LA SEGUNDA PARTIDA
de LA LUZYA DE NEWYORK
Holaaaaaa Buenos diyas todos !…..
Entre munchos letras ke arresivi a mi kuento aviya una muy ermoza ke no entendi tanto porke era en inglez tan alto ke me dyo mareyos ! Por seguro ke kije dizirle mersi a este sinyor tan bueno … Komo no ?… Es verguensa dospues de tan ermozos de biervos de no dizir ni un mersi !
Ya le iva embiyar tambien un tepsi de biskochikos, si me kedava a mi, ma esta, la miya, se esta tornando en pimyenta korolada kada vez ke avro la boka o kero azer una koza !
Bre mujer…. Ke ay de azer de una pulga un gameyo kada vez ! Ande esta el mal ? Vos demando a vozotros ! Ke ay de negro de kerer embiyar biskochikos a uno para remersiarlo ?!!!! Bueno…. El disho en su letra ansina :
“This is quite a profound metaphora! It is richly fraught with symbolism and a Swiss Rohrschach psychologist could have a doctoral dissertation from it just explaining the poetic contours embedded in it.
I look forward to your continuation, dear. !”
Ermozo, no ? SUPER ! No se kere entendido kada biervo para saver ke es una letra de grande alavasyon ! Mizmo eya me disho tambien ke es vedra ! Dunke tengo razon. Yo le respondi ansina i espero ke mi repuesta vos va plazer :
(Porke me dishitesh ke vos konte mas es ke vos esto eskrivyendo mi repuesta a el !)
El merkado de Lod o otra kozika vos vo kontar una otra vez si keresh, no agora ! No puedo azer dos kozas en el mizmo tiempo… No ? No es fasil eskrivir mis “memoires” !
Kerido Sinyor
Kero empesar por dizirte a VOZOTROS ke estava segura ke se topariya en un lugar una persona komo se deve ke no iva riyir tan dezgrasyamente de lo ke konti kuando estava en akeya sivdad Amerikana de nombre New York. Kije dizirte a VOZOTROS, una grande persona kon PD.H i otras kozas ansina en su estimado i santo nombre un grande mersi, abokandome delantre tu saver de VOZOTROS.
Muncho no entendi muy bien los biervos alavandome i mis memorias porke eran en Inglez ma suonavan muy ermozo a mis orejikas. Es de aya ke entendi ke VOZOTROS me estas komplimentando i fui muncho kontente de esto. VOZOTROS saves ke no era kolay para mi de eskrivir mis “memoires” (me disheron ke se dize ansina kuando konto lo ke me afito !) i meti en un kuadro tus santos biervos
METROPHORA RICH
(ke es riko, esto ya se… Deve de ser pormodo de mi pardesu blanko muevo. Ma, riyete kon mi ! En LOD lo merki muy barato ! No so una de
estas rikinyonas nevyorkliyas)
FRAUGHT
dingunos no supyeron dizerme lo ke es en Lod. Lo mas savemos dizir I love you , Do you speak English, What is your name, This is a pencil. Yo se tambien… Parese komo el nombre de un muzeo de esta sivdad ke fui. Pekado no lo vide ! Ande esta ? Por seguro en la sira del Central Park.
Sin olvidar te dire ke me namoriiiiiiiiii por las arabas kon los kavayos !! Si tengo parayikas a la otra vez ke me vo ir (No kreyo ama ken save komo torna la vida) me vo asuvir, ansina kon keyf, para ke me kaminen! Ke tienen las otras mujeres mas de mi No ?
SYMBOLISM
fue el biervo ke me plazyo lo mas ! Este lo eskrivi en korolado. “Ism” i una koza, es lo ke oyi de un doktor ! Deve de ser una palavra de kultura!
Muncho mersi de vedra. No es ke tengo muncha kultura ma de en vez en kuando ya me dizen ke so mas hahama de las otras mujeres. De SUSAN
por siguro ke so mas hahama ! Eya es un troncho ! De Madam Viktorya tambien… Dize ke no tiene antojos ! No lo digas a dingunos, ma yo se ke no save meldar la Madama ! Se averguensa i no lo dize ! Yo lo diriya ! Ke ay en esto? Rovi ? No ! Mati ? No ! Me vieron kon “pokos” vistidos? No ! Alora ?
EL DOKTOR ROHRSCHSHAHCH
no lo konosko ! Ni kero konoserlo porke nunka puedre dizir su nombre.
Dezmazalado ken le dyo este nombre ! Mira…..Yo kon doktores no me dize muncho ! Una vez tuve una dolor de garon… El Di-o ke te guadre !
Me fui al doktor muestro en la koshe aki. Me kijo azer una injeksyon ! Ayyy No Sinyor ! Yo no avro mis poraki i mis poraya a todos ! Ke le aga la injeksyon a su madre ! I se lo dishe ! Se apunto el Musyu i me disho ke no keriya paras i ke puediya ir a un otro Doktor. Otra vez ? El Di-o ke no me trayga ! Bevi limon buyido, komi portokales i supikas kayntes me paso ! Ke ay en esto ! Yo se sanarme mijor ke el doktor. Todo viene del Di-o i se kura kon las kozas ke se komen. Ansina diziya mi nonika i teniya razon komo siempre !
NO NO NO KOMO SIEMPRE !
Aviya vezes ke no teniya razon del todo ! Ke razon teniya kuando me embiyava al bakkal dos i mismo 3 vezes Eh ? Porke se olvido de dizirme
de merkar 3 gueyvos… Aydeeeeeeee otra vez vate ! Se olvido de dizirme medyo kilo de sevoyas.. Aydeeeeee otra vez vate ! Se olvido de dizirme 100 gramos de azetunas pretas ? Aydeeeeeeee a la kaye ! Lo ke travi de mi nona porke se olvidava kozas dezmazaladika ! Me parese ke no le plaziya gastar todas sus parayikas en una vez ! Avagar avagar le viniya mas konveniente ! Yo la amava i no diziya nada… Si era otra persona ? Naaaaa la charruka en la kavesa ! I naaaaa otra vez kon la sigunda charruka !
No sinyor el PSIGOLOKO yo no tengo de menester…..
No entendi deke lo dizes ! PSIGOLOKO para esta de aki ! Yo, bendicho el Di-o, esto sana i rezya i entera ! No me karishtireyes kon esta ! Es eya ke es medya trololo !
(Entre mozotros ke kede yine ! No me plazeriya ke sepa ke esto dizyendo ansina de kozas detras de su espalda !)
DISSERTAT….
No me plazyo tambien. No entendi ke kijites dizir.. Si es bueno o negro. No me suono ermozo a las orejikas. Puedeser lo dishites para dizirme ke mi eskrito te vino komo una savor de boka ? EL DESSERT ! En Franzesko ?
Ma fui enkantada de ver el POTEIC CONOROUTS. Esto lo eskrivi tambien en korolado. Esto segura ke kon este biervo me alavates muy muy muncho. EL Di-o ke te lo page a VOZOTROS en parayikas. Grasyas grasyas mi Sinyor muy respektado. Bendicho hombre sos i muncho mersi otra vez por VUESTRA alta konsiderasyon de mi persona.
Perdoname VOZOTROS si tengo unos yerrizikos si ?
PS Ayyyyyyyyyyy ke plazer ke tendriya si VOZOTROS me eskrives otra ves para mi sola.. Si ?
Artículos Relacionados: