SrulikB
En meldandola dike me paresyo ke topi trezoro de biervos. Sharope me izo enborrachar i artarme de akodrar en ambezarme de muevo la lingua ladino , ke su avla esta yenas, kon palavras de mi chikes ke me los aviya olvidado.
En vezes me mareyo de entender las diferensiyas entre la boka de Izmir i de Estanbol ke se uza ma devo agora a la lingua ke uza Sharope todo lo ke me akodri por las palavras ke uzavan mis paryentes , i la kayentor de la forma de su eskriturya me travo aryento , aunke tan larga ke era no me lo puedi esvacheyarme de meldar astal kavo.
Agora todas estas palavras ke me los aviya olvidado , me las esto ambezando de muevo, i me las esto notando en mi diksionaryo personal.
Por esta razon le digo mersi muncho , i vos rengrasyo a todos
Saludozos ke estesh
Israel Benyakar
Istanbul
Kerido Israel Benyakar,
No te puedes imajinar a ke punto me izo plazer meldar lo ke me dizes sovre la djente ke se apersiven supito ke keren akodrarsen, uzar, avlar, i eskrivir muestra lingua ! El ladino, o djudeo-espanyol o solamente espanyol para mozotros es muestra erensia (miras en turko) i tiene la savor del kafe ke muestros parientes beviyan kon sus amigos, mientre ke mozotros, los chikos, djugavamos en una otra kamareta kon las kreaturas de estos amigos de la famiya…. Tiene la savor de la gaya kon avramila, la savor de las bulemas, del sofritiko, de la antchusa i de los bimuelikos de Pesah…
No ! Yo no kero olvidarme de estas savores ! Esto tan regretando ke no le ambezi a mi ijiko regalado la lingua de mis abuelos ! Agora, “cevir kazi yanmasin (!) ” – bolta la palaza/pato para ke no se keme !- ansina se dize en turko para una koza ke keres arremediar. Esto tratando de meterle un bierviziko aki un bierviziko aya debasho de una chokolatika … ya tengo pasensya i el tiene un meyoyo Mashallah !
Kerido…. damos una mano i tu ! Es komo baylar “havva..nagila havva, nagila..” la enrikeseremos muestra erensya i seremos solo en este grupo, fuertes i sienes para transmeterlo a las jenerasyones a vinir !
un saludo karinyozo
[email protected]
Artículos Relacionados: