Mano avyerta…

Por:
- - Visto 230 veces

Aviya una vez una mamita ke teniya un korasoniko de oro i ke todos se tresaliyan por eya. No aviya persona en la famiya, en el vizindado leshos o serka ke no keriya bien a esta mujer. Sus amigas la yamavan “la reyna de los proves i la allegria de los rikos ! ” No aviya diya ke no teniya djente en kaza….Si teniya ke salir las demanyanadas, viniyan djente dospues de midi i si teniya de salir dospues de midi, la kaza se inchiya las demanyanadas….

Su marido no saviya ke azer ! No la puediya guadrar en una tinaja i no puediya arrondjar todos los ke viniyan ! El mal estava ke este andjelo de mujer gizava lo mijor ke puede ser ! No se kere dicho ke todos se namoravan por todo lo ke aziya kon sus manos inkreivles ! I nada abastava ! Su marido se keshava de la mano avyerta de su mujer i del gizado tan perfekto ke arrekojiya tantas personas para “gostar” i diziya “ke koman por mundo tuyo i ke no gosten!”

La mujer por seguro ke no keriya aravyar su marido ke adorava ma no saviya komo puede ser de otra manera ! No…No…Ansina deviya de ser i punto! No aviya otra alternativa para eya. No solo ke no aviya otra alternativa ma le plaziya enventar kozas muevas para los “gostijos”.


Un dia su marido le disho ” Ke keres dizir me ! Eskapo el teneke de 20 kilos de azeyte de oliva ? En 15 dias ? No me kreyo… Lo vendites ? ”

Nunka me vo olvidar de esto ! No saviya si deviya riyir o yorar! Teniya 11 anyos… La dammika estava kayada… Kualo le puediya dizir a su marido ? “Ize boyos i borekas para el meldado de tu padre i sosh 60 personas en vuestra famiya kon los vizinos ” La masa de los boyos i de las borekas se avre kon azeyte i su marido no iva entender ! No es ke se karisheyava (emleskar) en lo ke aziya i porke ma esto parese le salto a los ojos i s’inyervo de negra manera….

Un diya estavamos reunidos todos ande mi granmama. Fiesta o boda o meldado o nasimyento de un inyeto no me akodro…Las mizmas 60 mas o menos personas estavan ayi…Mozotros, las kreaturas estavamos djugando aryento en la otra kamareta. Vino mi papa a la noche…saludo a todos, yo me echi en sus brasoz para abrasar lo komo kada diya i me asenti ensima de sus piernas… Estavan avlando… Mi granmama disho alora…

” Esta vez N…. no mos trusho boyos i borekas….Vamos a komer la tapada ke mos trusho Viktorya. Mi padre kedo mirando i le demando a su madre ke keriya dizir…

Mi granmama le konto ke la d’alkavo ves ke mi padre komyo boyos i borekas ande su madre estos eran echos por su mujer.. i aviya tantos i tantos ke komyeron unos kuantos diyas kon un grande plazer..

Mi padre le regalo una maniya a mi madre.. 3 dias dospues de muestra vijita a mi granmama..Yo saviya porke 🙂

Bezikos de aki al Gan Eden para mi mamita presyada i mi papi ke adorava yo…..

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: