Diario Judío México - LAS ORIGINES DE LA ESTREYA DE DAVID

Adaptado i traduizido por Sharope blanco

Bazandome sovre un kapitulo muy interesante del Talmud Soncino, apareji uno de los mas kaptivantes artikolos ke vos prezenti fina oy…. En muestra lingua por seguro i kon grande plazer….

La estreya de David es konosida komo dos triangolos sovremetidas para formar una estreya de 6 puntas (una hexagrama). Es un simbolo ke tiyene o teniya su lugar en munchas kulturas del mundo. Es mas konosida de la estreya de sinko puntas.

Es un simbolo estrechamente relasyonado kon las kreensyas judiyas pormodo de la importansya ke tuvo seya del punta de vista relijyozo i seya del punto de vista historiko del puevlo judyo. La yaman el Shaday, la Estreya de Sion o la Estreya de David.

Oy en diya es el simbolo del Estado de , de su bandyera, de sus armadas i de sus entitadas siviles. A parte de todo esto es el simbolo mizmo del MAGEN DAVID ADOM ke es la egzakta kontrapartida de la RED CROSS o del KIZILAY Turko en forma de la mueva
luna en korolado para ayudos medikales sovretodo.

Su forma es eksplikada, asigun lo akostumbrado, en dos linyas bazikas. El primer kanton apartyene a la partida de arriva i es nekeva/feminil i es kalifyada de “agua”. El sigun kanton apartyene a la partida de abasho i es zahar/maskulino i es kalifyiada de “flama”. La agua kon las flamas reprezentan una kombinasyon muy harmoniozo de una dualitad mistika. Si se kere eksplikar de punta de vista de la siensya kosmolojika vemos ke el aire i la tierra se topan en frente de la dualitad agua-flamas. Dunke se konsidera komo un
sembolo teniendo todos los kuatros elementos en mizmo tiempo.

Estos kuatro elementos son konosidos komo los elementos de baza en la siensya de la alshimiya i se uzavan por los echizos ke se aziyan en los primeros sieglos i estos uzos son dayinda en fuersa si se toma en konsiderasyon las informasyones relatadas al ezoterizmo.

De la mizma manera asigun las kreensyas judias es sierto ke el Nombre de Di-o ke se save komo el Tetragrammaton i eskrivido kon las letras ke todos konosemos es sinyifiado kon el Hexagram.

Asigun el Talmud, las letras del Tetragrammaton estavan gravadas ensima del aniyo majiko ke se le aviya dado al Rey Salamon para aleshar los espiritos malos.

Esta eskrito en la Biblia ke, kuando David kombatyo el jigantesko Goliath, teniya un eskudo, gravado del Tetragrammaton. Magen signifika eskudo en Hebreo i es porke esta estreya estava engravada en la eskuda de David ke se dyo el nombre de Magen David a la hexagrama.

El Magen David komo el simbolo del Judaismo se uzo la primera vez en Prag en 1933 por la kehila de esta sivdad. Se propajo en las kehilot de Bohemya i fui rekonosido fina Vienna. Se gravo el Magen David ensima de la frontyera entre el kartye kristyano i el kartye judyo . Esta piedra ke data de 1656 egziste dayinda en su lugar.

La importansya del Magen David salyo en medyo kon la Kabala. El Kabalisto konosido Gershon Sholem dize ke uvo nesesitad de tener un simbolo del judaizmo enfrente de la kruz kristyana. Los judyos akseptaron i amaron este sembolo fasilmente.

La Estreya de Sion o el Magen David se topo en 1970 en los lavoros arkeolojikos ke se izyeron en Bet-El en … Data de los anyos 10 a 20 antes de la era kristyana. Es el simbolo del Judaismo, de la Lodja Masonika i de los Kabeleros del Templo. Se kreye ke este motifo data del anyo 3200-1200 antes de muestra era, enla era del bronzo i fue deskuvyerta en una sinagoga del sieglo 2 en Kfar Nahum, no leshos del Kineret (el lago de Tiberias).

Los simbolos de la Lodja Masonika ke son el kompas i la eskuadra forman el heksagram. Es por esto ke la Loja Masonika es estrechamente atada al Judaismo.

Los kristyanos uzaron la Estreya de David por dekorasyon i vemos ke se desino ensima de la ventana de la Katedrala Lincoln del sieglo 12 en Londres.

Una koza kuryoza es ke la kruz nazi, la swastika ke es un sembolo okulto tambien, tiene su lugar en el mistisizmo de la Kabala !

Dizen ke el Rey David i el Rey Salomon uzavan la Kabala i el hexagram para poderes surhumanos. En las siensyas okultas se uzan kartas de tarot kon un numero, una letra i kualker koza o poder en la natura.

El Dolar i el Hexagram :

En la partida derecha del 1 Dolar se topa la Estreya de David. “Annuit Coeptis” eskrito ensima de la piramida kere dizir en Latino :
Muestro echo, el plano se va terminar kon reushitad. “E Pluribus Umum” eskrito allado signifika “Uno entre munchos” en otras palavras “el puevlo eskojido” mensiyonada en la Biblia.

El Hexagram en la kultura del Oryento Leshos :

El hexagram se topa en un serklo i sierve en la meditasyon Budista. Lo vemos en el Siri Yantra Mandala ke kompoza los 9 prensipyos basikos de la kultura hindu i ke son 9 triangolos pasados i enkuadrados unos aryentos de los otros.

En la China antigua, en el tiempo de la Dinastia Chang, se dyo el nombre de hexagram al kada dopyo triangolo de los 64 triangolos.

La Bandyera de fue desinada por el amigo de Theodore Herzl, Dr. Davis Wolfson. Tiene ariva i abasho las linyas bleu del talit i en medyo el Magen David. Las 6 letras del Nombre de Di-o se eskriven en kada punta de la Estreya. (No en la Bandyera)

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

2 COMENTARIOS

  1. La magen David, como bien señala Sharope, aparece solo tardiamente en tanto que símbolo relacionado con el pueblo judio, a diferencia de lo que sucede con la Menorah (candelabro de 7 brazos) cuya mencion se hace ya en la Torah ….

    Muchas son las conjetúras que respecto a esta estrella se han hecho , tanto sobre su órigen como sobre su significado , Sharope expone aqui alguna de ellas …

    Por mi parte, teniá entendido que los dos triangulos que se entrecruzan, representa a D- y al hombre …
    aquel situado con el vértice hacia arriba, se identifica con la Inmanencia de D-
    en tanto que aquel otro cuyo vértice apunta hacia abajo, se relaciona con el hombre, en su condicion terrenal …
    ámbos sin embargo de armonizan entre si, El Creador con lo creado …

    Gracias una vez mas a Sharope, por ilustrarnos acerca de cuestiones tan diversas, y a la vez educarnos sobre el manejo de la lengua djudeoespanyola …

    • Munchas grasyas kerido Eliseo por tus komentos.
      I yo saviya ke las puntas de ariva i de abasho de la estreya
      eran relatadas kon el Kriador i sus kriansyas. No lo mensyoni
      en mi eskrito por ke no estava sigura si era justo o no.

      Un abraso
      Sharope blanco

Deja tu Comentario

Artículo anteriorShaare Zedek Medical Center – México felicita a Monte Sinaí y Keren Hayesod por sus nuevos nombramientos
Artículo siguienteEarly Hanukkah gifts and Self hating Jews
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.