UN KURTO REZUME HISTORIKO
Los Sefaradim son los desendientes de los Judyos ke bivyeron en Espanya i en Portugal i fueron ekspulsados entre 1942 1 1497. Obadia el siervo del Di-o, el kuatren de los profetos minores, el Livro delkual es el mas kurto de las ovras profetikas -no kontiene mas de 21 versetos – mensyona ke los egzilados de este braso de los Ijos de Israel ke se dispersaron de Canaan fina Caretat, i los egzilados de Yerushalayim, dispersidos en Sefarad, posederan las sivdades del Sud (de Judea) 1-20
Asigun Margolis i Marx (History of the Jewish People, Jewish Publication Society of America, Philadelphia, 1947) Ovadia apunta la sivdad de Sardes en Lydia (Asya Minor). Saint Thomas d’Aquin (1225-1274) la identifia al Bosphoro. Cecil Roth, el famozo historiana plasa Sefarad en Aspamia (Asya Minor) Ma des del empesijo de la Edad Medya, Sefarad desinya definitivamente la Espanya i el Portugal, ande la prezensya Judiya, asigun la tradisyon, asuveriya al tiempo del renyo del Rey Salamon (973 a 930, antes de la Era Komun.)
A la konkista de los Arabos en 711, los Judyos de Espanya se meten en kontakto kon los sentros ke rijen la Ley en Babylonia, en adaptando sus tradisyones. Entre el 8 en i el 12 en siglo, los intellektuales, filozofos, poetos, dirijentes del estado, los ke rejen la Ley, dieron nasimiento a una Edad de Oro ekstraordinaryo.
Es remarkavle komo esta epoka fue benefisiante para el Islam i el Kristyanizmo…. Los Judyos jugando el rolo del mekanizmo de transmision en el seno i afuera de la Eskola de los traduktores de Toledo, trusheron, a los unos i a los otros , las sivilizasyones Gregas, Latinas i Orientales.
Los Almohades persekutaron los Judyos en 1148 : Los fanatikos propozan la konversion o la muerte. Los Judyos se fuyen los unos al Norte de Afrika, los otros a las zonas Kristyanas.
El puevlo se va detras de Ferrant Martinez, el Sevilyano, ke demanda la destruksyon de ventitres sinagogas en sus territoryos ansi ke el izolamiento de las moradas Judiyas para ke no puedan metersen en kontakto kon los Kristyanos.
Los tiempos diffisiles empesan des del 4 de Junio 1391 i todo va de mal a mas mal en los Reynados de Castilla i Aragon. Los Judyos deven de abrasar el Kristyanizmo o murir.
Son muy munchos los ke se konvyerten de fuersa, los muevos Kristyanos i kontinuan en sus ritos Judios. La Inkizisyon i las autoritades Espanyolas desidan kon el Edito de Marzo 1492 (i va kedar en fuersa fina el anyo 1968) de ekspulsar todos los Judyos. Entre dosientes i tresientos mil almas toman el kamino del egzilyo. Las destinasyones son el Norte de Afrika, Fransya, Italya i el Emperio Ottomano… La biervos del Sultan Beyazid II (1447-1512) kedaron gravados en la Historya komo :
“Los yaman Isabella de Castilla i Fernando de Aragon, los Reyes Katolikos. Savios estos ke renden sus estados povres i enrikesen los miyos ! Avro las puertas del Emperyo a los refujiados Judyos de Espanya. !”
Los grandes de la Puerta Majestuoza -el Palasyo de Topkapi – enkorajan la venida de los Sefaradis. Les rekonesen privilejios para fasilitar sus entegrasyon i developar sus sityos, los installan en las prensipales sivdades del Emperyo : Salonika, Rhodes, Alepo, Cairo ke ganan una elita intellektial i kommersante.
(Moise Rahmani, “Rhodes, una partida de muestra memorya ” Edisyones Romillat, Paris 2000, oja 28)
Unos preferaron pasar al Portugal de ande seran rechesados sinko anyos mas tadre.
En sus bogos, los refujiados yevan sus linguas, sus ritos, sus romanses, sus kultura i las kostumbres en sus kozinas.
Entre los muevos Kristianos ke kedaron en Espanya i en el Portugal, munchos kontinuaron a profesar el Judaizmo en sekreto. Los Marranos, una terminolojiya pejorativa ke sinyifika por unos “puerko”, para otros, forsados a konvertirsen o hipokritos, se dirijaron a los Payizes Bashos (Beljika, Hollanda) des del siglo 16, a las tierras konkistadas por los Espanyoles i los Portuguezes en el Muevo Mundo o a la Inglaterra i a la Amerika del Norte.
La komunitad Judiya prospera en los Estados de Amerika nasyo en 1654 en la Mueva Amsterdam, el New York futuro kon ventitres Judyos del Brazil fuyendo de la inkizisyon ayi. A la fin del siglo 17, kuaji la mitad de los dosmil Judyos del Norte de Amerika eran Sefarades.
Mizmo si reprezentan la majoritad de los Judyos en la Edad Medya, se ve ke se aminguan de diya en diya. Antes ke empese la Segunda Guerra Mundial aviyan kinze mil Judyos Ashkenazes i un million i medyo de todos las otros Judyos, inkluido los Sefarades.
Maimonides no tiene sospechas i afirma ke los Sefaradim vinyeron de Yerushalayim. Kon esta asertasyon los Sefaradim “tahor”, los Sefaradim otentikos, rikos de un gloryozo pasado i ke siempre avlan el Judeo Espanyol o ke son desendyentes de los avlantes de esta lingua, se ven komo la aristokrasiya del mundo Judyo. Conrad Franco, orijinaryo de Turkiya a la kavesa de la Komunitad Israelita Sefaradit de Bruksel, ya aviya avertisado en 1965 el ke iva tomar su lugar, Maurice Renons, emigrante de Salonika “Nunka te olvides ke kada Sefaradi es un Prince !”
Nombrozos fueron los Judyos ke traversaron el Mediterraneo fuyendo de los Almohades ke aviyan konkistado la Espanya. Estos Judyos toparon azilio en el Marok, en Algeria i en la Tunisia. Eyos fueron los primeros Judyos de las komunitades prosperas futuras en estos payizes.
Konosemos la saga de Maimonides, el Rambam, refujiado de Kordova a Fez i dospues en Egypto. Sinyava kon orgulyo sus ovras, eskritas en major partida en Arabo : Moshe Ben Maimon, el Sefaradi.
Lo mas del tiempo, los “megurashim”, los muevos arrivantes, eran mas ambezados de los Judyos ke biviyan en estos payizes i dunke los superaron dospues de poko tiempo de sus yegadas. Sus kostumbres, sus ritos i sus linguas, el Espanyol del Siglo 15, se impozo prinsipalmente en los Balkanes. Salonika fue adornada de muevas sinagogas para las komunitades ke vinyeron de Castilla, de Aragon, los Catalanes, los Sisilianos. Las komunitades Romaniotas de Gresya i de Rhodes avren sus brasos a los egzilados de la Peninsula Iberika. Debarkan en Egypto, se arekojen en Syria, en Palestina, yegan al Emperyo Ottomano, el duenyo de la majoritad si no de todas las partes del Medyo Oriente i de los Balkanes, akeyos ke koshkiyaron la Europa oksidental i assiejaron Vienna salvada de ser konkistada in extremis al siglo 16.
Judyos yegan a Fransia i a la Italia. Unos otros, no keren kortar definitivamente sus raises Iberikas, se installan en Anvers i en Amsterdam. Los payizes Bashos dominados por los Espanyoles son mas tolerantes para los persekutados. Hamburg tuvo una komunitad prospera i durante muncho tiempo los “mahzorim” los livros de orasyones meldados en las komunitades Sefaradis seran emprimados en Vienna, un otro sentro Europeano de la kultura Sefaradi.
Amsterdam sovresale kon intellektuales komo Spinoza, Uriel de Costa, Menasse ben Israel, Daniel Levy, konosido komo “el Kapitan Miguel de Barrios” de orijin Espanyola.
Salonika puede alevantar su kavesa por ser yamada “la madre de Israel” pormodo de sus nombrozos hombres de Lettras ke le dan valor, komo Salamon Alkabetz, Isaac Adarbi, Mise Almoznino, Samuel de Medina…
En el Marok i en el Medyo Oriente las komunitades son grandes. Los egzilados forman sus proprias komunitades. Son orguyozos i miran de alto a los Judyos arabofones. “Los Grandes” por egzemplo ke son los Judyos de Livorno ke emigraron a Tunisia en el siglo 18 se demarkan de los “Tonsi” del puevlo lokal. Kada una de estas komunitades tendran sus proprios Bet-Din, el tribunal Judyo, sus kasapes (karnaseros) kasher, respektuozos de las Leyes Alimentarias i mizmo sus proprios simetaryos. Uno de Livorno por egzemplo pensariya ke seriya un kazamiento non dezeado si uno del couple (pareja) no era de los suyos. Esta situasyon iva durar fina el empesijo del siglo 20
Kon los anyos ke pasan, si los Espanyoles no son muy nombrozos, empesaran a derritirsen en medyo de las komunitades egzistantes, olvidandosen de sus linguas, el Judeo-Espanyol. En otros absorbaran los otoktonos ( indigenos).
Para fuyir de las duras leyes de la dhimmitud (estado de los Judyos i de los Kristyanos ke biven en los payizes Muzulmanos) en los payizes dichos Arabo-Muzulmanos, munchos pasaron a una nasyonalitad etranjera. Esta distinksyon entre los payizes Arabos de la Peninsula Arabika i los payizes dichos Arabos es obligatoryo porke en estos se topan solo una minoritad Araba. Estas tierras fueron konkistadas en el siglo 7 de la parte de las tribus vinidas de Arabia. Dingunos se olvidaron la leyenda de Kahena. la Reyna Berber ke dizen ke era Judiya, i ke salyo kontra los invadores ke ovligavan a la konversyon al Islam o la muerte a los puevlos otoktonos, siguidores del monoteizmo o no.
Durante siglos, las kulturas lokales Amazighes, Berberes, Kurdes, Koptes, Assyrianas, Nestorianas fueron derrokadas pormodo de las tribus Arabas invadores. Las tribus Kristyanas formavan en estos tiempos la majoritad de la povlasyon ke aviyan ofresido tanto al Kristyanizmo. (Tetullien, San Augustin, San Cyprien, San Fulgence eran todos del Marok….) i fueron forsados a abjurar para salvarsen del masakro.
El berkalyo del Kristyanizmo, el Medyo Oriente, se dekristyanizo.
Al siglo 19, los grandes poderes oksidentales – la Fransya, la Inglaterra, l’Italya, la Austro-Hongriya tienen en el tino de azer pujar sus influensyas en tierras del Islam. Kon este motivo no hezitan de akseptar de dar sus nasyonalitades a los Judyos para defender sus interesos kommersiales. Los Judyos, akseptaron immediatamente este avantaj, kontentos de salvarsen de esta manera de la charia, las leyes duras para la vida de kada diya, i sin piadad para los ke no son de esta fe, “los dhimmis” – puevlos protejados del Livro, Judyos o Kristyanos ke merkan kon el impuesto de kapitasyon, el djeziyah, la proteksyon del dirijante.
En la segunda mitad del siglo 19, en siguida a las pressiones ke se izyeron sovre “La Puerta Majestuoza” , las autoritades lokales de los payizes del Oksidente ke okuparon los payizes Muzulmanos, el estado de Dhimmi fue abolido en los tekstos. En la pratika toma mas tiempo. Los ke no son Muzulmanos se izyeron ofisyalmente sivdadanos kon derechos iguales i pueden legalmente asumir kualker puesto. Para los Judyos empesa una mueva vida i un muevo desorollo.
La situasyon troka des del empesijo de la Segunda Guerra Mundial. La deklarasyon de Balfour alumbra las tensiones, portanto fue bien resivida de la parte de los payizes Arabos. Konosemos las deklarasyones favorablas a una entitad Judiya sovereyna de los dirijantes Syrianos, Transjordanianos i Irakianos.
La abolision del status de Dhimmi no trayendo un trokamiento, el meprizo kon elkual los Arabos tratavan los Judyos, salyo otra vez en medyo. Komo un puevlo konsiderado ayer solo de segunda kategoriya, ke se puediya arrondjar o maltratar komo les viniya, puediya aspirar a la independensya i ser tratado de igual manera ?!! Progromes i matansinas empesaron en Irak, en Libya, en el Marok i en Egypto.
Kon la desizyon de repartir la Palestina en 1947 i la kreasyon del Estado de Israel en Mayo 1948, suonan de muevo las kampanas de la muerte por esta kohabitasyon, lo mas diffisil, ke data – nunka lo repeteramos bastante- de antes de la invazion Araba del siglo 7. Porke, komo ya lo vimos, los Judyos moravan en estas tierras des de mas de vente siglos.
Analizimos este egzilio ke se olvido, se okulto, se empidio ke se sepa mas vedra, i ke toka mas de un milion de Judeos Espanyoles morando en los payizes dichos Arabo-Muzulmanes en muestro lavoro “El EXODUS OLVIDADO, JUDYOS DE LOS PAYIZES ARABOS” Edisyones Raphael, Paris 2003.
En muestros diyas, no kedan mas de 4200 Sefaradis en estos payizes de loskualos 2500 en el Marok i 1500 en Tunisia. De la komunitad Irakiana, Babylonia de la antikitad, ande la prezensya Judiya es attestada des del tiempo de Nabuchodonosor en 587 antes de la Era Komun, kedaron solo un punyado de Judyos… 20 Judyos a lo mas… En Egypto manko de 50…
80.000 en Amerika
30.000 en Canada
20.000 en Beljika, Hollanda i Inglaterra
20.000 en Iran
20.000 en Turkiya
10.000 en Espanya
4.200 en todos los payizes Arabos endjuntos.
Entremientes ke muestros ermanos en el Norte de Europa sufriyan de un antisemitizmo desgrasyado i fatal, – no mos olvidimos de los masakros kavzados por los kruzeros i la destruksyon de komunitades enteras en Fransia, en Alemanya, en Bohemya – en Espanya, basho el Kalifato de Kordova, los Judyos (i no solo eyos) konosyeron la Epoka de Oro. Mos akodramos de los nombres de : Maimonides, Yehuda Halevy, Ibn Gabirol, Ibn Pakuda, Abravanel ets… en todas las konosensyas, kulturalas, artistikas, sientifikas, i sin olvidar las relijyozas. los Judyos eksellan.
(a kontinuar) [email protected]
Artículos Relacionados: