La Assimilasyon

Por:
- - Visto 261 veces

So Judiya des del empesijo…. des de la inkizisyon por aki, des de mis ansestros ke yegaron al Emperyo Otomano i se instalaron en Konstantiniye, Istanbul oy en diya, judiya de padre i madre, kon fe en el Di-o de muestros Padres, Abraham, Itshak  i Yaakov i kon grande kerensya a mi puevlo i a Eretz Israel, muestras Tierras Santas.

Esto de avizo ke es mas importante de pensar  al bien estar, a la egzistensya del puevlo judyo i Israel komo muestro payis,  ke a la rijiditad ke empide todo penseryo lojiko de siertos Rabbis, lo mas Ashkenaz Orthodox, serrados en sus mundos striktos, sin opsyon, absolutamente  kontraryo al  modo  de bivir en muestro tiempo

Dayinda les importa azer attensyon a no uzar el  piron kon elkual komyeron komidas de karne para  komer  kezo…..  Esto salyendo de “No vas a gizar la kavretta en la leche de su madre !” ke yo traduizo no vas azer kozas abominavles a los ojos del Di-o,  trespizar los sentimentos los mas puros… Echar un bebe al fuego delantre de los ojos de su madre..  No !  Esto no esta mensyonado!  Salir de esta Ley para transformar la kozina en un sanktuaryo de  fanatizmo i azer akseptar esto a personas sezudas, es kerer barrir la mar !  Ademas ke se save ke esto era una pratika de los idolatros i Di-o kijo dizir “no agash komo eyos !” –  No seyash idolatros ! – Era un egzemplo solamente…..


Kon todo mi respekto a  las personas ke observan las striktas leyes de los rabinos, me demando si el rabino ke invento esta Ley era sano en su miente..   No kale olvidar ke por siertas personas es un echo de konsiensya de akseptar lo todo komo uno ke  “observa  mitsvot”  o no  azer nada.  dunke ser konsiderado komo un goy…. Penso ke lo mas de las personas keren ke sus kostumbres  konkorden kon sus dezeo i/o kon sus intelijensya.  Por mi parte,  no kreyo ke a Di-o le importa si komes o no komes karne, si lo komes kon un piron o kon las manos, i si se uza un piron  ke toko kezo !….  O… Si devemos tapar el espejo en diya de Kipur o en diyas de dolyo….Egzemplos…. i otros i otros…. Lo mas komplikado son los rituales de Shabat ke deve de ser un diya de fiesta i de repozo… i no de enfasyo i de kanserya para asuvir, oy en diya, al diezen etaj al lugar de uzar un asensor !… Yamar un goy para asyender la luz, uzar un “plata”  al lugar del gaz  ets….. I kualo dizir del echo sin kavo de la limpyeza en Pesah ?  Trokar todo lo ke ay en la kozina, echar kemar, dar o emprestar a los goyim lo ke se kome en kaza, al lugar de solo komer la matsa en memoria de la salida de Egypto ande eramos siervos… Todo en kontando i en eksplikando a los chikos lo ke Di-o izo para Su Puevlo.

Di-o mos dyo la intelijensya para ke ancheyemos muestros horizontes, el saver, ke mos developemos.  Es por esto ke mos dyo la kuryozitad, el dezeo de adelantar, la ambisyon pozitiva… No para ke fraguemos muros a muestro doredor i bivir komo psikastenikos, muertos del sar si se va a los oyidos de la gente o del Rabbi lo ke azemos o no azemos !  LA LIBERTAD  no se puede entravar i la vida de los rellijyozos es  striktamente limitada a muy munchas kozas.  No tengo nada kontra esto si se sienten bien i les konviene mijor de ser dirijidos por la Ley de los rabinos i no de Di-o,  dunke se sienten protejidos mas, salvados de las tentasyones del mundo salvaje ma liberos detras de las puertas del kal.

Kon esto yo, i milyones komo mi, no lo pueden  akseptar de todo korason,  MISMO  si lo keren… Por kontra, todas estas personas, milyones,  se  veran fasilmente entegradas a la kongregasyon si se avla de una reforma mas serka  al entendimiento de la persona del sieglo 21. La asimilasyon NO PUEDE SER MAS DESGRASYADA de lo ke esta oy.  Va aver mas i mas si no se azen reformas.  No es la relijyon ke puede stopar la asimilasyon ma la KERENSYA a muestra relijyon i a muestro puevlo.  Porke kon buendad se logra mas de lo ke se logra kon la fuersa !  I  seya la majoritad de muestro puevlo, seya los etranjeros odyan esta mentalitad de ser ovligados a observar kozas ke no kaven a muestro entendimiento o es odyozo al ver, egzibir artifisyos relijyozos para dar mas fuersa a la DIFERENSYA entre los muestros i los ajenos al Judaizmo, apartarmos de los ke kon ken bivimos endjuntos, en el vizindado,  frekuentando las mizmas eskolas, hospitales, magazenes ets….Es la “diferensya”   ke kavza en grande partido el antisemitizmo, el fakto ke los Judyos se sienten inkomodos delantre de los otros, munchos inyegan sus judaizmo i preferan kazarsen kon non-judyos…. Tantos peryen sus vida  mizmo en los attentados de los terroristos….

Parallelamente los kripto judyos, los bnei anusim ke tanto i tanto keren tornar a sus raises, a la fe de sus ansestros, se konfrontan kon miliuna diffikultad, un recheso ke no es posivle de entender de la parte de los hahamim… Keren tornar a sus tierras santas ma dingunos los ayudan i tanto i tanto tenemos menester de sangre mueva, de tener una populasyon judiya kon mas i mas personas en Israel arrodeyado de enimigos !

Lo digo, munchos otros lo dizen, lo eskriven, se keshan ma todo keda en su lugar… Los Judyos mas i mas se van asimilandosen, mas i mas se ve el antisemitizmo i el odyo a Israel i al puevlo Judyo.

SEFARADIMUESTRO

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: