“De vez en kuando veyo en mis esfuenyos ke esto en un friyo zifo, ke esto oras i oras empyes, kon espanto, esto flako porke ay dias ke no komo ni bevo un sorvo de agua, esto kon miles de esklavos djudios asperando al ofisyer SS. Ke mos va tomar la alma… supito me vyene una boz

“Perike!!! No te dezesperes un dia te vaz a ir a una sivdad mueva, te vaz a azer un buen eskrivano i vaz a eskrivir livros, livros i livros.”

“ke dizes tu boz? Agora no es ora de oyir konsejas.”

Esta manera empesa la pyesa de la vida de Ephraim Kishon, ke la djuguimos un purim, atras unos kuantos anyos. Esta vida mos dyo una buena lisyon ke en verdad ay dyo en los syelos, si tyenes vidas de bivir ay mirakolos maraviyozos.

El direktor de esta pyesa era İZZET BANA. İzzet kon sus ideas fantastikas fondo una shena maraviyoza sin tener posibilita. El luguar era chiko la shena no era profesyonel ma tenia una azlaha ke la djente korriyan para vinir a akel bodrumiko.

İzzet, La shena la izo en dos.

En una parte una amiga tomo el rolo de Ephraim Kishon (LEYLA ALUF MEDİNA)i otra un reporter (MERİ OVADYA) Malorozamente a todas las dos las peryimos muy muy presto ganeden bueno ke tengan.

En la otra parte de la shena un Palyacho (FORTİ BAROKAS) kon dos dados byen grandes ke reprezentavan el destino, el reporter le demandava demandas a Kishon i Kishon le kontava su vida. En kontando su vida yo animava su manseves i su destino.

Ephraim Kishon nasyo en el anyo 1924 en Hungaria Budapest. Su famiya lo engrandesyeron kompletamente komo un Macar, no le permetyeron mezmo ke avle Yiddish. Solo por ojo de la djente le izyeron Bar-mitsvah. El se akordava unos kuantos byervos de la orasyon

“ vayarsheteha leolam betsedek ube mishpat ube hesed ube rahamim”

De ande puediya saver ke esta orasyon le iva savlar la vida i le iva provar ke es djudyo kuando kijo fuir a Palestina.

En el anyo 1937 el governo Hungario kito una ley ke los elevos djudyos no deven de partisipar a las seremoniyas ofisyal i komo estas munchas leyes kontra los djudyos. Dospues los tomaron a los kampes de lavoro.

Perike en el kampo se rankontra kon un eskrivano i konpetente de el djugo satranch, se ambezo i se izo maestro enriva el satranch. De ande puediya saver ke este djugo ke se ambezo, iva ser el mirakolo de savlarse de el kamp de konantrasyon ke estava.

Kurto keridos lektores una vida muy muy difisil kon ostilidad, kon espanto de murir, kon ambyertura i kon fugas.

Perike fuyo de Chekoslovakya kon una maona. La maona tomava 500 personas eyos eran kaji 3.000, un viyaje muy difisil i muy fuerte. En fin un ermozo dia de el mez Mayo arivo a el puerto Hayfa.

Abasho no abasho el asistente de la sohnut le demando

– komo te yamas ?

– Perike

– perike ???? Komo de nombre es esto tu te yamas EPHRAİM. De ke alkunya sos

– Kishonett

– Kishon! De agora endelantre tu te yamas EPHRAİM KİSHON.

Ansi nasyo el eskrivano ke konosemos muy byen EPHRAİM KİSHON.

Ephraim primeros tyempos bivyo en un kibuts. Empeso a eskrivir en Hungaro la vida de los olim hadashim kon shakaikas i kon umor. Dospues ke se ambezo en ivrit, empeso a eskrivir en ivrit. Kuando le demandavan deke eskrives las vidas non famozas, kon rizas i kon shakaikas? el les respondia:

“en todos los eskrivanos de risas, syempre ay una tristeza en sus korasones” eskrivyo munchos livros por siguro el mas popular es

SALLAH SHABATİ (ŞEEHİYANU) ke se djugo kaji 50 vezes en el lokal de Osmanbey del Dostluk.

SYEMPRE TENEREMOS MİRAKOLOS BUENOS SHANA TOVA U METUKA.