Diario Judío México - El poeto de todos los tiemps

EMRE era un Dervish.  Ke es el dervish ?  El Dervish es un hombre prove porke no da dinguna importansya a lo material i a lo ke apartenese a este mundo…   Se viste muy modesto i se le ve una luz en sus ojos ke aspiran a ver solo la gloria del Kreador.

Es un poeto ke kamina en los kaminos sin kansarse, kon un palo en su mano lo mas i va mendigando su pan kuando tiene ambre i no tiene nada de komer…

Es un hombre ke pensa, un filozofo, bushka la buendad, lo justo, la felisitad de la alma…. Ser Dervish es ser al servisyo de los demas, tener una disiplina rigoroza, alesharse de la ambisyon,  alimpyar su mente en esfuersandose de yegar a la rais de la kreasyon i al motivo de kada koza.   Es relijyozo ma sale kontra kualkera ideya falsa o komporto fanatiko… Ama el humano i las bestyas por ser Su Ovra i todo lo ke egziste en la Tierra.  No konose el odyo i es dedikado al Amor… Lo abraza el Amor Divino…

Komo lo savesh puedeser las poeziyas de se traduizaron al Ebreo i estan en vendita en los grandes libreros de .  Fueron traduizidos por Denis Ojalvo, Avraham Mizrahi

i Selim Amado.

Yunus nasyo en el sentro de la Anatolia en los anyos 1240 i se muryo en 1320 aproksimamente.  Era a la fin de la epoka de los Selchukes i el empesijo de los chikos reynados feodales turkos en esta ancha rejyon.

Lo konosemos komo un grande Dervish i poeto dedikado enteramente al Amor de Dio.  Bivyo en una epoka en la kuala los Mongoles devastavan la Anatolia, la otoritad politika kuaji no egzistiya i la rejyon estava espedasada en batalyas enternas, ademas de la ambre i la sekura ke egzistiya.

Sus kontemporanos eran los grandes ekrivanos sufis komo Mevlana Celalettin Rumi i Haci Bektas Veli ke eran grandes savyos de sus tiempos fina oy en diya. i estos savyos eran kontra el fanatizmo i teniyan un Amor puro en sus korasones.

Yunus es rekonosido komo el studente del grande dervish  Taptuk Emre.  Savemos ke era un grande viajador i se topo en Azerbeydjan i en Damas ande tuvyeron debatos kon Mevlana.

Su ovra, las poeziyas son entre las mas maraviyozas de la turka del puevlo. Mas tadre empeso a eskrivir poeziyas klasikas bazadas al kuento de los silabos i a la melodiya del Aruz ke azen partido de la Divan. Eksprimo el amor i las relasyones de la persona kon si mismo kon la materya i kon Di-o mas de todo. Trato de sujetos komo el nasimyento, el atadimiento a la vida, la muerte, la justisya divina i el Amor a las personas.

Su lingua i su stilo eran entendidos fasilmente en su epoka i trusho un trokamyento a la poeziya kontemporena de los poetos iranianos.

diyo rikeza a las kreensyas Alevi-Bektashi i es el primer reprezantante de la poziya del “tekke”, las salas de meditasyon, del ambezo i de la praktika del Amor de Di-o, del kanto i de la praktika del sufizmo, ande la alma se aunisa kon

el esprito divino, ande la fraternitad, la buendad, el hesed, la immensitad sin empesijo i sin fin del Di-o es lo unika ke konta i se bive.

Me vino al tino una anegdota de “tekke”.

Un diya de enverano los Bektashis (eyos ke pratikan el sufizmo)  i los Dervishes  ( los ke dedikan sus vidas al Amor Divino )  estan en el tekke meditando.

Uno dize  : ” Esta kayinte ! ” i kontinua a meditar.

Tres horas dospues un otro dize ” Tiyenes razon !”

Kuatro horas dospues el del kanton dize

” Normal !  Es enverano…”

A la tadre se alevanta el “studente” de los dervishes i dize

“Me vo ! Ay muncho bruido aki”

Su tomba no se save ande se topa egzaktamente.  Unos diez lugares diferentes son mostradas.  La d’alkavo teza dize ke se topa entre Aksaray-Kirsehir en el sentro de Anatolia.

RISALETUN NUSHIYE (El livro de los Konsejos) es su ovra maestra. Fue eskrito en 1307.  Es un Mesnevi (livro poetiko) i es kompozado de 573 strofas.  Es una ovra relijyoza, sufi i etiko.

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

2 COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.