Tres i medya de la demanyana en kaza de mi ijo…..
ringgggggggg ringggggggg ringggggggggg ringggggggggg ringggggggg
– alooooo ?
– presyado so yo ! Komo estas ?
– Mama ? Estas buena ? Kualo tienes ?
– Nada mi angelo ! Esto soriyendo i esto kontente.
– Deke me estas telefonando a estas horas ? Dizeme la verdad…..Afito koza ? Kero saver !
– No afito nada ! Kije oyir tu boz !
– Mi boz a estas horas ? No puediya asperar fina la demanyana ?
– TE inyervates ke te esperti ? Te deranji muncho ?
– Si ! Para oyir mi boz !!!!
– Ah bueno ! Es ke antes 30 anyos i tu mos aviyas deranjado a mi i a tu papa kuando kijites naser ! No puedites asperar fina la demanyana ! Pasimos una nochada de mil maraviyas ! Te kije felisitar presyado miyo i ke tengas una diya maraviyozo…. Te asperamos a la noche para fiestar kon el gateau ke ize en tu honor !
– Ah ? Les di palavra a mis amigos… Es mi amiguita parese ke aparejo un surprise-party… i agora no se de vedra komo….
– No me digas ! I mozotros lo teniyamos todo preparado i pronto para ir al piknik a la manyana de tu nasimiento ! Te figuras ke no puedimos ir a dingun lugar !
– Esta bien mamita ! Estare en kaza a las ocho esta tadre…..
– Lo saviya ke estaras kon mozotros en una noche tan espesyal para ti i para mozotros. Mi regalado…. Mi miel….. Yo siempre digo ke las kreaturas deven felisitar a las madres el diya de sus aniversaryos tambien porke este diya es el diya de glorya de los dos ! Un lavoro
divino entre el/la ke deve naser i la ke da LUZ …Un esfuerso enkreyible i el mirakolo de la natura…El mas puro de los amores…
– Grasyas mami por darme la vida i por la ke sos por mi.
– Va durmir agora… I si me da ganas te vo telefonar otra i otra vez !
– Por seguro…. Sera siempre mi plazer de oyir tu boz ! Nochada buena!
Artículos Relacionados: