Diario Judío México - La vedra es ke no kaveriya en livros enteros kontar ken era el grande Rabino, Lider de la komunitad judiya, mediko, astronomo, fiziko, teologo i filozofo judyo ke bivyo en Cordoba (al-Andalus – Imperio Almoravide)  en el siglo 12  o mas egzaktamente se muryo antes  815  anyos en Egypto a la edad de  69  anyos.   Teniya la kavesa de un profeto, fue venerado ke tal durante siglos i no peryo nada de su fama fina muestros diyas, espesiyalmente kon sus ovras maestras la Mishne Tora i la Guia de los Perplejos.

Mos imajinemos por un segundo ke durante la restorasyon de una meskita en Cordoba se deskuvre una kamareta eskondida, enkadenada i ke kontiene muy munchos livros de la grande libreriya de Cordoba del siglo X….   Por seguro ke enkontrariamos los tekstos maraviyozos de los grandes filozofos i poetos de Cordoba, las eskisas originales de las makinas para volar de Firnas, los planos de templos i sus misteryos i tambien inkontavles manuskriptos eskritos en la edad de oro de Cordoba…..  Va de suyo ke este deskuvrimento trayeriya munchos trokamientos (cambios) en lo ke esta eskrito en la Historia…

Esto okuryo a la fin del siglo 19…   Se deskuvriyo tambien un monton de dokumentos manuskriptos sinyados por el Rambam sovre la historia de Cordoba.   La GENIZAH del CAIRO  es siertamente el sityo arkeologiko el mas importante ke se topo fina oy en diya sovre la kultura judiya.   Se trata de la mas kompleta libreriya kon mas de 200.000  eskritos i dokumentos de parchemino ke datan de  1.000  anyos antes….  GENIZAH  es un termo en Hebreo ke sinyifika un kuarto ande se guadran i se eskonden eskritos i dokumentos ke se konsideran “santos”  o kontienen el Nombre de Di-o… I tambien, Eskritos Sakrados en loskualos los skribos kometyeron errores i se deven de metersen a parte  fina ke se desida de destruyirlos kon rituales sakrados.   No solo estos se guadravan ma chekes, preskripsyones, reseftas, amuletas, livros de medisina, filozofia, ketubas  (aktos de kazamiento),  gets (aktos de divorsyo) filozofia shiita i Sufi, fablas arabas, todo manera de dokumento, kontratos, letras de negosyos, letras de las personas….La vida de los judyos en la Edad Media….

La  GENIZAH  de la Sinagoga Ben Ezra en Cairo se deskuvrio en el tejado de este Templo ke se aviya fraguado ensima de las ruinas de una iglesia Koptika vendida a los judyos.  Se aviya renovado ma el kuarto en el tejado estava muy bien eskondido i no fue tokado.  Des de este tiempo los judyos  eskondyeron aya kon muncho kudyado, todo modo de relikas, ovras sekulares i relijyozos.  Estos datan del diezen i tredjen siglo… Tienen muncha importansya porke la hohma i la savyedura eran sakradas por los judyos des de siempre.  Se saviya la egzistensya de La  GENIZAH  del Cairo por los akademikos des de los tiempos antiguos ma solo en el siglo 19, los intellektuales i los antikaryos puedyeron konvenser los direktores ke por fin dyeron sus permisyon para pueder kitar de la sinagoga siertas ovras.  En konsekuensya se enkuentran oy en St. Petersburg, en Jerusalem, London, Oxford Filadelfia….

Dr. Salomon Schechter  kon el ayudo finansial de Charles Taylor, el Direktor del St. John College de la Universitad de Cambridge trusho la kolleksyon de 193.000  dokumentos de la sivdad de Fustat (Cairo antiguo)  a esta Universitad .  Son konosidos komo la Kolleksyon Taylor-Schechter Cairo Genizah.  La Kolleksyon Mosseri kon unos 7000 dokumentos fue dada tambien a Cambridge de la parte de esta famiya renomada de Cairo ke tuvo ke emigrar en 1934.   Estas Kolleksyones se pueden ver en el WEB   (Cambridge Digital Library).

Asigun la Ley, si un Livro de Ley o kualker eskrito kon el nombre de Di-o  esta demazyado viejo o no se uza mas tiene ke ser enterrado komo si fuera el puerpo de un humano.  En kavzo ke esto no es posivle tiene ke ser eskondido en una Genizah.

Una koza ke me sorprendyo muncho fue la savyedura del RAMBAM sovre el puerpo humano i sus talentos en medisina.  Se puede dizir ke es el ke avriyo el kamino a la medisina moderna.

  • Fue el ke avlo de los lasos del puerpo kon la neshama (soul) el puerpo siendo la kaza de la neshama i ke el puerpo es UNO kon la neshama i no se pueden espartir.
  • La neshama tiene sinko ramos i es eya ke guiya el puerpo. Kada uno de estos ramos tienen diferentes funksyones.
  • A parte de las hazinuras del puerpo i de la neshama  ke deven ser kurados kon  drogas i medisinas, egzersisyos fizikos ets.  el RAMBAM kreye ke lo mas importante es mantener el puerpo i la neshama en buen estado de salud, i muy probablamente kon la observansya de la Ley i tratando de mijorar su karakter, su moralitad i su attitud por la humanitad i todo lo ke tiene vida…
  • El RAMBAM  insista en la nesesitad de ambezarse la Tora, adorar Di-o de toda su alma, tener valores ets…. para tener una buena salud.

Dospues de Moshe Avinu, es konsiderado komo el mas perfekto judyo el  NESHER HAGADOL  la  GRANDE AGILA  venerada por todos mizmo por los de relijyones diferentes.  El RAMBAM  es konosido komo el mas grande filozofo seya en la kultura judiya seya en la kultura araba i en la kultura Europea. En arabo es nombrado Abu Imran Musa Bin Maimun Bin Abed Allah Al-Kurdubi Al-Israili. (Musa ibn Maimon) i (Maimonides en Grego ke es ijo de Maimon)

En siguido de la Tora
Leyes de komporto
Los ocho Kapitulos
El puerpo i la neshama humana
Lo ke ata el puerpo a la neshama, sentidos fizikos
1500  konsejos por la salud i ambezos de Galen
Ambezos de Hipokrates
Galen  –   Hazinuras i komo kurarlas
Sovre los Hemoroides
El livro de la Astma
Los nombres de las droguas i de las medisinas
La inklinasyon de la persona a lo negro

El RAMBAM vino de ocho generasyones de Dayanim, Hahamim i skolarios, su padre era Dayan (un juzgo en el korte de los hahamim) i era famozo no solo por su savyedura de la Tora ma su maestria en astronomia i en matematikas.   Fue el mizmo ke ambezo el Talmud, la Tora, las tradisyones i la Relijyon a su ijo i sin duvda ke le paso sus genes ekstraordinaryos.

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anterior¿Soy pequeña? ?בין איך קליין: Libro infantil ilustrado Español-Yiddish (Edición bilingüe)
Artículo siguienteDavid Mandel, mi enfoque, 1ra. parte
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.