Oy, diya de luto tan amargo de todos los djudyos
Oy, diya ke arondjamos dulses palavras i no mas kreyemos
No mas keremos oyir mintiras de boka de los asasinos
Enterramos muestros ermanos, muestro orgulyo, muestros ijos !
Oy, todo un puevlo yora, mano en la mano djudyos kaminan..
Los kaminos son largos, el mal en el korason, no avlan
Sus silensyos son los biervos ke no tienen fuersa de salir
Israel se kaya, sus alas en sangre, sus ijos kedaron de bivir !
La tierra risive oy dos puerpos mutilados, mansevos de Tsion
Muestros soldados valyentes de la armada de muestra nasyon
Mansevos fuertes, ermozos, riyendo, kada uno la glorya de Tsahal
Bendichos komo la agua del Kinereth, komo la azete del kal !
Santo Bendicho en los Sielos, oye muestras orasyones !
No los deshes fiestar de muestro luto, vengate de sus sangres!
No les des mas el poder de matar los ijos de Tsion por nada
Muestros keridos estan en la Tierra Santa sin dolor mas, ma sin vida.
Artículos Relacionados: