Diario Judío México - “Seremos Komunistos kuando no tendremos para gastar….
Seremos Kapitalistos kuando seremos rikos…
Seremos Fashistos kuando tendremos poder i
seremos Humanistos kuando no tendremos fuersa…”

Todo puede evoluar …los instinktos nunka !

Keridos, en supito tuve munchas ganas de avlar sovre kozas ke preokupan munchas personas al punto de no estar leshos de una obsession !

Por empesar deshadme dizir ke nada tiene demasyado importansya en muestras vidas, mizmo si en akel momento pensamos el kontraryo… Dospues de los 50 o 60 o a vezes a los 70 i mas, la persona empesa a pensar de manera absolutamente diferente de lo ke aviya pensado todo su vida ! Muy enteresante esto ! Es komo si una demaniyana en alevantandomos avimos komido o bevido algun filtro enkantador (komo en los kuentos de la Edad Medya !), i empesamos a ver la kreasyon, el mundo, la signifikasyon de la vida, muestras kreensyas, muestros motivos i muestras opsyones, todo lo ke kijyeramos, dezeavamos i davamos importansya trokados majikamente !

En los anyos 60, a los 16 anyos +, yo i mis amigos eramos fanatikos detras de muestros amigos de 20 anyos + ke keriyan trokar el mundo, todo el sistem sosyolojiko i humanitaryo ! Unos diziyan ke el komunizmo, otros el movimiento “hippy”, mas otros sosyalizmo, unos gritavan “los derechos humanos” etc. no eran importantes ! Lo ke kero dizir es ke en el fuego de la manseves todo lo ke teniya relasyon kon la sosyetad, la vida, la evolusyon, la teknolojiya, la paz en el mundo i munchos otros sujetos (kale bibliotekas enteras para kada un de estos sujetos) teniya una enoooorme influensya en muestra vida de kada diya. Unos de los muestros dieron sus vidas (vedra !), otros, por anyos i anyos fueron detenidos en prizyones etc.. Triste !

I….. Ke akontesyo ? Munchos de entre mozotros aserkandosen de los 30, o otros, los mas fanatikos, a sus 40 anyos, empesaron a ser mas materyalistos, mizmo de sus padres ke miravan de un ojo malo i los depresyavan. Un kazamiento, kreaturas, amigos en serklos diferentes, el penseryo del futuro immediato, las responsibilitades i las ovligasyones kucheyaron el idealizmo. Me akodro de estos tiempos ke fui testigo del trokamiento de mis keridos i mis amigos/ermanos…. Era de no kreyer lo ke se estava pasando ! I… anyos… mas anyos pasaron…. Ke akontesyo ? Entre mis amigos unos se izyeron rikos… muy rikos… otros se izyeron siantifikos, profesores, jurnalistos, artistos, hombres/mujeres de alta kondisyon o mas otros, felises kon lo ke les dyo el Di-o. Ay los ke no kreyen… Dizen Providensya, mazal, lo ke keresh !… Toda esta gente teniyan otras kozas en sus kavesa : La fama, mas rikezas, mas kreaturas, assegurar el futuro de sus famiyas, una mas ermoza kaza, djoyas i mas viajes o adelantar sus karyeras etc…

I…. Ke akontesyo ? Oy tienen mi edad. Unos se muryeron, a unos les parese ke tienen 20 anyos. Una se siente de 12 anyos (yo ! Ma se ke so unika en el mundo, un kavzo entre miliones!!!) ma lo mas, lo mas…savesh ? Mmmmmmmmmm, no les importa nada nada nada ! Eyos son de los ke se alevantaron una demanyana i komyeron o bevyeron un filtro o una koza ke no savemos lo ke es…. Esta koza los izo muy muy muy intelijentes ! Vieron el mundo kon otros ojos… Son komo profetas o savios ke miran a traverso los objektos o los seres… Komo si avian gostado una fruta defendida ! Ven ke todo es ayre i siniza… guerraz i paz no tienen sinyifikasyon porke la evalusyon engendra la muerte… i solo la muerte es la verdad divina de muestras vidas ! Andavos a mirar ke seriya la reaksyon de una mujer ke tiene el kanser kuando le ofresesh un aniyo de diamantes, regalo para eya sola, kon la kondisyon ke no lo va pueder regalar a otro en su vida ! Makabro ! Deskulpas….

Dospues de la demanyana akeya, savesh lo ke es importante ? Bivir i solo bivir… Bivir bueno i gozar de kada minuto ! Akodrarse de su chikez, de sus paryentes ke no estan mas… Apanyarse a los amigos ke sembolizan la vida i la sekuridad de no kedarsen solos, la importansya ke la kaza seya allado de un hospital ! Tener vizindado en loskualos se puede fiar (si okure una kriza kardiaka, una paraliziya etc…) i tener una bolsika mas o menos yenna “para la vejes” !

No se kuanto vo lo ize preto vuestro diya ! No es posivle de kontar kuentizikos kada diya… La vida tiene i solombras i no siempre es de diya, el sol briya i empesa la primavera !

Keridos.. siempre avra guerras en este mundo.. mas i mas mizmo ! Porke ay guerras kuando las kondisyones de los puevlos deteryoran o son malas i mas i mas konoseramos la mankura de los alimentos, de la agua buena, la polusyon i las katastrofas klimatikas… Los payizes povres son los ke sufriran lo mas….

La paz, la toparemos siempre en muestro korason. La vida es una peleya de un segundo…. El resto es ayre i siniza, nada mas ! La yave de la felisitad la detenemos entre muestras manos… No kale guadrarla o meterla en la aldikera ! Ke seya siempre entre muestras manos. Mas amor daremos i mas amor arresiviremos. El karinyo es la unika felisitad en el mundo! La egzistensya del kristyanizmo dependyo unikamente de estos biervos ! Di-o es Amor ! Ama a todos i perdona a todos ! Es la unika filizofia ke tiene sentido por la felisitad ! Esto kambyo/troko la historia i la humanitad i por seguro ke es la unika verdad !

Lavorar ? Hehehehe ! Va no lavores si puedes ! (riendome!) Yo lavori mas de 60 horas en la semana…. El payis tiene una parte por seguro ma lo mas es para mozotros ! Todo esto depende de lo ke tienes, keres tener, keres azer o alkansar en tu vida… A la fin no ay muncho diferensya entre pan i kezo o ser reyna/rey de un payis… No se kual es mijor a vezes !

Una vida buena sinyifika tener una buena … no tener ambre o dezeyos ke no se pueden alkansar… Paz en la miente, en el korason i en la aldikera ! AMOR en kaza – miembros de la famiya – kon los amigos i kon todos
los ke se komunika – no tener selos, odyo, ravia ke akortan i entosigan la vida… Una soriza i siempre una buena palavra para arekayintar la gente ke vos arekayintaran.

Paz ke tengamos i muncha felisitad en esta vida para todos los habitantes de muestra planeta. – Amen.

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorEnsalada de sandía y queso feta
Artículo siguienteDel Tzitzit al Bit: Aportes Judíos en Computación e Informática: Jack Tramiel
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.