kortamos en pedasos. Estos pedasos se echan a la supa. En un resipiente azemos una meskla kon la yema de un guevo, el sumo de un limon kon una kuchara de vinagro, un poko de ajo rayado, pimienta preta, poka sal (porke ya ay sal e la supa) i dos kucharadas de arina. Lo deshamos kozer kon la supa a poka lumbre. Vos aspera una supa de Gan Eden !
Las revanadas se pueden empapear en una sos tomat
(En Israel es ansina ke lo preparan)
Aluenga kon avramilas es lo ke yo ago !
Salud i beraha
Artículos Relacionados: