DOS SIENTISTOS JUDYOS KE TOPARON LAS VAKUNAS DE LA POLYO, EL PRIMER, AL EMPESAR DEL VIRUS BIVO, I EL SEKUNDO DEL VIRUS MUERTO-  PARA KOMBATIR ESTA HAZINURA DESGRASYADA.

Reingrasyo mi amigo, Renaud Souhami,  para informarme de un grande savyo judyo, ALBERT BRUCE SABIN,  de ken no aviya oyido antes.  Komo JONAS SALK, judyo tambien.   Bivyeron i eskivyeron historya en la mizma epoka por sus reushitad a salvar el mundo del  "POLYO".  Esta horrivle hazinura   kavzava la muerte o la disabilitad de miles i miles de kreaturas en los anyos 50.  Oy el polyo no egziste mas grasyas a las vakunas SABIN i SALK por los ke resivyeron estas vakunas. 

JONAS SALK, el ijo bohor de sus paryentes, nasyo en New York.  Su madre era una emigrante judiya de Rusia i su padre tambien ijo de emigrantes judyos.  Sus paryentes izyeron todo lo ke era possivle para ke Jonas aga estudyos akademikos.  Eskapo sus estudyos de medisina kon muncho sukseso en 1933.  Prefero ser un scientisto i azer bushkadas al lugar de pratikar su profesion.  Logro el MD en 1939 lavorando en el hospital Mt. Sinai i aksepto el puesto de investigador en la Universitad de Michigan.  Kon su amigo Thomas Francis Jr.  toparon la vakuna de la  influenzavirus en 1943 ke se administra dainda oy en diya.

En 1947, Salk aksepta de lavorar i avrir un laboratorio de investigasion de viruses en la Eskola de Medisina de la Universitad de Pittsburgh ande publiko sus bushkadas del polyoviruses.  Fue invitado por la Fundasion Nasionala de la Paralysis Infantil para partisipar a sus investigasyones.  

En 1954  serka de 2 milliones de kreaturas  entre 6 i 9 anyos resivyeron la vakuna.

Resivyo la Medalya de oro del Prezidente i el Premio Nobel.

Se muryo a sus 81 anyo en Junyo 1995 en la Jolla-California.

Se kazo en un primer matrimonio kon Donna Lindsay 1939/1968 

ken le dyo tres ijos  :  Darrell Salk, Jonathan Salk i Peter Salk. Se kazo por la segundo vez en 1970 kon la artista pintadora Francoise Gilot en 1970  ke se muryo en 1995.    

ALBERT SABIN   de su parte, estava developando una vakuna del virus bivo de esta hazinura...  Su kreensya era ke solo del virus bivo se puediya lograr una larga immunizasyon de este mal.... Sabin refuzo el premio fiskal de su invensyon i lo regalo a las kreaturas del mundo entero...

SABIN  nasyo en 1906 en Bialystok, Rusia  (agora parte de la Polonya).  Emigro kon sus paryentes a New Jersey-Amerika a sus 15  anyos.  Es su tiyo ke finansyo sus estudyos.  Dospues de 2 anyos  estudyo medisina En la Universitad de New York.  Se estava interesando a la virologiya.  Su tiyo aviya kortado su ayudo i el lavoro en munchos echos sin importansya i bekas para kontinuar su edukasyon.   Sabin resivyo su  BS  en 1928  i entro al Kolegio de Medisina de la Universitad de New York.  

Estava investigando la pneumonia, seya kon pneumokokus seya kon viruses.  Resivyo su MD en 1931.   Viajo a Londres para mas investigasyones en la Lister Institute de Medisina Preventiva.  Torno a New York dospues de un  anyo. Aksepto el puesto de Investigasyones Medikalas en el polyovirus en el Instituto de Rockfeller.  En 1936, endjuntos kon su kollega, puedyeron  kreser el polyovirus en un pedaso del serebro de un embrio humano...

En la Segunda Guerra Mundial, Sabin izo parte de la Armada Amerikana -grupo  mediko- i izo investigasyones sovre hazinuras resividas por los insektos komo la encephalitis i dengue i lavoro para las vakunas de las dos.

Dospues lavoro por el Kollegio de Medisina de la Universitad de Cincinnati komo profesor  en las Investigasyones pediatrikas i torno a sus estudyos del polyo.  Izo otopsiyas sovre personas muertas del polio.  Vido ke este virus ataka los intestinos antes de yegar al sentro del sistema nervioso.  I es ansina ke kon munchos estudyos se puido yegar a la vakuna Sabin oral  "sovre asukar", dospues de arrekojer los rezultados de los animales, su propria familya  i los detenidos en la prizyon de Chilicothe.

Dospues ke el Ministeryo de la Salud de la Rusia Sovyetika aksepto la vakuna en 1960,  Amerika dyo su konsentimiento en  1960  i la  WHO  empeso a uzar esta vakuna de virus bivo produizida en Rusia.

Se le dyo munchas honores, premios i medallias i el premio Feltrinelli de medisina  en  1971.  Se le dyo tambien la Medallia Prezidensial en 1986  i el Premio Nobel de la Medisina  en 1954.   

Sabin tuvo tres espozas :  Kon  Sylvia Tregillus se kazo en  1935 i se kitaron en 1966.  Kon Jane Warner (1967/1971)  i Heloisa Dunshee de Abranches  (1972-1993) a la  data de la muerte de Sabin el  3 de Marzo, en Washington a sus 87 anyos. Heloisa nasyo en 1917 i se muryo en 2016. Era Braziliana. Se namoraron kon Sabin en una resepsyon dada en su honor en New York en 1972.  Bivyeron en varias sivdades i Heloisa malgrado ke era avokata prefero ser la muy dedikada kollaboratora de su illustre marido.   El Prezidente de las Nasyones Unidas Bill Clinton fue un lider ke lo enkorajo muncho en sus investigasiones.  

Sabin bivyo en Israel tambien i fue el Prezidente del Instituto de Sciensias  WEISMAN (1969-1972).  

Sabin tuvo dos kreaturas : Deborah Sabin i Amy Horn Sabin

Somos orgulyozos de muestros scientifikos i los nombramos kon honor, alta estima i kerensya por seguro.  Ganeden bueno ke tengan...

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorHitler con Wagner, un afecto en común: Ser antisemitas
Artículo siguienteLos tesoros ocultos de la Casa del Doncel y del caserío seguntino en los recintos amurallados, su valor excepcional
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.