Keridos Amigos
La letra estava yenna de buendad, de responsabilidad, de amor para los paryentes i las kreaturas, de lo djusto de esta vida, del dover, de lasovligasyones ke komporta la karyera de medisina ke no acheta de dinguna manera ni Shabat, ni hag, ni diya, ni noche, ni repozo, ni komida, ni teyatro ni boda o luna de miel a vezes…. I yo personalamente no kreyo ke es un pekado sin remedyo ke el Todo Poderozo va kastigar de manera la mas dura posivle.
Penso ke seriya muy triste si Di-o tan Kerensyozo desha las personas sufrir o deziluzyonar. Muestros paryentes ke mos keren ver, bezar i ser kon mozotros un kurto tiempo. Penso ke la edukasyon es en kaza i nunka kale deshada a la eskola.
Por sierto, el ke no tiyene doveres tan striktos i eskoje la vida de alta etika en indo asigun la tora-mitsvot, todo tiene un otro aspekto, doveres spirituales ke le inchen la vida kon valores idealas.
Es el idealizmo perfekto i difisil a obtener por una persona ke no se engrandesyo kon estos prensipyos, esta disiplina kontrolada striktamente durante la vida de kada diya i ke se puede ekstendir de manera a estrechar la libertad de la persona al maksimum si es inyorente, no aze lavorar su entendimyento i su lojika, mizmo si todo esta diktado i eksplikado kon munchos detalyos en los Livros de la Ley i las Eskrituras de muestros hahamim en Ganeden.
Lo ke me espanto de demandar, porke konosko la repuesta, es si no ay un kamino “shvil ha zaav” entre esta alta etika i una persona “buena ke kreye, tiyene emuna, adora su Di-o, el Kreadoro Todo Poderozo, tyene una vida sana i derecha, no aze dingun mal, observa los 10 Komandimyentos (Komo goyes !)
Ser djudyo, me esto ambezando, es ser uno de Su puevlo eskojido ! I esto esta demando una otra manera de esfuerso ! Esta vida etika ke mos viene tan difisil no se deke….
A mi me espanta ! No kero pekar…
Voluntaryamente ! De otra vanda so djudiya i a mi puevlo le kayo de bivir ansina por ke es El ke mo los amostro, mos dyo las restriksyones i mos enalteso kon estas etikas a un lugar diferente a sus ojos…
Mos alimpyo del resto de los humanos, mos dyo un privilejyo ke pagamos karo kon doveres a observar siempre, una vida entera para ken empesa des de ke es un bebe…Una vida sosyal intensivamente kon la kehila endjuntos, muncha famiya, kreaturas, tradisyones de fiestas, tradisyones de bodas de luto, el erev shabat i el shabat, epokas en el anyo komo en Pesah en yamim noraim i Hagim ke nesesitan alta enerjiya, salud, buen humor, tiempo, pasensya i fuersa….
El djudyo no puede tener el lukso de bivir retirado del mundo mizmo si esto es su plazer !
Es un echo el ser djudyo…I komporta todo el saver etiko, sosyal, kulinaryo, psikolojiko i mas i mas….No puedes kerer espandirte i durmir !
Ay de….. Ay de….Kale……Ser djudyo no es para los haraganos ! Los mizantropos !
Los a-sosyales, los hazinos psikolojikos, o los hazinos, los ke no keren kansarsen i no les plaze kaminar, fiestar….Es in trokamiyento drastiko no de kreensya, porke 99,99 % no tyenen problemas kon esto ma kon lo resto ! Iiiiiii el problem no es el ombre ke lo tiyene ! El se viste i se va al kal, aze su dinim sus orasyones….. fasil.
La mujer ? Oy ve ! Lo ke la aspera en su vida ! Lavorar bebikos de engrandeser i…. i…….O te vaza konsentrar solo en tu vida de altos prensipyos…Vale ! La limpyeza, el orden en la kaza, el kudyado de si-mizmo, el tyempo ke kale konsakrar a engrandeser las kreaturas (i yo no avlo de darles a komer i banyarlos i vistirlos solo !)la kozina, el lavado el fregado el uti, la vida sosyal, el merkado, el marido (kale dar le tyempo i a el i no estando kansada i enfasyada !!!) la famiya a vijitar a kudyar… 2 famiyas !
i Meldar ? eskrivir ? brodar, hobbies, un filmo o una piyesa de teatro, un opera ? Andar a kaminar i azer sport ? Kale diyas de 40 horas !!!! Ansiiiiii, sin las ovligasyones etikas no abasta el tyempo a ken kere abastar a todo, Alora komo lo azen ? !!! Ademas yo !!!
Si veygo un polviko o una koza no a su lugar i no todo komo se deve empeso a baylar ! Ayyyyyyyyyyy No se ! El Di-o da la pasensya i el tyempo para todo. Ke lokura de kazarse i tener kreaturas ! Ay tantas kozas interesantes de azer ! Va ugrasheya kon ande te fuites, deke izites, porke gastates, de ke no yamates, porke durmites i mili un porke i deke ke te kome la alma ! Si no ay deke i porke es ke el no esta ! Deke no esta ?
Lo del penseryo de “ande esta ?” es otra mirikiya ! Aravyarse i pletos i inyervos otra koza !!!! No se yo ! Parese ke me ize muy vieja i todo me esta vinyendo mas difisil ke es en verdad…. Deve ser ansina sino komo todos biven ? El Di-o ke les de todo bueno !
Grasyassssssssss mil a mi Kreador ke me izo la mujer la mas horoza, la mujer ke tyene todo lo ke dezeya, kontente de todos i de todo a su doredor kon alegriya i amor en su korason, un meoyiko ke lavora bastante bueno i muy kerida de su ijiko i de todos los ijikos ke engrandesyo, todos unos i unos lo mijor ke puede ser ! allelluya ! La salud se va ir i tyempos duros vana vinir, kon bueno ke seya, esto asperando mi torno…Va ser no muy tadre i me vo ir de este mundo ringrasyando mi Di-o por todo lo ke me dyo, me izo VER, SINTIR, OYIR, KAMINAR, VIJITAR, AZER, REUSHIR, GOSTAR, PENSAR ESKRIVIR i lo mas el AMOR i la BUENDAD i la RIZA , el KEYF, la INTELIJENSYA i el OPTIMIZMO ke metyo en mi, me regalo para ke goze i de a gozar a munchos.
Shavua tov, bendisyones, salud i munchas rizassssssssssssssss i amorrrrrrrrrrrrrrr para vozotros todos.
Artículos Relacionados: