Keridos amigos,
Ya me van a azer del ojiko unos kuantos por mi biervo alishtireyar. Es ke en buen ladino no ay biervo mijor de esto para dizir lo ke keres dizir.
Alishtireyar i yakishear son los 2 biervos los mas sefaradis ke egzisten ! En la boka de todos, en el kal, en Batyam/Israel, en las grandes resepsyones en las kalejikas de la KULA, en Buyukada, ande todos los lugares ke los djudyos turkos se topan estos dos vierbos seran de uzo ! Ke son ? Ayyyyyyyyy no lo savesh ?
Madre mia bendicha ! Komo no ! Lo dizere….
Alishtireyar es ” to get used to” , “s’habituer”,”lehitragel” viene del verbo ALISMAK en Turko. En ladino lo dizeremos Ya me auzi = auzarse. I “auzarse” dire ke pasa en muestra lingua d la mizma manera i kuantitad. Buen ma no sos halis sefaradiya si no metes envezes el biervo tirado del turko… Es la savor, el pimienton i el kaldo de la lingua espanyol para mozotros.
Yakishear es su ermano ! Es “to suit”
kuando el fransez te dize ” Ca te va ! ” i el ebreo “matim lah, yafeh alayh ” viene del verbo YAKISHMAK en Turko. En djudeo espanyol diriyamos “te kaye bien” , “te esta indo esto”, “esta echo para ti”….Si si si, ma noooooooo ! Keda sin sal i sin pimiyenta komo komida de dieta….Barminnam !
Ke estava dizyendo yo…..Myriam….mi munyekita ! Se bolo para Montevideo ! Ke tenga todo bueno i de agora en delantre solo alegriyas en su korason Amen !
Yo, en mi inyorensya i mi tonteriya djuzgi la primera noche la ovra de Myriam ke “No vale nada!” Ke enormitad ! Ansina es la persona. Kuando es burra todo lo ke no save le viene tonteriyas i “para kualo es esto ! ” Ke malo !
Un diya entrimos a su pajina web….Me attontesi yo de ver tanta ermuzura…..No es ke me konosko en pinturas ma sin konoserme de este arte me se entravo unas kozas en mis venas….Adonay !
KE ekspresyon, ke kolores ke pinturas unas mas ermoza de las otras….Kedi enkantada i la miri komo si no la konosyera ! ” Las izites tu ” le dishe no kreyendome los ojos ! Era eya….Esta medya porsyon de mujer kon una flama ke dingunos de mozotros konosimos. La ija unika de una famiya alavada de Izmir ke el Destino aharvo en las personas i en las finansas….Puede afitar a todos ! Eya tiene la frente alta…. Kreye en su arte kon razon !
Eskapo universitad, eskolas de arte, tiene premyos, avriyo munchas exhibisyones… Kere segir, mas pintar mas vender…Ma es un echo sin rekonosimiento…. Komo todas las artistas se ve kon el dezespero en el korason.. No save vender… No vende….Yori…Yo no iva pueder merkarle ma no avra djente ke se enteresa a esto ? Se puede bushkar en el Internet kon el nombre Miriam Kuneo.
Kon mi karinyo a todos
sharope.blanko@ google.com
Artículos Relacionados: