El Hodja de la meshkita, les darshava a las mujeres
Sovre sus famiyas i la vida, kon perfumes i flores.
Les kontava solo sovre los bilbilikos en los arvoles
Una de aki una de aya, aroz en basho, trigo en alto…
Meneyava la kavesa, arrimava su pierna,
Estirava sus mustachos i se araskava la tinya…
Las muestras fustukitas
Muezizikas i almendrikas !
El chupandose los mushos,
Los ojikos boltados,
Darshando… ya esta, se dize !
Ma lo ke mas le sale
Sevoya, chorba (supa) i pimyenton
Tornando komo loko en su kanton
Una de las kokonikas le salta i le demanda
Los ojos embasho ma entera solevantada
“Hoja efendi i si afita un yerro kon el doktor
Kuantos anyos tengo para arrepintirme de mi dolor ?”
“5 anyos por el doktor i 4 anyos por el injenyor !”
Se alevanta otra, entera entravada, la kara korolada..
“I si afita kon el avokato, Hoja efendi, ke es la devda ?”
“Tres anyos mi ermoza, diya por diya i moneda…”
“Si me namoro, sin kererlo, i me vo kon el Hodja ?”
Una kon boz chika demanda. Sus byervos a penas se oyen.
“Hodja efendi, me averguenso, i no kijyera ke lo entyenden”
“Ayyyyy mi kuklita, tienes razon ! Keres irte al Ganeden !”
Artículos Relacionados: