Los Ijos De Sefarad (9)

Diario Judío México-

Ah, keresh verlos estos sefaradim ? Tendrash ke ir a la Sinagoga Sefaradi de Bruksel o a la de Madrid, de Cape Town, de Ashdod, de Los Angeles, de Sydney o de otra parte… Oyirlos avlar kon esta lingua savroza ke es el Espanyol, el verdadero, el de lo suyos, oyirlos kantar ken i ken mas fuerte, oyirlos responder al Haham o al Rabino kuando este kanta las berahot, las bendisyones… Oyirlos gritar de una boz alta i grava “AMEN”. Estash en Sefarad…

EL NEVE SHALOM
La mas grande sinagoga de Istanbul en Galata, ande moravan la majoritad de los Judyos en la primera mitad del siglo 20. El korason de la vida Judiya de la Kapital de los Sefaradis en Turkiya.

Bat Mitzva kollektivo

Ke pekado ke muestros buenos judyos i las sinagogas ke se fraguan kon tanta buena voluntad i esfuersos, les afita, un kualker diya, i espesyalmente en los diyas de fiesta, de boda o durante el servisyo de Shabat de ser la cibla de los attakes terroristos, de estos assasinos ke nunka se artaran de vazyar sangra judiya kada vez ke lo pueden…. Aki abasho el dezgrasyado 6 de Septembre 1986 ke kavzo la muerte de 22 almas…
El segundo attako fue el 20 de May 2002 i se muryeren otras 21 almas….. Los terroristos entraron kon bombas i armas al Neve Shalom i eksplozaron el Beth Israel en Sisli kon un un koche kargado de eksplozivos…. Ganeden bueno a los ke mos desharon la vida buena…..

Serresh vuestros ojos i sin muncho esfuerso agash un viaje en el tiempo i en el espasyo. El sol entra kon olas i vos espyerta la neshama i arekayinta vuestro korason. Su kayntor vos abrasa komo los brasos de una madre. Miresh a los muestros : A sus simplisitad, sus generositad. Tienen un grande korason i lo mas de todo la mano ensima del korason, la mano a la espalda del otro…. Sentish la golor de las borekitas, de las avikas kon pazi o kon espinaka, ensima de la komida una salsa godra, tremblando, los yaprakes ke se azen kon las ojas de vinyas, el kafe perfumado kon la golor de las flores de naranjas, el raki, el anis blanko akompanyado de los mezes, un pedasiko de abudaraho, pishkado salado, boyikos, filikas, fistukes i almendras saladas… Pedasos de konkumbres kortados a la largor i salados, freskos komo la luvya… “Salud i beraha”…. Oyish las inkantasyones del jugador del tavli, del sheshbesh, del triktrak, de este juego ke fue inventado antes mas de tres miles anyos murmurando a los dados. Los oyish estos dados arezvalandosen ? Oyish en vuestro ser i en vuestro korason el bruido del pion chaftado kon fuersa ensima de la tavla markada ? Oyish, inchido de ironia esta riza homerika del ganador ? Lo oyish Agora yegatesh… Estash ayi enfin.. I es esto ser Sefaradi.

LA SINAGOGA

Una sinagoga (el kal o kahal) “asamblea” adaptado del Hebreo (Beit Knesset) “kaza de asamblea” es el lugar del kulto Judyo.
La origen de la sinagoga, sinyifikando el lugar de asamblea de los de la fe Judiya, desunido del ritual antiguo i del altar del Templo, va atras al tiempo de los profetos i de sus dissiplos. Orijinalmente no reprezenta un karakter sakrado ma lo gana kon tiempo. La sinagoga siendo una institusyon karakteristika del Judaizmo nasyo kon la ovra de Esdras. De akel tiempo por aki, gano tanta importansya ke “la Sinagoga” indika figurativamente el sistemo del Judaizmo, en oppozisyon a la Iglesya.
Las sinagogas tienen un sanktuaryo, kere dizir una grande sala de orasyon. En medyo en direksyon de Yerushalayim, se topa la “bimah” o la “teva” – el talamon- i de aya verso al fundo se topa el “Aron ha Kodesh ” – El Archo Santo – en el kual estan los “Sifrey Torah” – Los Livros de la Tora – Se pueden aneksar tambien salas de fiestas para los evenimientos de la kommunitad. Kon esto se topan salas mas chikas konsakradas al estudyo de la Tora. Son los “Beit Midrash”. Al empesijo las sinagogas eran unikamente un lugar de kulto ma kon los anyos ke pasaron, se izyeron tambien un lugar de Talmud Tora, lo ke kere dizir un lugar ande se ambeza la tradisyon, la lingua Hebraika, por los chikos i por los grandes en mizmo tiempo. Philon de Aleksandria dospues los Judyos de Venezia i akeyos de los payizes de los Ashkenazes ke avlan el Yiddish, dezinyavan las sinagogas komo “eskolas ” o shoul (del Aleman Schule = eskola). Este nombre se utiliza dayinda para las sinagogas en los entornos Ashkenazes.
Entre muestros uzos se da azeyte al kal kuando se salva la persona de un aksidente de una hazinura o de un estado ke le kavzava malestar…. La sinagoga se viste de flores kuando se selebra una boda i de preto en los funeralyos…. En las bodas el koro ariva, ande se asentan las mujeres, detras de unas grilyas doradas alavan el Senyor del Mundo i kantan kantikas en Hebreo al final.