Diario Judío México
LA AZEYTE DE OLIVA – UN PRODUKTO MARAVIYOZO
Todos savemos los efektos prodijyozos de la azeyte de oliva ke sierve a
abashar el kolesterol, a prevenir las krizas kardiakas, a guadrar la manseves, a hidratar el kuero i por seguro uzarlo en las salatas i en el gizado.
Ma sus proprietades avren otras puertas tambien ke no todos
konosemos.
1. Si pintando las paredes de vuestra kaza un poko de pintura kaye ensima de vuestra kavesa, puedesh kitarla kon un pedasiko de algodon kon azeyte de oliva sin danyar el kaveyo. Tambien, de la mizma manera se puede kitar el rimel de los ojos.
2. Kon la azeyte de oliva puedesh renovar vuestros muebles.. No tendrash de menester de merkar produktos karos para dar de muevo el briyo ke teniyan kuando los merkatesh.
Meter 2 mezuras de azeyte de oliva i 1 mezura de sumo de limon o de agro en un bokaliko de sprey. Meneyarlo bueno i sarpikarlo sovre el mueble. Deshadlo unos kuantos minutos para ke repoze i dospues alimpyar kon una
tovaja o tovajas de papel.
3. El azeyte de oliva da ekselentes rezultados para el kresimyento, el mantenimyento i la ermozura de los kaveyos. Es hidratante i les da fuersa. Kayntar una tasika de azeyte un poko (no muncho!) i aplikar sovre los kaveyos, masando bien vuestra kavesa. Kuvijar la kavesa kon un sakito de plastika i asperar 45 minutos antes de lavarlos bien bien kon shampoo
i muncha agua klara dospues.
4. En munchos puevlos se uza la azeyte de oliva para tratar el akne de la kara. Emleskar bueno 3 kucharas de azeyte de oliva kon 4 kucharas de sal fina obtener una krema. Aplikar sovre la kara kon un masaj livyano. Desharf arepozar unos kuantos minutos i lavar bueno la kara. Kale repetir esto 7 diyas.
Dospues 2 vezes o 3 en la semana abastaran. Verash una grande diferensya en vuestra kara.
5. Lo puedesh uzar komo la krema de afetar. No tendrash mas menester de merkar el sabon en krema ke seka el kuero. La azeyte de oliva da el mizmo rezultado i hidrata el kuero. Dospues de aprovar esto no vash a kerer del todo uzar otro produkto.
6. Para alimpyar las manos ke se ensuzyaron kon grasas pezgadas o pinturas kale preparar 1 kuchara de azeyte de oliva kon 1 kuchara de sal o de asukar.
Masar unos minutos las manos kon esta meskla enerjikamente. Dospues lavar las manos kon shavon i agua klara. Verash ke estan limpyas i muncho mas blandas.
(yo ago esto dospues de alimpyar pishkados i dospues de lavarme las manos ago masaj kon limon. El uzo del limon en las manos diya diya tiene efektos majiko por las manos. Dospues del masaj kon limon no lavar las manos. Alimpyar kon una tovaja de papel i tenesh las manos limpyas i sanas, blandas i dezenfektadas.)
7. La azeyte de oliva se uza para el mantenimyento de lo ke es echo kon kuero, komo guantes, sinturas, chantas (bolsas) ets. Aplikar kon una tovaja blanda embibada de azeyte estos aksesuares. Asperar 30 minutos i darles briyo kon una tovaja limpya.
Puevlos de la antikitad uzavan azeyte de oliva en la agua ande se banyavan para hidratar el puerpo i tener un ermozo ten.
Tratare de komunikarvos los konsejos praktikos ke son siempre utiles para fasilitar muestra vida, azermos ganar tiempo, kudyar muestra salud etc….
Penso ke estos konsejos son interesantes i valen la pena de saverlos i pratikarlos…. Diremos ke mos sierven mas de los versos de una poeziya eskrita por “Sharope blanco” kuando ken save ke gayo le kanto !
Kon karinyo
Artículos Relacionados: