Diario Judío México - BALAT es un barrio en los bodres del HALIC, The Golden Horn, EL KUERNO DE ORO komo lo yaman los etranjeros. Lo mas de los Judyos de la vieja kapital (Konstantiniye) moravan en este kartye i en sus entornos komo FENER, HASKOY, AYVANSARAY ets. antes ke PERA, GALATA, ORTAKOY, KUZGUNCUK seyan los lugares de morada populares de los Judyos de Istanbul.
BALAT tuvo su epoka la mas gloryoza en el Siglo 17. Empeso a peryer su briyo en los Siglos 18 i 19 dospues de los grandes fuegos. Las famiyas no tuvyeron otro remedyo ke deshar sus vizindados para bivir en otros kartyes mas modernos en akel tiempo. Ademas, vemos ke los bodres del HALIC peryiyan sus popularitad komersial.

Era uno, sino el mas grande, de los kartyes los mas en vista des de la epoka del Imperyo Bizantino. Munchas Sinagogas i Eglisyas, hammames, negosyos, el merkado i mas, aziyan de este grande barrio un sityo muy importante de punta de vista sosyo-ekonomiko i kultural.
Antes la yegada de los Judyos Sefaradis en 1492 de Espanya, en 1497 del Portugal, de la Italya i tambien de los Balkanas mas tadre, moravan en esta rejyon los Judyos Romaniotes i les fue muy fasil de asimilarsen los unos a los otros en kurto tiempo.
Se pueden vijitar sityos de grande interes en Balat i en sus entornos.
1. El komplex del Patriarko Ortodokso ke egziste desde 1602 i fue restorado en 1800. Inkluye una eglisya i todos los lugares uzados por el Patriko, las guertas i una kamareta serrada ande fue enforkado el Patriko porke kollaborava kon la Gresya ke luchava por su independensya en 1821. El Patriko aviya ademetido su delito. Es posivle de vijitar tambien los trezoros relijyozos de la fe ortodoksa inkluyendo la kolona ande se dize ke fue enklavado el Kristo i la ikona de tavla ke fue tayada i modelada durante 40 anyos por dos maestros ebenistos.

2. El Hospital Judyo OR-AHAYIM Su nombre signifiya en Ebreo la Luz de la Vida. Fue fundado en 1898 kon el dekreto del Sultan Abdulhamid II por el Dr. Kapitan Rafael Dalmediko i el mediko de Ataturk el Dr. Samuel Abrevaya. Fue renovado i ancheyado en 1920 por el arkitekto Gabriel Tedechi.

3. El Lycee Grego de Fener -La Eskola Kolorada- Asemeja mas a un kastillo ke a una eskola. Konstruida en 1881 sovre un monte, su arkitekto Konstantinos Dimadis fue tambien diplomado por esta eskola. El kampo era del Prens de Moldavia Dimitri Kantemir ke eskapo esta eskola tambien komo munchos hombres de alta kultura i famozos en el mundo entero. La eskola se avriyo en 1454 kon el dekreto del Sultan Mehmet, el Konkeror, al Patriko Gennadios i se yamava la Grande Eskola. Era el segundo mas grande edifisyo dospues de la Meskita Suleymaniye en Halic. La yaman la Eskola Kolorada pormodo de los ladrillos (brique, tugla) de esta kolor ke fueron trayidos de Marsilya.

4. La Sinagoga Ahrida Konstruida en Balat en los empesijos del siglo 15 por los judyos romaniotes de Byzans. Se le dyo este nombre por sus fundatores ke emigraron de la sivdad de Ohri, oy en diya en Makedonya. Se izo muy presto un khal Sefaradi dospues ke los romaniyotes se asimilaron a los judyos ke yegaron de la Peninsula Iberika. Inklue un Midrash (eskola) i es la unika sinagoga ke el falso Mashiah Sabetay Sevi vijitava por sus orasyones. Tiene servisyos oy en diya.

5. La Sinagoga Istipol Konstruida en 1694 por los Judyos emigrantes de Makedonya. Dezaparesyo en el grande fuego de 1899 i fue rekonstruida kon tavlas. Oy en diya es serrada.

6. La Sinagoga Yanpol Konstruida en tiempo de Byzans i uzada por los judyos emigrantes de la sivdad de Yanpol en Bulgaria. Fue rekonstruida en el siglo 18. Esta avyerta.
7. La Eglisya Ermeniya Surp Hresdagabet Era la Ayia Strati, una eglisya ortodoksa grega. Los Ermenis fraguran ensima una eglisya de tavlas en los anyos 1620-25. En 1628 un fuego la izo sinizas. La konstruiyeron de muevo i otra vez el fuego la destruyo en 1692. La eglisya de oy en diya fue fraguada en 1835 i servye su komunitad. Su arkitektura eksterna interna es remarkavle.

8. El Hammam Cavus (Chavoush) Es el mas viejo Hammam de Istanbul. Data de unos 5 siglos. Es muy popular oy en diya i muy bien mantenida por su duenyo. Es un edifisyo rektangular ke tiene las salas de las mujeres i las salas de los hombres kon entradas separadas. Su ermoza arkitektura es Ottomana i es un lugar relaksante para el ke kere pasar un buen diya i gozar de una atmosfera historika.

9. La Eglisya de Sangre o la Eglisya de Santa Maria de los Mongoles . Fue konstruida en el siglo 7. En lo mas del tiempo esta serrada al publiko. El emperador de Byzans Mihail VIII dospues de assasinar el namorado de su ija Maria Despina Palaiologina, tuvo seryos problemes kon los Mongoles i por azer paz embiyo a Mariya a Hulagu Khan para ke se kazen. Ma el Khan era muy aedado i se muryo antes de la vinida de la prinsesa ke tuvo de kazarse kon su ijo, Abak Khan. Por su mazal su marido muryo tambien. Mariya torno a Konstantinopolis kon grandes rikezas. Izo konstruyir un konvento i se izo yamar Ketorissa (fundadora, duenya). El konvento i la iglesya fueron dedikados a los Mongoles. El Sultan konkeror regalo esta eglisya a la madre de Hristodoulos el architekto de su meskita i de la mizma manera, el Sultan Beyazit II dyo la iglesya al sovrino de Hristodoulos.

[email protected]

No hay comentarios

Leave a Reply

Artículo anteriorIsrael y Estados Unidos comparten el diseño de sellos de Januká
Artículo siguientePresse saoudienne : Il n’y aura pas de paix tant que les houthistes auront le dessus
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.