Diario Judío México
Un diya ke Albert estava tornando a su kaza
estava rogando ke una koza maraviyoza le
afite para salir de la monotonia de kada diya !
Estava pasando delantre de un magazen de
animalitos de kompanyia kuando a este momento
oyo una boz ke le estava avlando en muestra lingua !
– Quawwwwwwwwkkkkkkkkkk ! Komo estas ?
Si , si tu…. Esto aki ! No me estas viendo ?
Albert no estava puedyendo kreyer a sus orejas !
El pasharo estava avlando un Judeo Espanyol de
maraviyar ! El vendedor del magazen le grito :
– Por aki sinyor por aki ! Un pashariko maraviyozo !
– Komo te yamas ? Saves avlar en Judeo-Espanyol ?
Esto fue dicho por el papagayo Brezilyano ke le estava
avlando kon su kavesika ke aviya echado de lado i
lo fiksava kon sus ojikos riyendo !
Unos minutos dospues Albert estava salyendo del
magazen kon el pasharo, dospues de aver metido
ensima del banko los mil Dolares ke el vendedor
aviya demando por el papagayo !
Entraron enjuntos a kaza i noche entera estuvyeron
avlando de sus vidas . Albert le konto de su padre
bivyendo en Amerika i de la ermozura de su mujer,
en Ganeden, kuando se aviyan kazado. Le avlo
de su vida i su duro lavoro todos estos anyas i su
retreta agora en Miami… El papagayo le konto komo
lo aferraron en su payis natal, komo uno, antes ke
seya vendido a akel magazen, le ambezo el Espanyol
i komo se attristava kuando kediya solo los fines de
semana ets… Si izyeron muy buen amigos. Durmiyan
mizmo enjuntos.
Un diya ke Albert se estava metyendo Tefillin el
papagayo kijo tambien ! Le rogo le rogo i Albert
se fue a azerle tefillin a su talya ! El pasharo se
ambezo las orasyones de la demanyana… No le
abasto Albert le ambezo Torah i a meldar en Ebreo.
No le abasto, se ambezo a rogar asigun los Livros
i todo i todo.
Vinyeron los diyas de Rosh Hashana. Albert se
estava aparejando para ir al kal. EL papagayo no
lo desho. Rogandolo ke lo yeve i a el ! Rogo rogo
i a la fin Albert aksepto. En el kal todos fueron muy
sorprendidos de ver Albert kon el grande pasharo !
Albert les disho ke es un pasharo judyo ke save
meldar en el livro i todos los ritueles ! Kada uno
empeso a meter paras, a ken mas mas, no
kreyendo ke el papagayo save rogar i meldar los
livros santos !
Vino la ora del servisyo empesaron a meldar..
El papagayo mih ! Kon el es …. Ni esta mirando !
Albert se soflamo entero…. “Papagayo es ora de
rogar…Aydeeeeee !” Naada nadika ! Se kedo
silensyozo ! En kamino a kaza ni kijo avlar kon
su kerido papagayo… Le aviya eskayido de los ojos !
El ke le aviya echo mismo tefillines a su talya , le
aviya ambezado Tora kon tanta pasyensya.
El papagayo le demando deke estava abatido !
el le disho ke lo iva degoyar !
– Deke deke deke me izites esto ! Deke te
kedates kayado kuando saviyas todo i peryi
tantas paras pormodo de ti !
Alora el Papagayo le disho :
– Tonto ! Pensa a todo lo ke vamos a
ganar en KIPUR !!! Peryites tresmil Dolares !
Vamos a ganar diez Mil i mas !
Sanos ke estesh todos i siempre soriyendo !
[email protected]
Artículos Relacionados: