Lo ke vale a dizir “en sus tredje” !
Inyervaa ke no te veyga Adele !
De ke bohcha (sako de ropas) kitates el ” 100 limones 100 paras ” !
A la demanyana me kitates sorizas i yevates mi tino a kaminar a munchooooos anyos atras a una guerta yenna de rozas i de arvoles de fruta ande me tresaliya ir !
Teniya unos 10 anyos en estos tiempos… Mi mamita teniya una kerida amiga Clara Biton ke pasava los enveranos en Caddebostan/Kadikoy. Este kartye kon su kalejas enteras moradas por las famiyas judias era komo ” la kula ” para las enveranadas. Eran, lo mas, kazas de 1 o 2 etajes kon grandes balkones i ermozas guertas, pozos en estas guertas
ande djugavamos kon muestras kuklas, aziyamos koftes -albondigas- de lodo i komiyamos fina azermos hazinos moras, igos, uvas, serezas etc… Mos kunavamos, kunavamos muestras kuklas, arekojiyamos pinyones i kitavamos las frutas savrozas kon dadas de piedra.
Teniyamos muestras kazas ensima de los arvelos…Aziyamos una riga ensima del arvole kada ves ke mos ivamos a los banyos de mar. 60 a 70 banyos al anyo eran ley de Moshe ! En Teshabeav por sedaka ! Era la primera koza ke me ambezi de la Ley dospues de D-io en los sielos ke siempre mos ve en todo lo ke azemos ! TeshabeAv no se aze nada. Es un yihtiiiiiii de dia.
(Oy en dia Caddebostan i su doredor es tambien muy shik i muy munchas famiyas djudias moran aya. Tiene un kal muy frekuentado i pishin se siente la prezensya de la gente mas avantajadas)
Clara teniya un marido, Mosyo Biton. Todas las Madames teniyan un marido komo mi mamita teniya a mi padre. Se diziyan “hanumika” i “pasha” entre eyos. Ande mozotros no ! Mi madre era la “ninika” de mi papa i mi papa era el “sheriko” de mi mamita. Yo era la “ice cream” o el sharopiko. Mas tadre i yo la yami a mi mamita ” ninika “.
Dunke Mosyo Biton que era el “pashayiko” de Clara no se topava en kaza de dia, kuando vijitavamos a Clara. Viniya las tadres komo todos los “pashayikos”. A vezes mi papi viniya tambien aya para komer todos endjuntos. Dospues el “pashayiko” i el “sheriko” djugavan tavli (backgammon) o bezik (esto es kartas i dos tavlikas ande se eskriven numeros) i es en estos juegos que Mosyo Biton diziye sempre a mi papa ” 100 LIMONES 100 PARAS ” ! Parese ke echava los mismos buenos dados en sira ( uno detras del otro) o avriya las buenas kartas en primero en el bezik ! Koza ke se repeta i inyerva el otro …
Le aviya demandado a mi mamita, la primera ves, “juegan al limones ? No kon paras ? ” “Deke no kon avikas ? Limones son grandes ! ”
Esta ekspresyon es muy muy vieja i parese ke se tomo de los merkados aviyertos ande los vendedores gritavan para vender sus limones. I pormodo ke diziyan siempre la mizma fraza la gente la uzo por dizir una koza ke se repete siempre.
La “para”, ke sinyifika “moneda-plata” oy en turko , teniya una valor antes munchos anyos. Valiya 2 groshes i medyo (kurush) dunke 4 paras aziyan 10 groshes. El grosh era el 1 porsyen de la Lira antika.
– 1 milyon de Liras antikas son 1 Lira de oy ! –
Mas kolay -fasil- de dizir ke 100 limones se vendiyan por debaldes ! Ma va demandales a akeyos ke bivyeron en este tiempo… Ivan a dizir “Komo se enkaresyo tanta la vida!…. 100 Paras para 100 Limones !
Atyotyotyotyo….Ande se tiene visto esto !”
Yo me akodro ke merkavamos el limon por 1 grosh i la naranja por 5-10 groshes.
Devo este eskrito a Adele en Miami ke me akodro de Mosyo Biton z”l.
Komo se avla del limon sin eskrivir de “a kualo mos sierve ?”
guay guay ke se perye la persona kuando kere empesar a avlar por la “Parasha” del limon. En kurto puedemos empesar por dizir ke el limon es bueno para todo, a parte de las kozas para laskualas no es bueno !…. Komo ? Vos vo eksplikar !
EL LIMON ES LA ANTIBIOTIKA KE DI-O MOS REGALO !
- Todos saven, mizmo yo, ke el limon es una kashika de Vitamina C i ke tenemos menester de esta vitamina para kurarmos de la grippa, i todos los males a los entornos de esta hazinura ! Dunke estar echada,
bever toneladas de te kon limon, limonatas, supas kon limon, pasensya i durmir muncho… I no esto avlando de las grippas de oy kon lo del
Afrika, lo de la vaka loka, lo del puerko…. guay guay..Leshosssssss ! - Lo mas importante el limon aflaka ! Una kupa de agua kon limon a la demanyana i la persona se derrite i se aze un palo !
- El limon kura el kanser ! Siiiiiiiiiiii ! Sin nada de produktos kon leche i asukar i grassa del todo el limon sana las selullas kanserozas….
Un fuerte anti-oksidante i anti-kansorejeno !
Por seguro ke ay estudyos ke se izyero i dizen ke esto no lo aklaran en todos los lugares para no impedir de vender las kuras ke kostaron muy muncho para yegar a la faza final… Kere dizir a las farmasiyas i a las aldikeras de los laboratoryos !.. - El limon ayuda a enfuerteser el sistemo immunolojiko ! Koza muy importante para kombatir todas las hazinuras !
- Es bueno para los ke se sienten kansados.. Arrebive la persona !
- El kuero de la persona se namora por el limon…. Se rezya, se dezenfekta, se le van las manchas, las unyas pujan, los kaveyos se alargan, ganan luminozitad, se kuran las pelikulas, i no se rompen !
- Ayuda las personas ke tienen problemes kon sus intestinos
- No ay mijor del miel kon limon para las infeksyones del garon
- Alimpya el ilgado
- Prokura el ekilibro de la tension
- Bueno para los rumatizmos
- Bueno para los ojos
- Bueno para la boka i los dientes
- Bueno para las araskinas
- Korta la ser
- Bueno kontra el osteoporosis – gueysos-
- No egziste kozina sin limon ! Es el rey de las salatas i tantas otras savores…
Espero ke no vos se agreyo la boka… Un poko de sharope blanco ?
Artículos Relacionados: