Sukot es la fyesta la mas alegre de los judyos. Munchas vezes, la yamamos Zeman Simhatenu (Sezon de Alegriya). Esta fyesta empesa el 15 de Tishri, ke es sinko diyas despues de Yom Kipur.

El byervo Sukot sinyifika ‘kabinas’, ke es la Suka ande la famiya bive syete diyas. Para onorar muestros padres, los judyos biven syete diyas en las sukas. En esta fyesta, komemoramos la epoka de kuarenta anyos, kuando los judyos kaminaron en el dizierto, i estuvyeron bivyendo en refujyos ke toparon. Komo Pesah i Shavuot, Sukot tyene dos sinyifikasyones: istoriko i agrikultural. En mezmo tyempo, Sukot es la fyesta de arekojer los produktos agrikultural.

Una suka deve de tener tres paredes, kon una kuvyerta enriva, ke no se va bolar en el ayre. La famiya entera deve de bivir syete diyas aryento la suka. La suka se dekora kon produktos agrikultural. Bivir syete diyas en una Suka modesta, solo kon una meza i unas kuantas siyas, es el mas grande mesaje de Sukot: ‘La persona puede ser oroza mezmo kon muy pokas kozas’.

En los syete diyas de Sukot, los judyos tienen un orden divino ke es ‘ser alegre’. Todos keremos syempre ser alegre i bivir orozos, ma komo?

Komo los savyos dizen: ‘Si no estas kontente kon lo ke tyenes, nunka vas a ser kontente kon lo ke vas a obtener’.

Es verdad ke devemos tener syempre objektivos en la vida. En los negosyos, este objektivo es de ganar mas munchas paras. La Tora dize: ‘La persona ke kere muncho las paras, nunka se va artar de ganar’.

Todos keremos bivir orozos, ma munchas vezes mos yerramos en pensando ke la reushita mos va azer mas orozos. ‘Reushir es alkansar a lo ke keres, ser orozo es ser kontente kon lo ke tyenes’. El riko es el ke se kontenta de lo ke tyene. La persona no se arta de ganar. No ay fin de kerer. Syempre puedemos alkansar mas muncho de lo ke tenemos, ma fin kuando? Kuando vamos a tener tyempo de tomar plazer kon lo ke tenemos?

Bivir syete diyas en una Suka modesta kon una meza i siyas de plastik! Esto es el mas grande mesaje de Sukot: ‘La persona puede ser oroza mezmo kon muy pokas kozas’.

Este anyo, los judyos vana repetar lo ke izyeron por mas de syen jenerasyones. Vana deshar sus kazas i sus konfores, i vana bivir alegres i orozos debasho de la Suka kon muy pokas kozas.

Dora NİYEGO

Fuenteesefarad

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorActu – Un professeur menacé de mort et victime de propos antisémites
Artículo siguientePalabras yiddish de la semana: Sukkes/Sukot