EN ALMANYA…..
Bastante tiempo paso de mi viaje a Almanya malgrado ke, la vedra, no sentiya dinguna alegriya… Komo si mis pies keriyan ir atras… Komo si sintiya mi estomago dospues de aver komido una komida pezgada…. Demandandome en el kamino entero komo fue ke estava azyendo esto viaje sin kererlo del todo ! Lo teniya todo de ariva abasho en mi kavesa! De una parte kerer ver i ser parte de las dezgrasyas i de otra parte konoser de serka esta kultura i esta sivilizasyon ke todos me alavavan !….. La vedra es ke keriya partisipar al festival de Bach en Regensburg. Esta ideya me enkantava.
El avion me desho en Munich i mi primera impression fue una dureza ke no aviya konosido al resivir las personas ! Soldados kon mitralyetas kon karas ke davan la impression de ser prontos a attakar… Sali del aeropuerto komo si me estava fuyendo portanto la gente ke konosi en este viaje fueron de vedra muy amables i simpatikos.
Aviya enkomendado un auto chiko i me dieron una Corsa ke no saviya korrer ! Saviya kaminar komo un gameyo solo…. A medyo kamino torni, me keshi i esta vez teniya una Volvo ke me diziya “Ten konfiensa en mi, esto pronta a ir ande keres !” De mijor humor yegi a Regensburg, esta sivdad medievala ke me enkanto de vedra…
El Danube en REGENSBURG – BAVARIA
Tomi kon diffikultad los d’alkavos bilyetos para tres konsertos i empesi a tornar de todas las partes para ver lo mas ke se puediya. Un enkanto, i los konsertos una maraviya absolutamente “asemejante” a la sivdad. Pasi aya 3 diyas komo en un esuenyo.
Dospues de un grande torno en la Austria, un otro enkanto kon sus lagos, sus montanyas, sus fermas kon las maraviyozas vakas entri de muevo a Alemanya… Bayern esta vez ! Bayern me akodro las historias ke me kontavan i ke meldava en mi chikes…. Nada troko del tiempo de Charles Perrault i los Ermanos Grimm. Fue komo si estava bivyendo kon Blanche Neige i los siete nanos, kon Rapunzel, kon Hans i Gretel, le Petit Chaperon Rouge ! Las kazikas pintadas de kolores maraviyozas en medyo de los kaminos, pontes chikitikos ensima de rios estrechos o mas anchos, la djente kon vestidos lokales de tirolianos….. Ayyyyy ke keriya yo djugar kon todo esto i las vakas godras i ermozas ke se aserkavan para ser karesadas. Estas vakas tornavan a sus kazas solas ! Madre miya bendicha ! Solo las palavras les mankava… Dingi dingi kon kampanikas ermozas a sus garon ! Solo diziya “Jeanetta” i dos o tres de eyas veniyan a mi lado ! De murir de plazer ! Es ke lo mas de eyas se yamavan Jeanetta ? Ansina parese.
Garmisch-Partenkirchen BAYERN
I…. Me merki todo modo de regalos tirolyanos para mi, por seguro! Un kavesaliko korolado de forma de un korason kon una kavesa de vaka i el dingi dingi a su kuelyo. El Mickey mouse “doktor kon el diplom en la mano” para mi ijo… Un mantel kon patos brodados, una kuvyerta kon los 7 nanos i todos los ghu ghu i los ghi ghis por loskualos me namoro yo ! Esto es EL PLAZER !
Ma… Este viaje se eskapo dospues de pasear en Shaffhausen (me pareses ke se eskrive ansina…) kon el grande lago, el maraviyozo panorama, i el torniko kon barko en las aguas klaras…. Sin olvidarme de las milyones de serezas ke komi en kamino i en todos los lugares !
Kon karinyo
Artículos Relacionados: