Diario Judío México - Diario Judío México

Kualo es mas ermozo de las sorizas de la demanyana kuando la persona es akodrada kon un ermozo message, una notisya ke le alegra el korason, el gato o el perrito de kaza ke viene fina la kama para una karesya, un medyo litro de leche kayinte kon kakao, une fruta freska en enverano, el bezo del amado i i i i….. ?

Solo por ansina de kozas vale la pena de bivir i sintir la livyanes de reingrasyar el Todo Poderozo….  Estos, de vedra ke son muy chikas kozas si se komparan a los miles i miles de regalos i bendisyones ke resivimos de los Sielos… Tenemos el dover de ver lo ermozo i pensar pozitivamente, estar al lado de el ke mos nesesita i lavorar todo lo ke puedemos para sintir la profunda felisitad de egzistir i konoser la armonia de la vida en este mundo.  Ser fuerte o vayente en frente de todos los males ke mos pueden alkansar,  justamente porke azemos parte del mundo de los mortales i somos sometidos  a miles de difikultades lo mas del tiempo inesperados…. Dizimos ke es el destino i rogamos por “buenas eskrituryas en muestra frente =  mazal bueno” .

No es ke teniya ganas de espulgar una filozofiya barata esta demanyana… Al kontraryo kije kontarvos un kuentiziko ke puido trayer una ermoza soriza a mi karika i vo tratar de divertirvos un poko tambien….. Kon un poko de buena voluntad por seguro ke reushire… Enfin, lo espero !

Entremientes yo no me olvido de abrasar mi kerido Eliseo, el ke mos embiyo este kuentiziko en Fransez… Lo traduizi para mis amigos i mis amiguitas en siguida……

I es ke…. En un monasterio, de demanyana, la Madre Abadesa

pensa ke seriya bueno de pasar por las sellulas (celdas) de las monhas i ver komo estan, dizirles buenas demanyanas ets….

–  Buenas demanyanas Sor Katalina.  Vos veygo muy bien esta demanyana, i vuestro lavoro de mano esta muy lindo !

–  Grasyas Madre… Vos veygo muy bien tambien ma me parese ke salitesh de la kama un poko mareyada….

Esta repuesta desha la Superiora en pensadas….

–  Buenas dias Sor Maria..  Ke maraviya de koza lo ke estash tissando.. Estash un rayo de luz esta demanyana….

–  I vozotros mi Madre !  Ma penso ke vos alevantatesh del otro lado de la kama oy…

La Madre Abadesa se morye los lavios i sigue su inspeksyon ma todas las monhas le dizen la mizma koza !

A la kinzena monha, los inyervos le asuven !

–  Sor Gabriella, kero oyer la verdad… Kero ke seyash sinsera kon mi.  Vozotros tambien pensash ke me alevanti del otro lado de la kama oy ?

–  Si mi Madre…

–  I kualo vos aze dizirme esto ?….

–  Yevash las sandalias del Padre Emilio !

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorAlejandro Lubezki: “La diversidad es lo que hace que la vida sea interesante. Sin diversidad todo es aburrido y sin sentido ”
Artículo siguienteEl Sekreto De Ser Feliz
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.