Mis keridos amigos,
Oy vos vo kontar kon grande keyf ande me plaze pasear lo mas en Istanbul, ke de vedra todos sus kantones son enkantadores ! Es del grande bazaar kuvyerto vijitado por todos los turistos ke vienen a Istanbul ke vos kero avlar. Se yama el KAPALI CARSI ke sinyifika el merkado serrado o kuvyerto. Se topa en los baryos antiguos i historikos de la sivdad… Una immensa kaverna de Ali Baba ande siempra ay muncha gente de todos los payizes del mundo i ande se avlan todas las linguas !
Es uno de los mas grandes sentro del komersyo i del oro ke egziste de mas de 500 anyos sin peryer nada de su fama i de su glorya… Egzistiya en muncho mas chiko del tiempo de Byzans kon sus tiendas i el CEVAHIR BEDESTENI ke dayinda okupa un lugar muy importante en el CHARSHI… Se venden las mas ermozas djoyas del mundo, ovras de plata i de kovre, de marfil / ivoire, objetos antiguos, kozas de grande valor ke kuaji no se topan en otros lugares…. Un sigundo BEDESTEN (Sandal Bedesteni) tiene su nombre pormodo ke se vendiya en este lugar una ropa ke se yamava “sandal” i era tisada kon “kaminos” uno de koton/algodon i uno de seda, koton i seda, koton i seda…. Esta ropa no egziste mas i si mismo se topa es antigua i muy muy kara.
Al tiempo, los muy rikos i mismo gente de la korte del Sultan guadravan sus oro, sus armas valutozas, sus vestidos de samara, sus djoyas en las kashas del Bazaar porke se diziya ke es una forteresa ke no se puediya atakar. Si el Palasyo de TOPKAPI era la Administrasyon KAPALICHARSHI era la ekonomiya del Imperyo kon tonas de oro, de djoyas, de sedas, de plata, de los mas ermozos tapetes ets … Mas tadre la Ekonomiya del payis se transfero a Galata ande se fraguaron las grandes bankas (Ande biviyan los judyos i se topa la Kula/la Tour, Bankalar Caddesi, Shishane) – i la Administrasyon paso al Palasyo de DOLMABAHCHE. (Sieglo 19)
El Charshi de 45.000 metros kuadrados tiene 64 avenidas i kalejas. Se empeso a fraguar en 1461 i los lavoros duraron 50 anyos. Tiene 22 puertas de entrada. Mas de 20.000 personas lavoran aryento. Dependyente de la sezon de 300 a 500 000 personas la vijitan kada diya.
Ay 4.399 grandes i 2.935 mas chikos magazenes, 24 hanes (grandes edifisyos de komersyo) 497 negosyos “almaryos” 12 kavas, 10 meskitas chikas, 16 fuentes, 8 pozos i 2 grandes fuentes impozantes de marbro en este merkado alavado. Por seguro ke no mankan restorantes i unos kafes para deskansar un poko.
El Kapalicharshi era tambien una grande eskola ande se ambezavan los mansevos, des de ke eran chikitikos, diferentes ofisyos. Es el maestro ke ambezava al chirak/apprenti todo modo de arte i artizanato. Estos eran renomados en el mundo entero.
Un grande terremoto en el anyo 1894 derroko kuaji el CHARSHI i se fragua de muevo kon los fundos ke el Sultan Abdulhamid gasto para su renovasyon. El Bazaar konosyo 20 grandes fuegos i terremotos dospues del grande terremoto de 1894.
El Bazaar fue siempre kontado por los grandes viajadores del mundo, figurado por los pintores komo una estreya del oriente, fue el korason de la sosyetad, del komersyo, de los komplotos, de la politika, de las revoltas del puevlo, de los amores klandestinos, de los asasinatos, de las invensyones …. De los espiones, de las importasyones i eksportasyones a/de otros payizes. Lo mas tapetes, joyas, objetos i vistimienta de kuero, espisas, fruta seka, objetos de arte i artizanato, objetos antiguos, seramikas i porselenas, lampaderes, textiles, dulsuryas, ashugares para los novyos, tovajas i mil otras kozas ke no me vienen al tino agora…
Esto segura ke no vash a mankar de vijitar el CHARSHI si vinish o kuando vash a vinir a Istanbul.
Kon karinyooooooo
Artículos Relacionados: