UN PASEO AL BODRE DE MAR O
IR A VER LAS MARAVIYAS DEL MERKADO SERRADO O MAS …MAS…
Keridos Amigos i mis Amigitas
Oy es el 27 de Octobre 2019 Diya de Alhad i estan las 11.05 de la demanyana en Istanbul. Diya de autumno no tanto yelado i kon soliziko dizyendome : “dame una soriza para ke te arekaynte el korason !”
Arresivi una letra de Dogan Akman de Kanada ke es una persona muy presyoza para mi porke aze partido de mi primera chikes, visto ke jugavamos kon su ermana Rozika (Una damma, tambien persona de Ley/Law en una alta pozisyon komo Dogan Akman el mizmo). Muestras madres eran amigas/vizinas i se frekuentavan muncho….
El mesaj de Dogan era “en inglez” . Porke parese ke Dogan puede meldar i entender ma tiene difikultades de ekspresarse en muestra lingua, ke es tambien la suya, porke nunka la pratika. (Dogan, siendo perfeksyonisto de karakter, no se puede sintir satisfecho kon una koza ke no le plazga sien porsien a el en primero !) Le do el privilegio de eskrivir mizmo en kinezo, savyendo ke ire a bushkar un traduktor en esta lingua para ke me lo aga minudo !
Grasyas al Di-o esto puediyendo kitar el keyf (gozar) de mis linguizikas, ke me dieron a englutir kon kucharas kuando era chika i manseva, sino komo iva pueder apresyar la valor, traduizir para todos, eskojer i entender todo los artikolos ke me son embiyados ? Artikulos literaryos, filozofikos, humoristikos i aktuales….
No kreygo ke ayga una koza mas importante de la amistad i el amor en la vida, dospues de la salud bien entedido. El respekto, la karyera i la moneda i todo todo vienen muncho mas dospues. Esto es un nesesitad igual para todas las personas i el ke lo iniega se mente de si para si ! El mas “duro” de los bandidos se ablanda kon su perro … El mas poderozo emperador no es mas ke un ijiko allado de su amada… El mas grande lider del mundo es una dezmazalada alma kuando se aboka delantre del Abastado i del Amor entre el Kriador i su kriatura… Dospues vienen las rizaaaaaaaaaas i todo lo shoronfonfon !
Devesh sintirvos repozados, relaxados, alegres i kon keyf para meldar i eskrivir kozas ke vos azen plazer.. Kozas ke vos azen vinir a mozotros keryendolo (No vo dizir koryendo a pies deskalso !!!) No ay dingun fuego aki a parte del fuego de la amistad fraternal, el keyf de meldar en muestra lingua i kompartir la erensya ke resivimos de muestros ansestros, dainda biva fina oy en diya.
Dogan kerido, fue kon muncho plazer ke meldi tu mesaj por la simple razon de su kontenido muy asemejado a “los dias ke aziya l’ecole buissonniere ” (me fuiya !) kuando lavorava… Adorava esto i era koza ke nunka se planeyava de antes, kon la spontaneitad la mas naturala de la persona ke kere “bivir” a su ritmo, arronjando toda manera de ovligasyon !
En tu letra mos kontas las kozas ke tienes ganas de azer, i ke probablamente izites el Viernes komo lo eskrivites a la manera de Victor Hugo, kontando : “la kretura metyo su dedo en el jarro de dulse para gostarlo kon delisya dospues de arimarse al almaryo en asuvyendose ensima del banko ”
Yo “vide” los ojikos briyando de una kreatura ke keriya gostar de este “dulse”, no lavorar i azer xyz komo las kozas preferidas de gozar en tiempo libre. En tu kavzo era ir a dar una forma a tus kaveyos (azerte luzyo !) kon el “pampering” …
Entrar en un restaurant japonezo de kualitad para savorar el sushi – sashimi – sake (Hon tei Goru !) i, deke no, dospues, en un salon de te en annexo para relaxarte i bever el beveraje tradisyonal i amargo ke te va servir una geisha savida i intelijente.
Para eskapar el “delightful afternoon” ahhhhhhhh ! La ermozura de koza ! Ir al “bookstore” preferido i olvidarse todo en el mundo majiko de los livros…. Yeps ! Es mi pasatiempo favorito tambien… Komo lo supites ? Solo ke yo esto un paso adelantre de ti ! Me gustan los magazenes en los sous-sols del “charshi de Kadikoy” – Eski sahaflar – ande topo livros en todas las linguas, viejos – segunda mano- dunke muncho mas baratos de los muevos “sin alma”. Penso ke los mueblos i los livros de segunda mano tienen una alma ! Me “pasan” kozas abstraktas – pozitivas o negativas – en uzandolos a mi torno ! Nunka dishe ke no so loka !
“Palavrar someone” hahhhahahahah….. Adori esto ! Yani, yo lo entendi kontar palavras, biervos d’aki d’aya a alguno … Lo entendi justo ? Nunka lo oyi antes.
Para los ke no pueden entender la letra en Inglez les kero dizir ke este Amigo muestro tuvo la jantiyesa de “pensar kon kerensya a todos ke tienen de lavorar” kuando el se fue a divertir a su manera – i kon gusto de Reyes – el diya de Viernes pasado ! Mos suheto a todos ke pasemos una fin de semana alegre i asigun el dezeo de muestro korason….
Tres elegant i sharonfonfon !
Adjunto a su letra unas ideyas bastanta makabras i ironikas ma savrooooooooozas ! 🙂
– Una buena salud es lo ke kavza ke la persona se muera lo mas avagarpossivle !
– Los ke dan tanta importansa a la salud se van a topar muy sorprendidos (para no dizir stupidos) en sus kamas de hospital o en sus kazas un diya, muryendo de nada ! – (Ayyyy la povretika de la prinsessa Diana !)
– La vida asemeja a un jarro de pimientas kemandoooooo. Lo ke se kome oy puede kemar de negra manera en la tualet, el diya dospues !
– Da a una persona un pishkado i lo artas por un diya. Ambeza a uno a servirse del Internet … No te va importunar semanas enteras !
– De en vezes en kuando puedemos ambezarmos del tiempo una koza ! Nunka se kesha del kritisismo ….
Ayyyyyyyyyyy ke se akodro una kozika ! Disho : Basta por agora !
Wohouuu Bravoooooooooooooooooooooo
A la buena hora Dogan kerido ! Grasyas … Espero ke esta vijita tiendra munchos ermanikos…
Kon karinyo Sir,
[email protected]
Artículos Relacionados: