En vista de Rachel: Djudios i el Teatro en Mantua, Italia por Rachel Amado-Bortnick

Por:
- - Visto 265 veces

Un artikolo en inglez ke meldi el otro dia era titolado (en mi traduksion) “Kuando en Mantua la taksa para djudios era en forma de obligasion de azer spektakulos teatrales.” Ya savemos ke en tiempos pasados djudios pagavan taksas para “el derecho” de poder bivir en un pais o en una sivdad. Ma obligasion de azer teatro? Ken savia? Era un sujeto ke, para mi, meresia mas investigasion.

Mantua es una sivdad situada en la rejion de Lombardia en el norte de la Italia. En los sieklos 16-18 era un chiko estado ke apartenia a la dinastia Gonzaga. Esta famiya avia permetido a djudios de bivir i lavorar aki, siguro kon restriksiones en el jenero de lavoros ke podian azer I de servir a los potentes. El teatro no solo ke era entre las profesiones permetidas, ma tambien la komunidad djudia era ovligada de preparar i prezentar pyesas i espektakulos para el pasatiempo de los Gonzagas i nobles de sus korte, i de pagar todos los gastes para esto. Ansi ke no solo ke personas djudias lavoravan en estas produksiones i spektakulos, ma los gastes de konstruir la shena, pagar los aktores bayladores I muzikantes, azer los kostumes, ets. venia del budjeto komunitaryo djudyo.

De otro lado, es achakes de esta ovligasion ke en Mantua uvo djudios ke sovresalieron en los kampos artistikos de teatro, muzika, i bayle. Entre estos, el mas famozo es Leone de’ Sommi (±1525 – ±1590) ke fue autor de 15 pyesas i munchas poezias en Italiano i en ebreo, i dirijor de pyesas i espektakolos. Tambien, el eskrivyo un livro ande deskrive su metoda de dirijir ovras teatrales i meter pyesas en shena, ke fue el primer livro de su jenero en el mundo.


Leone de Sommi: direktor de Teatro, poeta, i autor

El nombre djudio de Leone de’ Sommi era Yehuda ben Yitzchak Somi Misha’ar Aryeh. El era de la famiya Portaleone, ke tuvo miembros famozos en sensia i medisina, ma el fue el primer a ganar fama komo persona de arte i literaratura. Entre muncho mas, el eskrivyo la primera komedia en ebreo, ke su titolo era :צחות בדיחותא דקידושין (Komedia de Kazamiento.) Malorozamente, munchas de sus ovras se desparesieron en el gran fuego (insendio) de 1904 en la Biblioteka Nasionala de Torino, ande se kemaron 16 tomos de manuskritos de sus ovras. Las ke sobrebiven oy son la komedia en ebreo ke mensionimos, otra komedia en italiano, i una poezia en defensia de mujeres, Magen Nashim (Eskudo de Mujeres) en ebreo i italiano.

Konkluzion, i su autora

Por konkluir vos do mi traduksion de lo ke eskrivyo la autora, Hannah Goodman, del artikolo ke mensioni mas ariva. (Hannah es eleva en Muhlenberg College (Pennsylvania, USA), de un kurso sovre la istoria i kultura de los djudios de Italia.)

“En estudyando la istoria de teatro, estamos auzados a meldar i ambezarmos sovre sus raises en la antigua Gresia, i las teorias de Aristotle, los sharlatanes de la Evropa medieval, i las komedias de Molière i Goldoni. Ma es emportante tambien ambezarmos de los menos konosidos pedasos de la istoria del teatro, komo la de los djudios de la Renasensia (Renaisance) en Mantua ke no menos mos formo los artes de shena ke konosemos oy.”

(El artikolo se topa en: : https://moked.it/international/2021/08/23/when-in-mantua-a-unique-tax-was-devised-for-jews-in-the-form-of-obligatory-theatrical-performances/)

Kon grasias a Metin Delevi ke me lo mando.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: