Monastir (Bitola, Macedonia), 1900s – Ottoman Empire

Diario Judío México - Keridos Mickey i mis amigos en el Diariojudio,

Ya vos eskrivi una vez sovre las famozas bulemas de Monastir el 29 de Septembre 2019 kon LA NOSTALJIYA DE LA SAVOR i LAS MASAS INCHIDAS DE HISTORIA. https://diariojudio.com/opinion/las-bulemas-de-monastir/307947/

Oy vos kero eskrivir otra vez de la vida de mis nonos en Monastir, de sus manera de bivir lo mas en sus kazas o vijitando amigos i membros de la famiya….

LAS BULEMAS DE MONASTIR

Las bulemas de Monastir
No te artas kon oyir !
Va ija traye el kezo
Ven Susan, bate el gueyvo..
Korre Moshiko al orno !

Las mujeres de Monastir
Saven solo kontar i riyir
Bayla ermoza, abolta
Tray’me el dulse i kanta !
Kukla kon ojos de seda.

Las kayes de mi Monastir
Tienen piedras para firyir
Gritan los aznos, gritan perros
Las dammas kon los aniyos
I los hombres kon chapeyos

Las bulemas de Monastir
Godras komo para parir
Un bokado un dukado
Ande estan muestros dados ?
Ven kunyado jugaremos !

sharope blanco

Las mujeres o las servientes aziyan el merkado i organizavan los echos de kaza… No era fasil komo oy. Se keriya planchado todo lo ke se lavava a la mano, kon un uti ke se kayintava kon brazas de karvon lo mas, amidonar manteles, kamizas ets… Merkar alimentos i guizar kada diya en enverano porke no egzistiyan neverras… En invierno se puediyan meter a yelar las komidas en los bodres de las ventanas de la kozina o en los balkones…. El fregado se aziya dospues de kada komida kon un shavon ke no teniya el pueder de los deterjanes de oy ! Lo mas se metiyan a buyir si eran muy suzyos….

Kaliya siempre ser preparados por las personas ke no mankavan de vinir a vijitar kon biskochos, dulses de leche o pasteles, se les ofresia sherbetes, kafe, likor echo en kaza…. Se invitavan a komer tambien. Los chikos kedavan en kaza fina siete anyos, kuando se ivan a la eskola. Jugavan kon los chikos de los amigos i de los vizinos o se embiyavan a kaminar kon las servientas. Jugar un instrumento de muzika era lo mas importante por las famiyas ke se kontavan por ser sharanfonfones ! El chiko o los mansevos davan un chiko konser para los invitados de basho de la mirada orguyoza de la madre o del padre !!!

No egzistiyan otomobiles… Se iva a pye o kon karosas travadas por los kavayos. Teatros, balos, bodas, espozoryos, nasimyentos eran los divertimientos sosyales i muy populares. Se aparejavan de muncho antes i se avlava de akeya noche kon todos los detalyos i semanas a vezes. Se kazavan por medyo de las kazamenteras porke ijikos i ijikas no se puediyan frekuentar afuera. I de dinguna manera era akseptado de salir, amar, espozarse kon uno o una ke no era judyo/iya. El pekado i la verguensa eran intolerables para los mansevos komo para sus famiyas….. Eran lo mas famiyas tradisyonales, se observava el Shabat, las fiestas por seguro, se ivan al hamam los Viernes, se asendiyan kandelas, se diziya el kidoush i se guizavan las komidas tradisyonales….

Kerido Mickey, estimada senyora Blanco, yo ? !!!! Ayyyyy no no no mil vezes no ! Sharope o sharopiko basta i sovra ! Me dizes “tu” komo todo el mundo porke sino yo pensare ke las letras son eskritas para otra persona ! Te puedo dizir ke yo tengo 120 anyos ma no me engrandesi malhorozamente ! Kedi en mis 12 anyos i penso a vezes ke so un karakter de bandas desinadas kon kola larga i muy ermoza saltando en toda las vandas. La verdad es ke a vezes me yamo un sako de patatas tambien ! Ay dias ke tengo 1000 anyos i siento la pezgor de todo esta planeta en mis ombrizikos !

Agora ke ya te konti un poko sovre mi, pasaremos a las kozas seriyozas. Madre mia bendicha ! El seriyozo i yo no mos frekuentamos muncho ma de en vezes en kuando no tenemos remedyo i tenemos ke azer sorizas ansina para ke la gente no topen de avlar !

Es verda ke tengo oyido en me kaza ke se avlava de los Pardo.
Espesiyalamente en la kaza de mi grande tiyo Viktor Kamhi, el ermano de mi granmami. Agora si tu sos un miembro de esta famiya, puedeser de vedra ke somos paryentes de leshos. Te puedo dizir ke se avlava kon amistad i buendad de los Pardo i ke eran dinyos de muestra famiya. Saves ke al tiempo se mirava muncho ken es ken !!! Para mi es vaziyedura ma antes se matava i se degoyava i se arondjava i se aharvava guay guay para kestyones de honor i de famiya i de no se ke kaldo de poyo ! Mi famiya era una de estas famiyas ke travavan el pelo kon pinsetas i teniyan la naris en la punta de los Alpes. (Himalaya es demasyado alto …No se kere ! )

Va dizirles ke todo esto es stupides i no tiyene sentido ! Te ivan a mirar komo si aviyas abashado de la luna ! Agora, frankamente no te puedre dizir kualo eran los kriteryos… No kreyo ke la moneda teniya un rolo en ansina de mizansenas ! El saver, el buen nombre, ser derecho en la vida, aresivir gente komo se deve, ayudar a los ke tiyenen de menester, vistirse elegante ma sin bruido (!), avlar kalmamente sin boz alta, no kesharse, djugar un enstrumento de muzika, no malavlar i azer dedikodu (gossip), ser amigos i paryentes del mizmo nivel de famiyas era mas o menos lo importante para ser “shoronfonfon” ke kere dizir de la parte blanka de la gayna ! Entendi ke los Pardo i los Kamhi se asemejavan en el “shoronfonfonizmo” ! Yo, grasyas al Dio, no tengo nada de una shorofonfon i me gusta komer el pishkado kon las manos ! (Ke mi ijo no me oyga !)

Agora…Una kozika sovre Monastir…Las mujeres de Monastir son nombradas por sus gujizado ! Los hombre Monastirlis no saven el adreso del mupak ! (El djudaismo, Monastirli o no, empesa en el mupak i se eskapa en el mupak ! Lo dishe ansina para riyir 🙂 )

I …..Mas nada….Ansina…Otro un poko va ser invyerno… I van a empesar las friyos…. Ay muncho para la sezon de las serezas…. La primavera es la mijor sezon para mi ! Fragulas, serezas, prunas, endjinaras, moras i lechua….. Estos bastan para ke mis ojos se avren grandes grandes de plazer ! Komer serezas en mi balkoniko ? No ay nada mijor ! Metes el chikichiki ayi ….ohhhhh ke lo bueno miyo ! Ke venga Sarika ke vayga Avramiko i ke mi kalemiko aga
tornos en las ojas komo se lo dize a la oreja mi meoyiko ! No es avlastina ke me manka en este mundo !!!!

Kon sorizas
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.