La Etika Djudiya (6)

Por:
- - Visto 221 veces

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

La semana pasada, avlandovos por la sinkena vez de etika djudiya, i despues de tenervos avlado, antes de las vakansas, de las etikas de la persona i sosyala, vos avli de las etikas de la famiya i de la edukasyon.

I agora ayegamos a la etika de la ekonomiya


Patrones i empyegados

El patron no deve abuzar de sus empyegados

Es una mitsva de no abuzar de sus empyegados, asigun esta eskrito: “No sobrefuerces alquiladizo” (Devarim XXIV, 14) El rekodro de la servidumbre en tyerra de Ayifton deve ayudar a determinar el kuadro de las relasyones entre patron i empyegado, asigun esta eskrito: “Que a mi hijos de Israel siervos, mis siervos ellos, que saqué a ellos de tierra de Egypto, yo Adonay vuestro Dio” (Vayikra, XXV, 55). Las ovligasyones del patron son en parte desvelopadas en Shemot XXI, 2 a 11. Este teksto deve ser traspozado para el mundo de oy. Es una mitsva de no tratar a sus empyegados kon dureza, asigun esta eskrito: “No podestes en el kon dureza, y temeras de tu Dio” (Vayikra, XXV, 43). Los mismos byervos “kon dureza” son uzados para avlar de la servidumbre en Ayifton (Shemot I, 13).

El patron deve okuparse del byenestar de sus empyegados

Es una mitsva de tomar en konsiderasyon el bienestar del empyegado, asigun esta eskrito: “no manira salario del alquiladizo contigo fasta mañana” (Vayikra, XIX, 13). Esto kyere dizir ke el patron deve tener tino a ke el empyegado resiva un salaryo ke le permita de  sostener a sus menesteres i ke sus kondisyones de lavoro sean konvenyentes. El Shabat ovliga el patron a dar tyempos de repozo al empyegado, asigun esta eskrito: “porque huelgue (se arrepozga) tu siervo i tu sierva como tu” (Devarim, V, 14). Las kondisyones de estos tyempos de repozo ke deven ser dados al empyegado son indikadas en las mitsvot ke van kon el Shabat, el anyo sabatiko i el anyo de yovel (Vayikra XXV, 1 a 18).

La idea de un salaryo minimum va kon la manera djudiya de ver, afillu si no va syempre kon una ekonomiya liberala, ama esto es otro lakirdi, mos dize el haham Garaï.

Ovligasyon del empyegado verso su patron

Es una mitsva para el empyegado de dar a su patron un lavoro dinyo de este nombre, asigun esta eskrito: ” Seys dias labraras y faras toda tu obra” (Shemot XX, 9). La ley rabinika travo de esto ke el empyegado es ovligado de dar un lavoro onesto a su patron. No deve, por egzemplo, dechidar de un tanit veluntaryo, porke su fuersa de lavoro seriya amenguada. No deve desharse embelekar durante su lavoro. No deve lavorar de diya para un patron i de noche para otro, porke no podra ser kapache para los dos lavoros en djuntos (Etikas djudiyas – en ingles – haham I. Mattuck p 102).

El empyegado tyene el derecho de kedarse de lavorar

El Talmud da al empyegado el derecho de kedar su lavoro, afillu en medyo del diya (Baba metzia 10a). De esto se trava el derecho de azer uelga. Ama este derecho no puede ser uzado ke despues de halizes negosyasyones entre empyegados i patron. Nada impide ke los empyegados se aunan en sindikatos.

El eskopo de la sosyedad deve ser el lavoro para todos

Rabi Yuda diziya ke “el lavoro es koza importante porke da dinyeda al ke lavora” (Nedarim 49b). Por esto es ke toda politika ekonomika deve tender verso el lavoro para todos para ke kada uno tenga una vida de benadam.

Vendedores i mushteris

Onesta en el komersyo

Es una mitsva de ser onesto en todo echo komersyal, asigun esta eskrito: “Quando vendierdes vendida a tu compañero, o comprar de mano de tu compañero, no engañedes varon a su hermano” (Vayikra, XXV, 14). De esto se trava ke los presyos se deven estableser en tenyendo kuenta de lo ke kostaron las ropas, el lavoro para fabrikarlas, i no solo para ganar paras. Asigun Rambam, es proibido enganyar a alguno kuando se vende komo kuando se merka, por egzemplo sovre la ropa (Mishne Tora Ilhot mehira XVIII, 3) Una de las kulpas por las kualas demandamos pedron en Kipur es la ke izimos en masa umatan (los echos).

El vendedor es responsavle de la kualita i de la kuantidad de lo ke vende.

Es una mitsva de ser onesto i responsavle de lo ke es vendido en su nombre asigun esta eskrito: ” Balanças de justedad, y piedras (pezgos) de justedad, fanega (mezura de likuidos) de justedad, y medida de justedad sera a vos, yo Adonay vuestro Dio, que saqué a vos de tierra de Egypto” (Vayikra XIX, 36). El profeta Miha mos dize ke las mezuras falsas son una de las razones de la birra del Dyo kontra su puevlo (VI, 10) i el Talmud insista sovre la responsabilidad del vendedor por lo ke es de la kualita i de la kuantidad de la ropa vendida (Hulin 94a; Hoshen Mishpat CCXXVIII, 6,) La responsabilidad del vendedor es esensyala. De esto sale la responsabilidad de el ke vende, mismo si tyene derecho de azerlo, kozas ke meten en sekana la vida del mushteri o de otra persona. Entran en esta kategoriya las drogas o las armas.

El mushteri deve komportarse kon onestad

La Mishna mos kombida a komportarmos kon onestad en tanto ke mushteri. Ansina dize: “No se deve demandar el presyo de una koza si de toda manera no se tyene dinguna entisyon de merkarla (Baba Metsia IV, 10), porke esto podriya enganyar el vendedor ke podriya pensar ke muestra entisyon es de merkar la koza de la kuala demandimos el presyo. El tyempo del otro es tambyen una koza ke devemos tomar en kuenta. Demandar una informasyon sin entisyon de merkar entra en la kategoriya de onaat devarim: palavras enganyaderas.

La uzura es proibida

Es una mitsva de no praktikar uzura, asigun esta eskrito: “No tomes de con el logro ni usura…A tu plata no des a el kon logro” (Vayikra XXV, 36-37) i “Quando plata prestares a mi pueblo, a el pobre contigo, no seas a el como adeudan (uzurero), no pongas sobre el logro” (Shemot XXII, 24). Esto no vale solo para las paras, ma para todo el dominyo komersyal: “No logres a tu hermano logro de plata, logro de comida, logro de toda cosa que lograra” (Devarim XXIII, 20). La kondenasyon de la uzura vyene en munchos tekstos del Tanah (Yehezkel XVIII, 17 i Teilim XV, 5) i la Mishna diskualifika komo testigo el ke aze uzura (Sanhedrin III, 3). Oy es evidente ke el sistema bankaryo toma un interes sovre la moneda, ama la interdiksyon de la uzura, kijo dizir un interes mas de la norma, keda valida. Ansina la Mishna aze la apartasyon entre un interes razonavle i un interes demazyado (Baba Metsia V, 1).

I agora ayegamos a la Etika medikala

Medikos i hazinos

Los tinos medikales son una ovligasyon para todos

Es una mitsva de tomar tino de su puerpo i de todo lo ke podriya azer danyo a la salud, asigun esta eskrito: “Sey guardado a ti, i guarda tu alma (vida) mucho” (Devarim IV, 9). Los hahamim travaron de este pasuk ke no es permetido de azer danyo a su integridad fizika i ke todo deve ser echo para guadrar su vida (Baba Kamma 91b). Esta interdiksyon no vale solo para la auto-mutilasyon o el suisidyo, sino a todo lo ke puede azer danyo a muestra integridad fizika o psikika, komo uzar drogas. Los egzersisyos fizikos i los ke permeten de mijor bivir son muy akonsejados. Rambam mos dize ke “es segir los kaminos del Dyo ke tener un puerpo sano i intakto…Por esto kale fuyir todos los uzos negros para el puerpo i tomar un buen rejimen para la salud” (Mishne Tora, Ilhot Deot IV, 1).

Responsabilidad partikolar de los medikos

Para el ke es kalifikado, es una mitsva de kurar a la djente, asigun esta eskrito: “Y melezinar fara melezinar” (Shemot, XXI, 19). De este pasuk travaron los hahamim ke el mediko ke tyene la kompetensya de menester “deve verse dado el dever de kurar” (Baba Kamma 85a). Esta ovligasyon kae tambyen sovre toda persona ke tyene un ofisyo en el dominyo de la salud.

Prioridad absoluta de salvar vidas

Komo kada ser umano tyene un refleto divino, salvar una vida vyene antes de toda otra mitsva, “porke no ay mas importante ke salvar una vida i en este kavzo toda interdiksyon es baldada, salvo las ke tokan a la idolatria, el insesto i la matansa” (Yoma 82a). Por esto es ke el dever de un mediko es de todo azer para alargar la vida de un hazino en la dinyidad (Pesahim 28a-b).

Dingun menester de ser siguro

“Rabi Yuda disho en nombre de Rabi Shemuel: kuando es de salvar una vida, se puede no segir la mayoriya” (Ketubot 15b). Si el mediko pensa puever traer una alivyanadura al hazino por otra manera ke la rekomendada por la mayoriya de sus kolegas o la ke sale de la probabilidad, si esta manera no mete mas en sekana la vida del hazino, la puede azer. Este prinsipyo i el de antes permiten de justifikar la bushkedad medikala i el aprovamyento de muevos remedyos.

Impedir antes de kurar

La alaha insista sovre la ovligasyon de akavidarse kontra los akidentes. De esto se puede travar ke kada uno tyene la ovligasyon de azer todo lo ke kale para impedir toda degradasyon de su integridad fisika o psikika. Por esto es ke los ke kuran deven partisipar a las kampanyas de prevensyon kontra las hazinuras i sensibilizar la djente sovre esta kuestyon.

Alivyanar la dolor

La refua (guérison) no deve ser el solo eskopo par los ke kuran. Deven tambyen dar al hazino el maksimum de komodita, sovre todo el ke sufre de una hazinura ke no se puede kurar o ke se topa en kavo de vida.

Se puede tambyen travar de esta ovligasyon la de akompanyar el kondenado a muerte, dandole, asigun lo rekomanda el Talmud, “una kupa de alkool fuerte” (Sanhedrin 43a, sitando Mishle (Proverbyos)XXXI, 6): “Dad sisra al perdien, y vino a amargos de animo”)

Eutanaziya

El djudezmo kondena la eutanaziya aktiva. El Shulhan Aruh mos dize ke “nada deve ser echo para aserkar la muerte”  (Yore Dea 339:1) Portanto munchos tekstos van a la kontra de toda sanya medikala (acharnement thérapeutique) ke permiteriya de mantener en vida de manera ke no es naturala uno ke se esta muryendo. Se puede sitar komo egzemplo el teksto ke sige: “Kuanto Rabi Yuda Anasi estava muryendo, sus dishiplos se auneron para orar i atrazar la ora del apartamyento de la alma i del puerpo. Una mosa, vyendo ke esto adjuntava a las sufriensas de Rabi Yuda Anasi, suvyo sovre el tejado i echo una koza. El bruido tomo la atensyon de los dishiplos ke se kedaron un momento de orar. Fue estonses ke la alma de Rabi Yuda partyo de su puerpo i ke muryo en paz” (Ketubot 104a). El Sefer Hasidim (tredjen siglo) mos dize ke “si una persona muryendo te demanda de apresurar su muerte, no deves azerlo. Ama dinguno deve meter sal sovre su aluenga  para guadrarlo mas tyempo en vida” (meter sal sovre la aluenga era reputado alargar la vida).

Agora la etika de las gazetas

Los gazeteros i el publiko

Los gazeteros deven ser onestos

Malahi mos dize ke el diskorso del cohen deve ser “ley de verdad” (II, 6). Oy la influensya de los gazeteros es grande. Por esto es ke deven azer muncho dikat antes de espandir una informasyon. Es kon esta idea ke los hahamim disheron “el ke dize koza en nombre de kyen lo disho traye rinmisyon al mundo” (Avot VI, 6), porke en mizmo tyempo se akavida de la vedra de sus dichas.

Los gazeteros deven fuyir toda korrupsyon i todo empusho

Sus dichas pueden yevar munchas konsekuensas a las kualas puede ser no pensaron. Espandir falsas informasyones o rumores sin fundo puede ser komo aprovechar la flakeza de alguno, lo ke es kontraryo a la alaha, asigun esta eskrito: “No maldigas sordo y delante ciego no des entropieço” (Vayikra XIX, 14). La prezentasyon de muestro universo komo un mundo de vyolensya da de la realidad una imajen enganyadera i puede yevar algunos en yerro, i mismo empushar a otros en komportamyentos sekanozos. Es de la responsabilidad del gazetero de no trokar la realidad. Se puede sovre esto sitar la palavra de Avtalion verso los savyos i los maestros: “Savyos, akavidadvos en vuestras eksplikasyones” (Avot, I, 11)

I agora ayegamos a la etika legala.

Djuzgadores i litigantes

Respekto de la ley

Es una mitsva de estableser la djustisya en la sosyedad, asigun esta eskrito: “Juezes  i alguaziles daras a ti …Juzgaran al pueblo juizio de justedad (Devarim XVI, 18) i ” Justedad justedad persiguiras” (Devarim XVI, 20). Este orden va en primero a las cortes de djustisya. Una sosyedad sivilizada es la ke save rejir los komportamyentos de sus myembros i impedir ke syertos se aprovechen de sus situasyon o pozisyon para impozar un orden ke les sea provechozo. El respekto de la ley kyere ke el kulpavle sea kondenado i el inosente blankeado, kual ke sea la pozisyon sosyala okupada por el uno i por el otro. En la lista de los fundamyentos de la sivilizasyon asigun Rabi Shimon, la ley, el derecho vyenen en primero, antes de la vedra i la paz (Avot, I, 18) (Aki, yo Edmond Cohen avro una paranteza para dizir ke en mi livro de orasyones eskrito por el haham Nisim Ovadya en Vyena en 1924, livro ke era el sidur de los sefaradim del kal Saint-Lazare en Paris, esta mishna del Pirke Avot esta eskrita en un otro orden: emet (verdad) din (justisya) shalom (pas). Ama es vedra ke sovre internet el Pirke Avot ke me fui a bushkar no es ansina: el din vyene en primero, komo en el artikolo del haham Garaï. Deke Nisim Ovadya lo metiya en sigundo, no lo sé, i komo se muryo en 1942, tengo la negra impresyon ke nunka lo savremos…syerro la paranteza). El establesimyento de kortes de djustisya es una ovligasyon esensyala para toda sosyedad i aze parte de las syete leyes de Noah, leyes fundamentales para toda sosyedad (Sanhedrin 56a).

Aki me tengo de kedar, i vos digo: al djueves ke vyene si kyere el Dyo!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: