Diario Judío México - Diario Judío México

Me enkanta a kual punto muestra kultura asemeja tanto a la kultura Espanyola en la lingua, en la komida, en las kantikas, en los kuentizikos ke son leyendas Espanyoles de vedra… I muestro amor por la Espanya ke nunka aminguo en la majoria de muestro puevlo, mizmo si egzisten unos (muy muy pokos…) ke guadran sus rankor pormodo de las dezgrasyas ke okuryeron en la Edad Medya…

Malhorozamente ay dayinda antisemitizmo i gente ke keren tapar el sol kon sus manos i no ver, no entender ke todas las personas son iguales, ay buenos i negros en todas las nasyones i no se puede odyar una nasyon entera por el solo fakto de aver nasido de paryentes de una relijyon diferente… Kreensyas es muy personal i no se deve de juzgar una persona, kuala ke seya, en mirando de ke manera adora el Todo Poderozo, si Lo adora o no, i kual es Su  Nombre, o mizmo si se subdiviza en munchos asigun la kreensya de los Hindus ets…. Lo importante es la limpyeza del korason, la buendad de la persona i su relasyon kon los otros, su Amor por la Kreasyon…Su kontribusyon a Su Ovra, su reingrasyamento por todo lo ke la Providensya le ofresyo, a unos mas, a otros manko ke son Sus bienamados porke pasan por duros dezafiyos en sus vida… O ansina es komo yo lo kreyo…

En Iran no ay mas ke 20 000 judyos entre los 77 Milliones de Iranianos alora ke eran 200,000 en 1978 ! En los entornos de la tomba de Esther, a 300 km de Teheran kedaron solo 15 Judyos alora ke eran 7000 antes de la revolusyon. El antisemitizmo es una de las kolonas de Iran ke deklaro ke el no es nada ke un mito i djura la destruksyon de Israel !

La komunitad sefaradi de los Balkanes, dunke avlantes del Sefaradi , peryo 60.000 membros de su komunitad de 70.000 en Gresya. 11.370 judyos de Macedonia fueron assasinados en Treblinka. Los hombres de la komunitad de Yugoslavia -Serbia- fueron matados dospues de internarlos en kampos i sus mujeres i sus kreaturas embiyados al kampo Sajmiste ande 8000 de eyos fueron gasados en vehikulos para gasar personas ! 25.000 judyos sefaradies de Zagreb, Bosnia i Herzegovania fueron assasinados en el kampo de Jasenovac….. Los chifros ofisiales son 66.000 judyos sefaradies de Yugoslavia fueron matados entre los 80.000 ke egzistiyan…. 58.000 judyos Slovakos fueron embiyados a los kampos de eksterminasyon. Majdenek i Auschwitz Birkenau. En todo unos 100.000 judyos sefaradies de Slovakia fueron matados durante el …. Todos estos sin avlar de los Judyos de Rhodes….-miles- i de las otras izlas gregas ke fueron vazyadas de sus judyos i muy pokos sobrebivyeron. I no esto EGZAJERANDO. Muryo kuaji muestra lingua porke kedaron muy pokos sefaradis dospues del … Muestra kultura Espanyola…. Esta guerra dezgrasyada no ekstermino solo los Ashkenazes ma la majoriya de los Sefarades. I… parese ke muestra lingua no va sobrebivir a esta generasyon ke ya esta vieja…. A lo manko es los ke saven mijor de mi ke lo dizen…

Kon esto, yo personalmente, esto konvensida ke de una manera el Sefaradizmo no va dezapareser del mundo i muestra kultura siguera egzistyendo mizmo si no sera egzaktamente la mizma porke komo lo vemos oy en diya, el Castillano i el Portugues entran silensyozamente ma a pasos siguros en muestra vida, ademas en la kultura de los Sefaradis de la Peninsula Iberika, i de los Payizes de la Amerika Latina. Me veygo yo mizma muy influensada ! Uzo “feliz” al lugar de “horozo”, “peligrozo” al lugar de “danjorozo”, i munchos otros biervos ke trato de trokar (i no kambyar… merkar i no komprar, meldar i no leer, letras al lugar de kartas ets…) La vedra es ke esto oyendo ke los mansevos Sefaradis se estan enteresando a ambezarsen el Espanyol Castillano en los kursos organizados por los Enstitutes Cervantes en munchos payizes del mundo. Los ke seran tambien interesados a la lingua de sus ansestros toparan bastante materyal sin menester de bushkadas seryozas. No mos mankan eskritos literaryos, poeziyas, debatos sovre el vokabularyo i la gramatika, estudyos akademikos, kuentizikos i reseftas de komidas judiyas, memoryas relatando la vida diarya de los Judyos ke bivyeron en muestra epoka i antes, ansi ke todo lo ke kijyeran saver sovre sus puevlo.

Ay diez anyos ke me dediko a eskrivir en mi lingua sin dar muncha importansya sovre kualo eskrivo ma kudyando a dar artikolos, kontar kuentizikos para soriyir o kompozar poeziyas kon el uniko motivo de dar a meldar lo mas posivle a los lektores ke konosen muestra lingua o no tienen difikultades para komprenderla, syendo avlantes del Espanyol. Me gusta eskrivir en todas las linguas ke konosko i lo ago tan para mis lektorers ke para mi mizma…. Sintirme kerida por eyos i ser a sus lados kon mis eskritos es mi grande plazer. Lo mas son mis amigos i me van mimando dizyendo ke les plaze meldar en Judeo Espanyol i lo ke eskrivo… Esto, frankamente, me aze kantar i baylar en mis kantonikos. No me mankesh…..

Karinyozamente

[email protected]

SIN COMENTARIOS

Leave a Reply

Artículo anterior¿El tigre está suelto? Una reflexión sobre desigualdad, violencia y robo
Artículo siguienteSeñales Financieras: Sigue el desabasto de gasolina en varios estados
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.