Istanbul

Por:
- - Visto 295 veces

LA MAS ERMOZA SIVDAD DEL MUNDO

Kerido Martin i mis amigitos

Fue muy enteresante de meldar tus komentos sovre Istanbul ke vijitates antes 6 anyos. Lo importante es ke eran subjektivos i otra vez puide “ver” Istanbul kon los ojos de otra persona.


Istanbul para mi es la sivdad de mil kolores. De diya ….de noche… de enverano… de primavera… de invyerno en sus diferentes kartyes i kon sus muy diferentes puevlos ke biven unos al lado de les otros.

Es una sivdad sovre la kuala siyenes de ovras, livros de turizmo, estudyos sosyales, livros de arte, livros de urbanizasyon i architektura, estudyos etnikos, livros de kozinar, livros de historya i relijyon fueran eskritas en diferntes epokas i en kuaji todas las linguas del mundo.

La ermozura de esta sivdad ke fue la kapital de munchas sivilizasyones, emperyos i payises es por modo ke esta situada geografikamente en un sitio ideal… Entornada de tres partes kon dos mares interyores… La Mar Marmara kon el Bosfor fina la Mar Preta al norte de la sivdad.

Su klima, de los mas dulsez del mundo, otra ves relatado al lugar geografiko ande se topa. Una sivdad de las mas rikas sino la mas rika de punto de vista historiko kon trasas del Imperyo Romano, Imperyo Bizantino i Imperyo Ottomano… Una sivdad ande se topa todo lo ke una persona puede dezeyar, se puede obtener kualker servisyo al momento mizmo i ande ay “vida” 24 horas al diya.

El trafiko ! Bueno… Dingunos pueden dizir ke las kalejas estan vaziyas… Mas de 15 milyones de habitantes !!! El transporte publiko kon trenos, vapores otobuses, el metro, el metrobus i el tramway fasilita las kozas. Se izo muy popular en los d’alkavos 5 anyos, i mas puedeser, kon sus hospitales i ortodantiya mas barata komparada a los otros payises i no de nivel inferor por esto ! El nivel de la medisina se puede komparar al de los Estados Unidos i la de Inglatera kon ken lavoran i munchos medikos estudyaron en estos payises. El lukso de estos hospitales privados son komo hoteles de 5 estrayas ! Turkiya gana muncho oy en diya del turizmo medikal.

Vinyendo a lo ke disho Martin, es vedra ke es un payis egzotiko kuando se topa la persona en un sentro spesiyalamente kreado por los turistos en lugares antikos de la sivdad, al doredor del primer palasyo de los sultanes del Imperyo Ottoman. No tengo dudas ke oyir la muzika arabeska en un taksi, para uno ke viyene de Inglaterra tiyene su kolor lokal tambiyen. No para mi leshozzzzzzzzz ! Maaaaaa… Keriya muncho tener, yo, de esto egzotiko un pokitiko ande moro ke es mas moderno de ande mi ijiko mora en Greenwich/Londres !

No tengo visto en dinguna sivdad tantos restaurantes, unos mijores de los otros, guay guayyyyy para engodrarse la persona ke lo kera o no ! Los kafes kon sofas komo los de kaza, en las guertas, en los patios yenno de mansevos i lokura de pasteles i bevyentas son una otra kultura de los tiyempos modernos kon gente yevando sus ordinadores i lavorando o pasando sus tiempo aya ! O meldando las gazetas, topandose kon los amigos i mizmo flortando…!

Istanbul es oy la mas grande sivdad del payis el mas antisemito del mundo djuntos kon Iran i el Qatar…. Vemos las mujeres veladas de mas en mas… Ma no se puede dizir ke los judyos estan dezrepozados seryozamente de esta situasyon mizmo si los televizyones i las gazetas eskupen sus venenos a la siedra i a la derecha a kada okazyon i dan a pensar los biervos del prezidente del payis. Mos endjida a todos ma el silensyo es total. Otra verdad es ke munchos judyos se fueron o se estan indo a Israel i a otros payizes tambien. La savor de la sivdad ande nasyeron i se engrandeseron les kedara para siempre en sus paladar ma ansina deve de ser si uno no ve futuro seguro ande se auzo a bivir. Un dekreto de egzilio no es siempre nesesaryo para partir de un payis…

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: