Diario Judío México - Por una persona ke no se kreye del todo en superstisyones, lo topo muy kuryozo ke  52 %   de las personas ke biven en los payizes del ouest, akseptan la astrologiya komo una disiplina sientifika.  70 Mil Amerikanos empesan sus diyas meldando el horoskop !  Ay mas  de 3 milyones de sitios de astrolojiya en el Internet i estos son vijitados por unos  120  Milyones de personas !  Ay de mas en mas gente ke se kreyen en el kalendaryo de las estreyas.

La astrolojiya estudya las linyas karakteristikas de la persona, sus tendensyas asigun el diya i la hora de su nasimiyento i la relasyon de su sinyo zodiako kon el sol, la Tierra i las otrs planetas….  Es esto vedra ?

Bueno…. Asigun las investigasyones muy seryozas de la Universitad de Saskatchewan en Canada, la repuesta es  NO !  En estas investigasyones se lavoro sovre 2000 personas ke nasyeron en 1958, el mizmo diya, kon minutos de diferensya.  Se observo durante anyos sus tendensyas i sus karakter, en mizmo tiempo, 700 astrologos kitaron la karta de nasimyento de unos ke se eskojyeron de akeyos 2000 muevos nasidos, sin tomar en kuento kriteryos.   Los rezultados mostraron ke los astrologos se yerraron en sus estimasyones.

EL ZODIAC

Los ke kreyen en la astrologia son los ke keren dezesperamente saver sus futuro…. Tienen el menester de kreyer !

Lo ke es importante por las personas no son sus kreensyas ma los rezultados.  Esto es una manera pragmatika de ver las kozas…i es aktual kuando se trata de las superstisyones.  Las superstisyones son una manera de dar satisfaksyon a los menesteres psiko-sosyales.  Es por esta razon ke egzisten des de miles de anyos en todo modo de kultura

Las superstisyones son kreensyas ke no son relatados kon las relijyones, no son justifikadas i no konkordan kon el nivel de saverisyo  de la sosyetad.   Dan a las personas i a los objetos poderes surnaturales.  Skinner, psikologo del komportamiento, disho ke ay una relasyon entre los faktos i las superstisyones.  Por egzemplo una kreatura ke fue moryido por un perro, se va espantar de todos los perros … Skinner konsidera en un mizmo plano estos espantos ke no son rasyoneles kon las superstisyones…   Una superstisyon yerrada trava otra superstisyon komo chafteyar la tavla  (toucher du bois!) por no ser enfrentado a una negra situasyon… Esta persona va kontinuar a chaftar la tavla en pensando ke deve de azerlo porke pensa ke ANSINA ES.  Vemos ke las personas primitivas i los inedukados son mas inklinados a kreyer en las superstisyones i en las kreensyas okultas i estas kreensyas i tradisyones pueden sin duvda yegar a eshelones frankamente dramatikas, ver trajikas ! Mirar las kartas, la marka del kafe, la endivinasyon, los gurus, meldar el mazal de las manos, el vuduizmo i todos los otros tipos de echos de echizeros i bruhas no solo son defendidos en muestra Ley ma son muy muy nefastos por la salud mental i el bienestar de la persona, sin mensyonar ke no ay nada de konkreto i de verdad en estos….otras formas de meldar el horoskopo!

Unos diran ke el gato preto traye mazal negro i ay mas i mas !
Araskina en la mano derecha =  ganansya,
Araskina en la mano siedra    =  avra munchos gastos
Si se kuze ensima de una persona se le ata el mazal
El kuchiyo no deve de pasar de mano en mano !
No se deve de kortar el pan kon kuchiyo para guadrar la atzlaha
Se sale i se entra a kaza kon el pye derecho para ke todo salga bien

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorMacabeadas
Artículo siguienteMaccabi Mundial realizó por primera vez en México el Foro de Líderes Futuros durante las Macabeadas Panamericanas
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.