Vengo de tornar a kaza…. Tengo dayinda en mis orejas toda esta muzika sefaradi, allegre o triste ke por siglos se kantaron en muestras komunitades.. Es poko dizir lo tengo en las orejas…. Lo tengo en mi korason, en mi kuero…. Estas notas tan karakteristikas de la Peninsula Iberika ande las manos chaftavan i los piezes batiyan el ritmo enkantador de las melodiyas espanyolas… Sera ke se transmetan de manera genetikao es por ke lo savemos ke es muestro ke mos afekta tanto ? No lo se ma teniya lagrimas en los ojos kuando oyi muestra DIVA, el orgolyo djudyo de Izmir Linet Saul….
Ke boz ke teniya guadrada de nazar…. Me la keriya komer ! Kuklita. Tan simpatika i tan grande kuando kanta los bilbilikos komo eya mizma una bilbila ! (bulbul en turko sinyifiando el pasharo kon la mijor boz del mundo i personifikando el ke tiene una boz asemejante).
El kal estava yenno i inchido de todos las partes…. Las personas avlando entre eyos no saviyan mas ande meter muestra kerida Linet….. Ke mos biva munchos anyos i ke siempre mos kante kon allegriya kon su ijika chikichikitika ruvyizika… Un korasoniko!
Le deshi mis bezos i unas kuantas flores ke me dyeron en una boda alavada en el mizmo diya… Di-o miyo…. Ke kadar de elagante pueden ser la djente ! Una lokura….. I la novya no se kere dicho ….Ni ke lo puedo darvos a entender ke manera de fostan ke vistiya entero bordado en diagonal kon piedras….Si una lokura pura ! Me endjido el korason de ver una fortuna de djoyas i vistimienta echadas por la ventana, solo para kualo tiendran la djente de dizir…. Savyendo yo ke ay tantos menesterozos… Ma ande son los limitos ?.. No ay leyes dichas o eskritas para ansina de kozas ke tienen lasos estrechos kon la konsiyensya i el buen gusto, la elegansya i la onor de las famiyas ets… Puedeser ke es yo ke m’esto yerrando…. Puedeser …
I… ken estava en el konser de Linet ?Ayyyyyyyyyy … Eliz i Selim Gatenyo ! Mos abrasimos… Yo konosiya a Selim Gatenyo de PROFILO ande lavori 6 anyos. Agora el vino al lugar de mi patron ke yo adorava el sinyor Mario Gabay en ganeden este… No troko del todo Selim Gatenyo. El mismo pasha de ombre, mas aedado, komo todos ke konosi en mi manseves, ma el mismo ! Muestras granmamas eran primas…. Salimos paryentes ! Selim i Eliz Gatenyo por seguro ke tiendran un lugar muy espesyal en mi korason… Les suheto todo lo mijor ke puede ser.
La kula es el kartye ke los djudyos de Galata biviyan fina atres de 50 anyos mas o menos…. Dospues pasaron a Taksim, Osmanbey, Nisantasi i Sisli…. Estos lugares se fraguaron komo shampinyones i en mi chikes eran ” La kula moderna ” ! Mis dos granmamas biviyan en la “cadde de Bankalar” (avenida) i es por ser kaji vizinos ke mis paryentes se konosyeron… Es ke mi padre, kada ves ke pasava por el apartamento ande moravan mi madre kon sus paryentes oyiya el piano ….. Un diya le demando al portero ken es ke djugava piano arriva ?
Es ansina ke supo ke aviya una damma ke era profesora de piano, ke su marido era mediko hirurgo, ke la demuazelika djugava piano i dava lesyones tambien i el ermano era arhitekto ! Mi padre vino a tomar lesyones de piyano ma lo refuzaron ! Riendomeeeee…. Dezmazalado !
Embiyo sus paryenteres i su ermano bohor Nisim para demandar la mano de la demuazelika ! Nada……Los metyeron a la puerta !!!! Me se parte el korason….Ke amor ….. Por verla en la ventana asperava el Alhad diya entero en la kaye ! Era luzyo ombre… Blondo kon ojos blu, kon echo i provecho. intelijente i enstruido… Ma.. Va demandales kualo era el ma ! Kurto…la fuyo kon pantuflas en los piyezes i se kazaron….. Una istoria komo los kuentos de kreaturas ma enteramente vedra !
Me esto bolando de una koza a la otra…. Es ke ay tanto de kontar ….
La organiazsyon demando ke los restorantes del kartye gizen komidas espesyales djudias…. Komimos en uno d’eyos. No estava negro ma leshos de la savor de las maraviyas de mi mamita.. Borekitas i boyos i mansanas i burekas se estavan vendyendo en las kayas.. Las damas i los messieurs estavan elegantes i se puediya goler un ayre de fiesta en las kalejikas estrechas ke fue el nido de una kultura ekstraordinarya i muy seloza porke nunka kijo mesklarse a otras kulturas o reelamente muy poko !
Dospues de komer mi asistentika kijo suvir a la kula.Yo me muero del sar de los asansores. No la kije romper i suvimos arriva…. No lo regreti. Ke panorama manyifiko de los 360 grados…Tanto ermozo ke la persona tiene difikultades de akseptar ke es vedra.. El Di-o dyo a esta sivdad una ermozura inkomparavle. La kula de Galata es un monumento gigantesko, massivo de piedras ke fraguaron los Genevizos (Genova en Italia) en el medio del siglo 14 i lo entregaron en dando las yaves al Sultan Ottomano.
Kaminimos un poko en las kalejikas para ver ke se izo las kazas de mis tiyos i mis tiyas…. Mi chikes aboltando kon una prestor inalkansavle delantre de mis ojos i en mi kavesa….Teniya ganas de yorar i de riyir en akodrandome de todas estas personas ke no biven mas… Esta kreaturika ke no le importava nada mas ke sus djuettikos i los sharopes i dulses de las patiserias djudia alavadas .
I vino el tiempo del konser en medyo de la plasa de la kula….. Estavamos todos en pies. (Povretikos de mis piezizikos) i no mos estava importando…. Estava muy muy ermozo…….Vos kero dizir ke la koreografia i la muzika kon las kualas baylaron muestros mansevos i mansevikas el “Grupo de dans de Karmiel ” estava mas de profesyonal, ekstraordinaryo…No puediya ser mijor. Me namori….De Cenk Rofe tambien, kon su kantika “Pembe Karanfil “. Este mansevo tiene una boz enkantador. Las poezias i el grupo Sefarad…….Una fiesta de no olvidar….
Munchas grasyas kerida ELIZ GATENYO ke me informo de este festival… Si no eya, nunka iva saver ke se organizo una koza asemejante…
Aviya munchas otras kozas de ver de vijitar i de oyir ma estava kansada i no aparejada…Lo regreti ke no puide ver la ekspozisyon de fotos de Izzet Kehribar ke apresiyo muncho… Me izo muncha pena de verdad…. Ma vide solamente kuando estavamos tornando ke aviya i esto en el program…. Ke pena ke pena….
A la otra ves kon bueno…..
Artículos Relacionados: