Un relato del Rabino Issocher Frand
eskrito i editado por Sharope blanco
AMOR SE PAGA KON AMOR !
Agosto 2001….
Un grande empresario de New York viaja a Israel por echo. El 9, un Jueves entre dos reuniones, sintyendo ambre, el hombre entra en la pizzeria Sbarro, en el sentro de Yerushalayim. El lugar estava yenno i aviya una grande fila de asperar antes ke venga su torno. Un Israeli, remarkando ke el turisto no saviya ke azer para akurtar su tiempo de aspera, le ofresyo de pasar delantre de el. Muy agredisido el
Amerikano aksepto la jantiyesa… Komyo i presto presto se dirijo a su tresera reunion.
No aviyan pasado dos minutos ke se oyo un terrivle bruido vinyendo de la pizzeriya Sbarro de ande viniya de salir ! Un terroristo se aviya suisidado en azyendo eksplozar una bomba kon si-mizmo ! Ademas la bomba konteniya klavos para augmentar su poder destruktivo, para ke kavze mas danyo i mate mas personas ande iva eksplozar….
El lugar torno a un infierno ande la gente gritavan dezesperamente, yoravan, unos tratavan de ayudar, se viyan polises i voluntaryos kon la sangre ke eskuriya de los firyidos, madres kon sus kreaturas en sus brasos ke korriyan por todas las partes
alokadas de espanto… La kaye yenna de firyidos i de muertes…
Akel diya, a parte del terroristo de 23 anyos, 12 personas peryeron sus vidas -6 chikos entre eyos- i kontaron 90 firyidos, algunos en estado muy grave ! La pizzeria estava totalmente destruyida.
El turisto amerikano bushkava su salvador ke lo aviya salvado de la muerte en azyendolo pasar delantre de el… No lo enkontrava en dingun lugar.
Las sirenas estavan espedasando los oyidos ! Se disho ke iva ententar todo lo possivle para topar el mansevo Israeli i agradeserlo por su vida. Se olvido de la reunion i de todo el resto ke lo preokupava. La sola koza ke importava por el
era de topar el ke estava bushkando.
Por fin lo topo en un hospital ma firyido muy livyanamente…. No saviya komo reingrasyarlo ! Le dyo su karta de vijita i le disho ke seriya muy felis si puediya ayudarlo de kualker manera en kavzo ke lo nesesiteriya… Le rogo de azerlo un
sinyo en menester.
Un mez dospues afito ke el padre de este mansevo deviya operarse de emergensya. El chiko se akodro del Amerikano i le eskrivyo demandandole si puediya
arranjar un enkontro kon un chirurgo en Boston ande ivan a viajar kon su padre.
El Amerikano pishin koryo, topo el chirurgo, se metyo de akordo kon el mijor hospital de Boston, nombrado por este tipo de operasyon i preparo todo en pokos
diyas. Insistyo tambyen a viajar a Boston para arresivirlos el-mizmo en el aeropuerto.
Era el Martes, 11 de Septembre 2001…. A las 9 h.00 el empresario no estava en su ofisina en el pizo/etaj 101 de las famozas torres jumelas de New York…. Deviya asuvirse al avion para ir a Boston i arresivir sus invitados ! …..
Akeyas torres ke no egzisten mas oy i ke dezaparesyeron kon mas de 3000 muertos…. Sin kontar las 16,000 personas ke dayinda sufren de los umos i del polvo toksiko ke kovijo toda esta rejyon. La paga aviya yegado a tiempo !
Artículos Relacionados: