Todas las fotos de mi chikez, i mizmo de la chikez de mi mama, tenian i tienen la marka de Foto Gagin.  El magazen de Foto Gagin se topava en Karatash,  muy serka de muestra kaza, i por esto yo no solo ke pasava munchas vezes por ayi, entrava muncho alientro para darle  a Mosyo Gagin rolos de filmos a desvelopar i imprimir (despues ke tuvimos muestra propria makina de fotografear. )  Meldi ke este fue el primer studio de fotografo profesional  en Izmir.

Agora en la muevamente restorada kehila (kal/) Ets Hayim de Izmir ay una ekspozision titulada  “Del Ojo de Foto Gagin (1902-1968)Los Djudios de Izmir i Karatash (“Foto Gagin Gözünden (1902-1968)  İzmir Yahudileri ve Karataş”) realizada kon los esfuersos de Selim Bonfil (investigador, djuntos kon su mujer Sarit,  de la istoria de los djudios de Izmir) i la kolaborasion, entre otros, de Sebastian Gagin, bizinyeto en Buenos Aires, Arjentina, del primer “Mosyö Gagin” ke establesio el studio en Izmir.

Yo avia entrado en korespondensia kon Sebastian achakes de mis fotos i mis memorias del magazen de su bizpapu, i kuande supe de esta ekspozision le eskrivi de mi alegria.  El tuvo la jantiyeza de mandarme el teksto de Introduksion ke eskrivio, en inglez i kastelyano,  para la ekspozision de Izmir.  Esta tan ermozo ke lo traduizi al ladino, i vo lo meto aki en anekso para ke todos lo podash meldar.
Vos meto tambien una chika foto de la ekspozision ke kopyi de un artikolo en el jurnal turko Milliyet (https://www.milliyet.com.tr/yazarlar/orhan-besikci/foto-gaginin-gozunden-karatas-6724136) Amostra la butika de Foto Gagin ke esta dainda tan biva en mi memorya!

Las fotografias estan djuntos kon tekstos eksplikatorios, i mizmo una poezia eskrita a esta okazion.  Yo  esto meldando todo lo ke se publika en jurnales turkos sovre  esta maravioza ekspozision, i aunke ya enkomendi el livriko tambien, no puedo no enselarme de todos los ke tienen la oportunidad de viijitarla en persona!

Rachel
Fuenteesefarad

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anterior“A Mistake!”, Canción de Teatro Yiddish
Artículo siguienteDescanse en paz Sra. Judith Oleszcovski de Sulkin Z”L