EL TIEMPO MANKA I EL MODO DE VIDA TROKO !

En Istanbol i en todas las metropoles, la gente pensan simplamente ke personas de edad avansada no pueden kaminar presto, o de toda

manera, tienen bastante tiempo para kaminar avagar... Eyos tienen la acile (urgensya) preta !  Dunke kale pasar delantre de este hombre o mujer !

Lo aziyamos, esto segura, tambien kuando teniyamos sus edad.. Normal ! Es normal tambien ke mos chafteyen sin kererlo, esto segura... Ke mal te pueden kerer ?...  Los viejos deven de kaminar bien apegaditos a la siedra siedra o a la derecha derecha, asigun

el trafiko del payis,  si no keren ke la gente les pize ensima ... Normal!

Mozotros, los aedados,  tenemos tiempo i salimos para divertirmos kuando eyos deven SIEMPRE yegar a un lugar, apanyar un treno o el bus o vapor, ser a la hora djusta en un randevu de echo o para tomar la kreatura de la eskola ets....  No devemos de azer una trajediya de esto.

Tenemos muestra edad... Munchos otros  no biviyan fina esta edad... Munchos no saliyan ni de kaza !  Munchos ni puediyan kaminar !  Munchos no eran sanos en sus miente o en sus puerpo ! Ke tengamos vidas largas i keyf de bivir !

Grasyas al Di-o ke puedemos dayinda gozar de lo ke tenemos, de muestros keridos, de la vida ke mos se regalo....

Tomar todo de la buena parte i no inyervarmos !  La vida de los mansevos de agora es muncho mas difisil de lo ke teniyamos en muestro tiempo.

Agora ay de bivir 3 o 4  vidas en de una !!!  Porke todos estan en el mizmo kamino, porke ansina se dezvelopo la vida porke es un fakto ke devemos de akseptar.

Mijor es de akseptar kon una soriza, ke de akseptarlo porke no tenemos breira ! (otra alternativa)...

Demandar pardon !   Lolllllllll  Edukasyon!   Edukasyon !  Se troko la edukasyon !  O edukasyon sinyifika otra koza !  Estudyos, diplomes, somas de dinero giganteskas !  Estudyar diya i noche sin gozar de la vida, sin kedar para tomar un reflo !

Pardon ?  NO AY TIEMPO !  La kaye no es el salon de la Princesse de Cleves !  Ke le sale de lo ke pensas de el/eya ?  Un  "Je m'en fiche" izm total !  La etika troko de adreso !  No mora mas ande moravamos !  Oy se avla de la etika en el lavoro... Los echos son raros i de mas en mas difisil de plazer a los patrones, perdon, al Direktor de resorsos humanos.  Kije dizir el viejo Direktor del Personel. Tienen demandas de aki fina aya ! Ke es Universitad ?  Komo eskola Primera ! Masteres, doktorat, livros, metodes.... Ser akseptado ?  Fiestas i partis en la famiya ! Meter azeyte al kal, asyender lamparas..... Dar sedaka i emboracharse kon los amigos !

Yegimos kon bueno a estos diyas....

El ermozo flort de muestros diyas kedo en los filmos de antes o en las novelas de los romantikos !  Dospues de una konversasyon de las mas banales viene la kestyon  :

Tienes lugar ?  Moras kon tus paryentes ? Akseptan ? !!!!

Tienes tiempo ?!!!!  Me plazites !!!

No no no esto egzajerando !  Esto muncho mas en kompanyia de los mansevikos ke personas de mi edad... Antes unos 10 anyos avriya los ojos grandes komo gueyvos !  Agora no ! Mis orejas se auzaron a oyer las mas dezgrasyadas konversasyones, historyas charpeyadas kontadas kon un naturel ke normalmente kavzariyan ezmayos ! Se drogan komo komyendo fistukes i pipitas ! Gastan sin pensar i ni saven ande estan sus kozas.  No son kapaches de avlar o eskrivir dos frazas un poko mas largas.  Riyen komo imbesiles para kozas ke te demandas ke aviya de riyir.  Las ijikas todas tienen el tik, ke mal te kere, de tokar sus kaveyos, echarlos atras, travarlos a delantre...  El asentado;  te demandas si estas en una  seansya de YOGA.

Los ijikos pensan ke es ser macho-hombre i poderozo de komportarse mal kon las ijikas... Mas las inyoran, mas son irrespektuozos i mas son dezeyados por estas dezmeyoyadas... Ni kero mensyonar a kualo serven las komputadoras i los web-cams !

Si, si....  Esta lista puede alargarse sin kavo de vedra  MAAA kale metermos en la kavesa ke POLITESA, KORTEZIYA, ETIKETA,

EDUKASYON  (familial)  i SENTIMIENTOS NOBLES  NO EGZISTEN MAS  (en general) en el mundo, en el siglo 21 !

A la gente no les plaze ver viejos ! Ni keren mizmo ke egzistan...

Les viene komo si no teniyamos el deritto de egzistir o devemos

kedar en muestros kantones o en kazes de viejos ets....

No apresiyan la eksperyensa de la vida ke no les diza nada...

Son  sus proprias eksperyensyas ke son importantes !

HONOR no es sus biervos !  Odyan este biervo porke no es koza ke

aze parte de sus egzistensyas.  No saven kerer, no se les ambezo !

El karinyo eksesivo de sus paryentes les trusho inyervos i syervyo solo a arregalarlos, a renderlos haraganos i impertinentes !

Kerer es el dezeo ke sienten por sus femelas !  Sus kopyas ma en ijas.  La belleza, el puerpo, los kaveyos, los kalsados i la kamiza.. Es esto ke konta... El fiziko ! Los musklos i el ser  "cool", "macho", "dinamiko"," in  !!! "

Mozotros somos nada !  No puedemos ser amigos,  "buddies", no tenemos los mizmos gustos, somos "parazites" ke no sierven a nada a sus ojos !  Ademas se inyervan ke dayinda bivimos kuando sus amigos peryeron la vida en munchas sirkonstansyas.. Son rebeldes, sin pasensya...

Granpapas i granmamas son makinas de travar paras....

Kale saver bivir i akomodarse kon esto ke mos plazga o no !

Si yo me puide akomodar i vo soriyendo de las estupides ke

veygo en las kayes o en kualker lugar, esto kere dizir ke todos

lo pueden lograr sin inyervarsen i sin tomarlo al korason !

No kreyo ke iva pensar de la mizma manera si mi proprio ijo o los

munchos ke engrandesi se komportavan ansina ma por la natura de las kozas EYOS ivan a ser DIFERENTES  por ke resivyeron, les ambezi de mil maneras mi manera de ver las kozas i mi komportamiento.... Lo ke es natural.

Para ser komo eyos, kaliya ke estos VEYGAN i unos les AMBEZEN maneras, politesa ets... No lo tuvyeron...No es sus kulpas. Siempre en este kavzo la kulpa apartiene a los paryentes i a los edukatores.

De toda manera ES la vida de oy en diya.  La vida moderna !

La vida no es tan seryoza koza.... ALLELUIA... Estamos en vida !

Los paryentes ?  Peryeron el kontrol de tanto amarlos kuando eran chikos, tanto komplezantes i tanto inyorantes.. Se travan la oreja ma es demasyado tadre.  No van a renunsyar a sus kreaturas! No los van a echar a las kayes !

Todos ?  No no... Ay mijores ... Unos kuantos !

Kedavos kon vuestras  sorizas....

[email protected]

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorAsí será la vacunación en Huixquilucan
Artículo siguienteDescanse en paz el Sr. Abraham Rojzen Fastman Z"L
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.