Diario Judío México - Diario Judío México

Dospues del maraviyozo sol de ayer aklarando los sielos de un bleu sin mancha i oyir los pasharikos de muestro barrio kantar sus kantikas alegres, me vino ganas de salir afuera i emleskarme a la gente en las kayes. Eyos kaminavan komo si teniyan los ojos serrados, sin ver nada en sus entorno, pensando a lo ke teniyan de azer i ke dizir, komo tratar sus echos ande se estavan indo…. Estava bushkando de mis ijos una persona ke gozava del tiempo i de un rato de bienestar, mirando a los pinos vedres en invierno, karesando un gatiko afrito de una karesya, soriyendo a la persona ke lo/la akompanyava…. Nada… Todos seryozos komo si estavan prontos para peleyarsen o hundidos en sus mundo… Torni a kaza dospues de arregalarme kon unos chikos regalitos para mi ijika i para mi…. Oyyyy ke estava kontente.. livyana.. felis !

Oy, al kontraryo, esta yelado, el tiempo esta muy nuvlado, koza de trayer mursa a la persona ! Pensi ke lo mijor seriya de oyir kantikas de amor, tomar mis gatikos aryento de mi kuvyerta i desharme durmir meldando mi livriko…. I es alora ke empeso las kantikas de Julio Iglesias, komo si estava kantando por mi sola a mi oreja….. Su boz es ermoza ma lo inkreyible en este artisto es la manera ke se ekspresa, egzaktamente komo si deklarava su amor a la mujer ke amava… A parte de sus kantikas no lo konosiya i kije saver mas de el… Ken le inspirava todo lo ke diziya de tan profundo de su korason… Fue komo si una koza mos atava ! El kantava sus sentimientos i yo los eskriviya ! Fue ansina ke avri gogoloooooo wikishikipiki porke eyos saven todoooooooooo !

SU ECHO ES LA MUZIKA >=< EL AMOR I LA PASSION !

Ayyyyyyyyyyyy ! Tantasssssssss kreaturas ke tiene ! 8 ? Mas ? I mizmo una Kineza ke adopto i engrandesyo. Lo adoro por esto ! Ma antes de las kreaturas tiene una vida muy interesante….

Vino al mundo en Madrid en 1943. Su padre era un gynecologo. Su madre eras Porto Rikana i tiene ansestros judiyos. Fue footballista de Real Madrid kuando era mansevo i estudyava el Derecho tambien en la Universitad Dan Pablo de Madrid. Tuvo ke abandonar su vida de deportista kuando tuvo un desgrasyado aksidente de automobil i no puido kaminar durante dos anyos. Tuvo ke tener muncho koraje. En estos tiempos de profunda depresyon un infirmiero, Eladio Magdaleno le regalo una guitarra para ke no meta tino a sus dolores i pase el tiempo… Esto fue una terapia para pueder mover sus dedos tambien. Es ansina ke deskuvrio su talento por la muzika. Dospues de su rehabilitisyon Iglesias estudyo el Inglez en Bell Cambridge durante tres mezes i fue a Madrid para obtener su diploma de Derecho.

En 1968 gano el konkurso de kansyones internasyonales de Benidorm en Espanya kon La Vide sigue igual. Esta kansyon se uzo en el filmo de mizmo nombre ke kontava su vida. En siguida signo un kontrato kon la Columbia i empeso a kitar una detras de la otra sus famozas kansyones. Reprezento la Espanya en la Eurovision del 1970 i gano el kuatren lugar kon Gwendolyne el nombre de la manseva de lakuala era enamorado. Un Canto a Galicia fue su immenso sukseso i vendyo un million de diskos en Alemania solo. Manuela, A Flore de Piel, Soy siguieron kon sinko kontinentos enamorados de el….. Kantava en Italiano, en Fransez, en Inglez, en Aleman, en Portuguez sus kantikas tambien.

Julio se installa a Miami- Florida en 1979 i sinya un kontrato kon la CBS. En 1981 sale su album De Nina a Mujer ke dedika a su ija. Munchos otros albumes vinen detras. Kanta duetos kon artistos populares komo Diana Ross… Stevie Wonder… En 2001 fue rekonosido komo la persona del anyo por la Akademiya Latina de Gravasyon i un anyo dospues entro a la Sala de Fama de la Muzika Latina Internasyonal.

En 2005 toma la sivdadina Dominikana i pasa en Punta Cana lo mas del anyo. Aze viajes en el mundo entero i sus konsiertos se dan en los mas grandes teatros fina $ 1.000 por un lugar. No keda de ganar premios, komo el artistgo el mas oyido del mundo. Los biervos de sus kansyones syendo suyos, fue inkluido a la Sala de Fama de los eskrivanos de kansyones latinos al lado de Armando Manzanero i Jose Feliciano. El Kollejo de Berkelee, la Universita privada de Muzika la mas famoza del mundo le prezento el Dipolomo de Doktor Honorario. En 2015 dieron dos konsertos en Romanya kon su ijo, el famozo Julio Iglesias Jr.

En 1971 Julio Iglesias se enamoro lokamente de su primera mujer Isabel Preysler, una belleza Filipina, jurnalista i hostessa de la TV. Isabel era de una famiya rika i aristokrata Espanyola. Tuvyeron tres kreaturas, Chabeli, Julio Jr. i Enrique. Los dos ijos se izyeron kantantes, produktores i eskrivanos de kansyones muy famozos tambien. Isabel i Julio divorsyaron en 1979.

Iglesias fue merkando las kazas las mas karas de Amerika i las vendiya kuando se enfasyava de estas…. Tuvo una vida muy aktiva. En 2010 se enamoro de una manseva de 22 anyos mas chika de el. Miranda Rijnsburger era un modelo Holandeza. Se kazaron en una chika iglesya en Marbella Espanya. Tuvyeron sinko kreaturas. Miguel Alejandro en 1997, Rodrigo 1999, las buchukas (twins-jumelles) Christina i Victoria 2001, Guillermo 2007. Pasaron a bivir a la Republika Dominikana ande Iglesias merko munchos hoteles, i una parte del aeropuerta de Punta Cana kon otros investisores, Oscar de la Renta entre eyos….

El padre de Julio Iglesias, Julio Iglesias Sr. se muryo en 2005 a la edad de 90 anyos.. Una semana antes de su muerte, se supo ke Rona Keith, su segunda mujer de 42 anyos, estava prenyada de sus segundo ijo. Sus primer ijo Jaime nasyo en 2004. Ruth nasyo en 2006.

Julio Iglesias se siente muy serka de Israel i de los Israelyanos. Dyo munchas vezes konsyertos en Tel-Aviv i le enkanta tornar siempre. Dize ke kijyera muncho arresivir la sivdadania Israeli ma ke esto ne seriya posivle…. Konta ke los ansestros de su madre eran Judyos i ke tuvyeron de eskondersen en las kuevas en el tiempo de la inkizisyon, de ande sus nombre de famiya De Las Cuevas.

Julio Iglesias resivyo

– La Medalya de Oro de Espanya por los Artes

– La Medalya de la Sivdad de Madrid

– Kaballero de la Lejyon de Honor – Fransa –

– La Medalya de la Sivdad de Paris

Diyas buenos a todos i a todas….

[email protected]

SIN COMENTARIOS

Leave a Reply

Artículo anteriorLa hija del hombre de dos mil años
Artículo siguienteLa popular banda Shalva no se presentará en el Festival Eurovisión por respeto a Shabat
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.