Egziste dentro el korason
Una boz misteryoza kom’un violon,
Una luz ke briya, una kalor ke arekaynta…
Ke amaha i kalma el friyo de la muerte
los ventos i la oskuridat de la noche.
Asemeja al primer grito del muevo nasido,
Las kolores bivas del dulse parparo,
Guertas yennas de rozas kon perfumo,
Los primeros dezeos de un mansevo,
Una chika tremblando a su primer bezo,
Las lagrimas tivyas i la mirada del ojo,
La emosyon kuando su mano toma tu mano.
En un lugar, no muy leshos,
Ande diya i diya sonyas
No en las kayes i los kampos,
No en medyo de las personas,
Ande topas la paz i las alegriyas.
Ande tu korason kanta
Estas libre i todo te abasta.
Sientes ke estas serka las estreyas
Bolando ensima de las nuvlas
En el sielo azuro i sin alas…
El lugar ke no tiene nombre
Muestra kaza, rika o prove
Ande guadramos muestras esperansas
Eskondimos las penas i las ravyas..
Se yama el Paradiso para los unos.
Aki, en esta tierra i no en otros mundos !
En la splendor del sol i de sus rayos,
Noches klaras de luna tan serka i tan leshos..
Artículos Relacionados: